Truffaldino e Brighella: il pranzo

Truffaldino, poi Brighella.

TruffaldinoQua bisogna veder de farse onor. La prima volta che sto me padron me ordena un disnar, voi farghe veder se son de bon gusto. Metterò via sta carta, e pò... la metterò via dopo, no vôi perder tempo. Oe de là; gh’è nissun? Chiameme missier Brighella, diseghe che ghe vôi parlar. (verso la scena) Non consiste tanto un bel disnar in te le piatanze, ma in tel bon ordine; val più una bella disposizion, che no vai una montagna de piatti.

BrighellaCossa gh’è, sior Truffaldin? Cossa comandeu da mi?

TruffaldinoEl me padron el gh’ha un amigo a disnar con lu; el vol che radoppiè la tavola, ma presto, subito. Aveu el bisogno in cusina?

BrighellaDa mi gh’è sempre de tutto. In mezz’ora posso metter all’ordine qualsesia disnar.

TruffaldinoBen donca. Disìme cossa che ghe darè.

BrighellaPer do persone, faremo do portade de quattro piatti l’una; anderà ben?

Truffaldino(L’ha dito cinque o sie piatti: sie o otto, no gh’è mal). Anderà ben. Cossa ghe sarà in sti piatti?

BrighellaNella prima portada ghe daremo la zuppa, la frittura, el lesso e un fracandò.

TruffaldinoTre piatti li cognosso; el quarto no so cossa che el sia.

BrighellaUn piatto alla francese, un intingolo, una bona vivanda.

TruffaldinoBenissimo, la prima portada va ben; alla segonda.

BrighellaLa segonda ghe daremo l’arrosto, l’insalata, un pezzo de carne pastizzada e un bodin.

TruffaldinoAnca qua gh’è un piatto che no cognosso; coss'è sto budellin?

BrighellaHo dito un bodin, un piatto all’inglese, una cossa bona.

TruffaldinoBen, son contento; ma come disponeremio le vivande in tavola?

BrighellaL’è una cossa facile. El camerier farà lu.

TruffaldinoNo, amigo, me preme la scalcarìa; tutto consiste in saver metter in tola ben.

BrighellaSe metterà, per esempio, qua la soppa, qua el fritto, qua l’alesso e qua el fracandò. (accenna una qualche distribuzione)

TruffaldinoNo, no me piase; e in mezzo no ghe mettè gnente?

BrighellaBisognerave che fessimo cinque piatti.

TruffaldinoBen, far cinque piatti.

BrighellaIn mezzo ghe metteremo una salsa per el lesso.

TruffaldinoNo, no savè gnente, caro amigo; la salsa no va ben in mezzo; in mezzo ghe va la minestra.

BrighellaE da una banda metteremo el lesso e da st’altra la salsa...

TruffaldinoOibò, no faremo gnente. Voi altri locandieri savì cusinar, ma no savì metter in tola. Ve insegnerò mi. Fe conto che questa sia la tavola. (s’inginocchia con un ginocchio e accenna il pavimento) Osservè come se distribuisse sti cinque piatti; per esempio: qua in mezzo la minestra. (straccia un pezzo della lettera di cambio e figura di mettere per esempio un piatto nel mezzo) Qua da sta parte el lesso. (fa lo stesso, stracciando un altro pezzo di lettera, mettendo il pezzo da un canto) Da st’altra parte el fritto. (fa lo stesso con un altro pezzo di lettera, ponendolo all’incontro dell’altro) Qua la salsa e qua el piatto che no cognosso. (con altri due pezzi della lettera compisce la figura di cinque piatti) Cossa ve par? Cussì anderala ben? (a Brighella)

BrighellaVa ben; ma la salsa l’è troppo lontana dal lesso.

TruffaldinoAdesso vederemo come se pol far a tirarla più da visin.