I rusteghi

Camera in casa di Lunardo.

Margarita che fila, Lucietta che fa le calze, ambe a sedere.

LuciettaSiora madre.

MargaritaFia mia.

LuciettaDebotto xe fenio carneval.

MargaritaCossa diseu, che bei spassi che avemo abuo?

LuciettaDe diana! gnanca una strazza de comedia no avemo visto.

MargaritaVe feu maraveggia per questo? Mi gnente affatto. Xe debotto sedese mesi, che son maridada; m’alo mai menà in nissun liogo vostro sior padre?

LuciettaE sì, sala? no vedeva l’ora che el se tornasse a maridar. Co giera sola in casa, diseva tra de mi: lo compatisse sior padre; élo no me vol menar, nol gh’ha nissun da mandarme; se el se marida, anderò co siora maregna. El s’ha tornà a maridar, ma per quel che vedo, no ghe xe gnente ne per mi, nè per èla.

MargaritaEl xe un orso, fia mia; nol se diverte élo, e nol vol che se divertirne gnanca nu. E sì, savè? co giera da maridar, dei spassi no me ne mancava. Son stada arlevada ben. Mia mare giera una donna suttila, e se qualcossa no ghe piaseva, la saveva criar e la saveva menar le man. Ma ai so tempi la ne dava i nostri divertimenti. Figurarse, l’autunno se andava do o tre volte al teatro; el carneval cinque o sie. Se qualchedun ghe dava una chiave de palco, la ne menava all’opera, se no, alla comedia, e la comprava la so bona chiave, e la spendeva i so boni bezzetti. La procurava de andar dove la saveva che se fava delle comedie bone, da poderghe menar delle fie, e la vegniva con nu, e se divertivimo. Andevimo, figurarse, qualche volta a Redutto; un pochettin sul Liston, un pochettin in Piazzetta da le stroleghe, dai burattini, e un per de volte ai casotti. Co stevimo po in casa, gh’avevimo sempre la nostra conversazion. Vegniva i parenti, vegniva i amici, anca qualche zovene; ma no ghe giera pericolo, figurarse.

Lucietta(Figurarse, figurarse; la l’ha ditto fin adesso sie volte).

MargaritaNo digo; che no son de quelle che ghe piasa tutto el zorno andar a torziando. Ma, sior sì, qualche volta me piaserave anca a mi.

LuciettaE. mi, poverazza, che no vago mai fora della porta? E nol vol mo gnanca, che vaga un fià al balcon? L’altro zorno me son buttada cussì, un pochetto in scampar; m’ha visto quella petazza della lasagnera, la ghe l’ha ditto, e ho credesto che el me bastona.

MargaritaE a mi quante no me n’alo ditto per causa vostra?

LuciettaDe diana! cossa ghe fazzio?

MargaritaVu almanco, fia mia, ve mariderè; ma mi gh’ho da star fin che vivo.

LuciettaLa diga, siora madre, me marideroggio?

MargaritaMi crederave de sì.

LuciettaLa diga, siora madre, quando me marideroggio?

MargaritaVe mariderè, figurarse, quando che el cielo vorrà.

LuciettaEl cielo me marideralo senza che mi lo sappia?

MargaritaChe spropositi! l’ave da saver anca vu.

LuciettaNissun gnancora m’ha ditto gnente.

MargaritaSe no i ve l’ha ditto, i ve lo dirà.

LuciettaGhe xe gnente in cantier?

MargaritaGhe xe, e no ghe xe; mio mario no vol che ve diga gnente.

LuciettaCara ela, la diga.

MargaritaNo dasseno, fia mia.

LuciettaCara ela, qualcossa.

MargaritaSe ve digo gnente, el me salta ai occhi co fa un basilisco.

LuciettaNol lo saverà miga sior padre, se la me lo dise.

MargaritaOh figurarse se no lo dirè!

LuciettaNo dasseno, figurarse, che no lo digo.

MargaritaCossa gh’intra sto figurarse?

LuciettaNo so gnanca mi, gh’ho sto uso, el digo che no me n’incorzo. (ironicamente)

Margarita(Gh’ho in testa, che la me burla mi sta frascona).

LuciettaLa diga, siora madre.

MargaritaAnimo laorè, l’aveu gnancora fenia quella calza?

LuciettaDebotto.

MargaritaSe el vien a casa elo, e che la calza no sia fenia, el dirà che sè stada su per i balconi, e mi no vôi, figurarse... (sia maledetto sto vizio!)

LuciettaLa varda co spessego. La me diga qualcossa de sto novizzo.

MargaritaDe qual novizzo?

LuciettaNo disela che me mariderò?

MargaritaPol esser.

LuciettaCara ela, se la sa qualcossa.

MargaritaNo so gnente. (con un poco di collera)

LuciettaGnanca mo gnente, mo, gnanca mo.

MargaritaSon stuffa.

LuciettaSia malignazo. (con rabbia)

MargaritaCoss’è sti sesti?

LuciettaNo gh’ho nissun a sto mondo, che me voggia ben.

MargaritaVe ne voggio anca troppo, frascona.

LuciettaBen da maregna. (a mezza voce)

MargaritaCossa aveu ditto?

LuciettaGnente.

MargaritaSentì, savè, no me stè a seccar, che debotto, debotto... (con isdegno) Davantazo. ghe ne sopporto assae in sta casa. Gh’ho un mario che me rosega tutto el zorno, no ghe mancarave altro, figurarse, che m’avesse da inrabiar anca per la fiastra.

LuciettaMo cara siora madre, la va in collera molto presto!

Margarita(La gh’ha squasi rason. No giara cussì una volta, son deventada una bestia. No gh’è remedio; chi sta col lovo impara a urlar).

Lunardo e dette.

Lunardo(Entra, e viene bel bello, senza parlare.)

Margarita(Velo qua per diana). (s’alza)

Lucietta(El vien co fa i gatti). (s’alza) Sior padre, patron.

MargaritaSioria. No se saludemo gnanca? (a Lunardo)

LunardoLaorè, laorè. Per farme un complimento tralassè de laorar?

LuciettaHo laorà fin adesso. Ho debotto fenio la calza.

MargaritaStago a veder, figurarse, che siemo pagae a zornada.

LunardoVu sempre, vegnimo a dir el merito, me dè sempre de ste risposte.

LuciettaMo via, caro sior padre; almanco in sti ultimi zorni de carneval, che nol staga a criar. Se no andemo in nissun liogo, pazenzia; stemo in pase almanco.

MargaritaOh, elo no pol star un zorno senza criar.

LunardoSentì che strambazza! Cossa songio? un tartaro? una bestia? De cossa ve podeu lamentar? Le cosse oneste le me piase anca a mi.

LuciettaVia donca, che el ne mena un pochetto in maschera.

LunardoIn maschera? In maschera?

Margarita(Adesso el va zoso!)

LunardoE avè tanto muso de dirme che ve mena in maschera? M’aveu mai visto mi, vegnimo a dir el merito, a metterme el volto sul muso? Coss’èla sta maschera? Per cossa se va in maschera? No me fe parlar; le putte no ha da andar in maschera.

MargaritaE le maridae?

LunardoGnanca le maridae, siora no, gnanca le maridae.

MargaritaE per cossa donca le altre, figurarse, ghe vale?

LunardoFigurarse, figurarse. Mi penso a casa mia, e no penso ai altri. (la burla del suo intercalare)

MargaritaPerchè, vegnimo a dir el merito, perchè sè un orso. (fa lo stesso)

LunardoSiora Margarita, la gh’abbia giudizio.

MargaritaSior Lunardo, no la me stuzzega.

LuciettaMo via, sia malignazo! sempre cussì. No m’importa d’andar in maschera. Starò in casa, ma stemo in bona.

LunardoNo sentìu? Vegnimo... no sentìu? La xe ela che sempre...

Margarita(Ride.)

LunardoRidè, patrona? (a Margarita)

MargaritaVe n’aveu per mal, perchè rido?

LunardoVia, vegnì qua tutte do, sentì. Delle volte anca mi gh’ho qualcossa per la testa, e par che sia fastidioso, ma ancuo son de voggia. Semo de carneval, e vôi che se tolemo la nostra zornada.

LuciettaOh magari!

MargaritaVia mo, sentimo.

LunardoSentì: voggio che ancuo disnemo in compagnia.

LuciettaDove, dove, sior padre? (con allegria)

LunardoIn casa.

LuciettaIn casa? (malinconica)

LunardoSiora sì, in casa. Dove vorressi che andessimo? all’osteria?

LuciettaSior no all’osteria.

LunardoIn casa de nissun mi no vago; mi no vago, vegnimo a dir el merito, a magnar le coste a nissun.

MargaritaVia, via, no ghe tendè. Parlè con mi, figuremose, voleu invidar qualchedun?

LunardoSiora sì. Ho invidà della zente, e i vegnirà qua, e se goderemo, e staremo ben.

MargaritaChi aveu invidà?

LunardoUna compagnia de galantomeni, tra i quali ghe ne xe do de maridai, e i vegnirà co le so parone, e staremo aliegri.

Lucietta(Via, via, gh’ho a caro). (allegra) Caro elo, chi xeli? (a Lunardo)

LunardoSiora curiosa!

MargaritaVia, caro vecchio, no volè che sappiemo chi ha da vegnir?

LunardoNo voleu che vel diga? Se sa. Vegnirà sior Cancian Tartuffola, sior Maurizio dalle Strope, e sior Simon Maroele.

MargaritaCospetto de diana! tre cai sulla giusta! I avè ben trovà ora del mazzo.

LunardoCossa vorressi dir? No i xe tre omeni co se diè?

MargaritaSior sì. Tre salvadeghi come vu.

LunardoEh, patrona, a tempo d’ancuo, vegnimo a dir el merito, a un omo che gh’ha giudizio se ghe dise un omo salvadego. Saveu perchè? Perchè vu altre donne se troppo desmesteghe. No ve contente dell’onesto; ve piaserave i chiassetti, i pacchietti, le mode, le buffonerie, i puttelezzi. A star in casa, ve par de star in preson. Co i abiti no costa assae, no i xe belli; co no se pratica, ve vien la malinconia, e no pensè al fin; e no gh’avè un fià de giudizio, e ascoltè chi ve mette su, e no ve fa specie sentir quel che se dise de tante case, de tante fameggie precipitae; chi ve dà drio se fa menar per lengua, se fa metter sui ventoli, e chi vol viver in casa soa con riguardo, con serietà, con reputazion, se ghe dise, vegnimo a dir el merito, seccaggine, omo rustego, omo salvadego. Parlio ben? Ve par che diga la verità?

MargaritaMi no vôi contender; tutto quel che volè. Vegnirà donca a disnar con nu siora Felice e siora Marina.

LunardoSiora sì. Cussì, vedeu? me piase anca mi praticar. Tutti col so matrimonio. Cussì no ghe xe sporchezzi, no ghe xe, vegnimo a dir el merito... Cossa steu a ascoltar? Adesso no se parla con vu. (a Lucietta)

LuciettaXele cosse che mi no possa sentir? (a Lunardo)

Lunardo(No vedo l’ora de destrigarmela). (piano a Margarita)

Margarita(Come va quel negozio?) (piano a Lunardo)

Lunardo(Ve conterò). (piano a Margarita) Andè via de qua. (a Lucietta)

LuciettaCossa ghe fazzio?

LunardoAndè via de qua.

LuciettaDe diana! el xe impastà de velen.

LunardoAndè via, che ve dago una schiaffazza in tel muso.

LuciettaSéntela, siora madre?

MargaritaVia, co! v’ha ditto che andè, obedì. (con caldezza)

Lucietta(Oh, se ghe fusse mia mare bona! Pazenzia, se me vegnisse un scoazzer, lo torìa). (parte)

Lunardo e Margarita.

MargaritaCaro sior Lunardo, sul so viso no ghe dago rason, ma in verità sè troppo rustego con quella putta.

LunardoVedeu? vu no savè gnente. Ghe voggio ben, ma la tegno in timor.

MargaritaE mai che ghe dessi un devertimento.

LunardoLe putte le ha da star a casa, e no le se mena a torziando.

MargaritaAlmanco una sera a la comedia.

LunardoSiora no. Vôi poder dir, co la marido: tolè, sior, ve la dago, vegnimo a dir el merito, che no la s’ha mai messo maschera sul viso; che no la xe mai stada a un teatro.

MargaritaE cussì, valo avanti sto maridozzo?

LunardoGh’aveu dito gnente a la putta?

MargaritaMi? gnente.

LunardoVardè ben, vede.

MargaritaNo in verità, ve digo.

LunardoMi credo, vede, mi credo d’averla maridada.

MargaritaCon chi? se porlo saver?

LunardoZitto, che gnanca l’aria lo sappia. (guarda intorno) Col fio de sior Maurizio.

MargaritaCo sior Filippetto?

LunardoSì, zitto, no parlè.

MargaritaZitto, zitto, de diana! xelo qualche contrabando?

LunardoNo voggio che nissun sappia i fatti mi.

MargaritaSe faralo presto?

LunardoPresto.

MargaritaL’alo fatta domandar?

LunardoNo pensè altro. Ghe l’ho promessa.

MargaritaAnca promessa ghe l’ave? (con ammirazione)

LunardoSiora sì, ve feu maraveggia?

MargaritaSenza dir gnente?

LunardoSon paron mi.

MargaritaCossa ghe deu de dota?

LunardoQuello che voggio mi.

MargaritaMi son una statua, donca. A mi, figurarse, no se me dise gnente.

LunardoFigurarse, figurarse, no ve lo dighio adesso?

MargaritaSior sì, e la putta quando lo saverala?

LunardoCo la se sposerà.

MargaritaE no i s’ha da véder avanti?

LunardoSiora no.

MargaritaSeu seguro che el gh’abbia da piaser?

LunardoSon paron mi.

MargaritaBen ben, la xe vostra fia. Mi no me n’impazzo; fe pur quel che volè vu.

LunardoMia fia no vôi che nissun possa dir d’averla vista, e quel che la vede, l’ha da sposar.

MargaritaE se col la vede, nol la volesse?

LunardoSo pare m’ha dà parola.

MargaritaOh che bel matrimonio

LunardoCossa voressi? che i fasse prima l’amor?

MargaritaI batte, i batte; vago a veder chi è.

LunardoNo ghe xe la serva?

MargaritaLa xe a far i letti, anderò a veder mi.

LunardoSiora no. No vôi che andè sul balcon.

MargaritaVardè che casi!

LunardoNo vôi che gh’andè, gh’anderò mi. Comando mi, vegnimo a dir el merito, comando mi. (parte)

Margarita, poi Lunardo.

MargaritaMo che omo, che m’ha toccà! no gh’è el compagno sotto la cappa del cielo. E po el me stuffa con quel so vegnimo a dir el merito; debotto, figurarse, no lo posso più sopportar.

LunardoSaveu chi xe?

MargaritaChi?

LunardoSior Maurizio.

MargaritaEl pare del novizzo?

LunardoTasè. Giusto elo.

MargaritaVienlo per stabilir?

LunardoAnde de là.

MargaritaMe mandè via?

LunardoSiora sì; andè via de qua.

MargaritaNo volè che senta?

LunardoSiora no.

MargaritaVardè, vedè! cossa songio mi?

LunardoSon paron mi.

MargaritaNo son vostra muggier?

LunardoAndè via de qua, ve digo.

MargaritaMo che orso che sè!

LunardoDestrigheve.

MargaritaMo che satiro! (incamminandosi a piano)

LunardoLa fenimio? (con isdegno)

MargaritaMo che bestia de omo! (parte)

Lunardo, poi Maurizio.

LunardoLa xe andada. Co le bone no se fa gnente. Bisogna criar. Ghe voggio ben assae, ghe ne voggio assae; ma in casa mia no gh’è altri paroni che mi.

MaurizioSior Lunardo, patron.

LunardoBondì sioria, sior Maurizio.

MaurizioHo parlà con mio fio.

LunardoGh’aveu ditto, che el volè maridar?

MaurizioGhe l’ho ditto.

LunardoCossa diselo?

MaurizioEl disc che el xe contento, ma el gh’averave gusto de véderla.

LunardoSior no, questi no xe i nostri patti. (con isdegno)

MaurizioVia, via, no andè in collera, che el putto farà tutto quello che voggio mi.

LunardoCo volè, vegnimo a dir el merito, la dota xe parecchiada. V’ho promesso sie mile ducati, e sie mile ducati ve dago. Li voleu in tanti zecchini, i tanti ducati d’arzento, o voleu che ve li scriva in banco? comandè.

MaurizioI bezzi mi no li voggio. O zireme un capital de zecca; o investimeli meggio che se pol.

LunardoSì ben; faremo tutto quel che volè.

MaurizioNo stè a spender in abiti, che no voggio.

LunardoMi ve la dago come che la xe.

MaurizioGh’ala roba de sea?

LunardoLa gh’ha qualche strazzetto.

MaurizioIn casa mia no voggio sea. Fin che son vivo mi, l’ha da andar co la vesta de lana, e no vôi nè tabarini, nè scuffie, né cerchi, nè toppe, nè cartoline sul fronte.

LunardoBravo, sieu benedetto. Cussì me piase anca mi. Zoggie ghe ne feu.

MaurizioGhe farò i so boni manini d’oro, e la festa ghe darò un zoggielo, che giera de mia muggier, e un per de recchinetti de perle.

LunardoSì ben, sì ben, e no stessi a far la minchioneria de far ligar sta roba alla moda.

MaurizioCredeu che sia matto? Coss’è sta moda? Le zoggie le xe sempre alla moda. Cossa se stima? i diamanti, o la ligadura?

LunardoE pur al dì d’ancuo, vegnimo a dir el merito, se butta via tanti bezzi in ste ligadure.

MaurizioSior sì; fe ligar ogni diesanni le zoggie, in cao de cent’anni l’ave comprae do volte.

LunardoGhe xe pochi, che pensa come che pensemo nu.

MaurizioE ghe xe pochi, che gh’abbia dei bezzi come che gh’avemo nu.

LunardoI dise mo, che nu no savemo goder.

MaurizioPoverazzi! ghe védeli drento del nostro cuor? Crédeli che no ghe sia altro mondo, che quello che i gode lori? Oh compare, el xe un bel gusto el poder dir gh’ho el mio bisogno, no me manca gnente, e in t’una occorrenza posso metter le man su cento zecchini!

LunardoSior sì, e magnar ben, dei boni capponi, delle bone polastre, e dei boni straculi de vedèlo.

MaurizioE tutto bon, e a bon marca, perchè se paga de volta in volta.

LunardoE a casa soa; senza strepiti, senza sussuri.

MaurizioE senza nissun che v’intriga i bisi.

LunardoE nissun sa i fatti nostri.

MaurizioE semo paroni nu.

LunardoE la muggier no comanda.

MaurizioE i fìoi sta da fioi.

LunardoE mia fia xe arlevada cussì.

MaurizioAnca mio fio xe una perla. No gh’è pericolo che el butta via un bagatin.

LunardoLa mia putta sa far de tutto. In casa ho volesto che la fazza de tutto. Fina lavar i piatti.

MaurizioE a mio fio, perchè no veggio che co le serve el se ne impazza, gh’ho insegna a tirar suso i busi delle calze, e metter i fondèli alle braghesse.

LunardoBravo. (ridendo)

MaurizioSì dasseno. (ridendo)

LunardoVia femolo sto sposalizio; destrighemose. (fregandosi le mani, e ridendo.)

MaurizioCo volè, compare. (come sopra)

LunardoAncuo v’aspetto a disnar con mi. Za savè che ve l’ho ditto. Gh’ho quattro lattesini, vegnimo a dir el merito, ma tanto fatti.

MaurizioI magneremo.

LunardoSe goderemo.

MaurizioStaremo aliegri.

LunardoE po i dirà che semo salvadeghi!

MaurizioPuffe !

LunardoMartuffi!

Camera in casa del signor Simon.

Marina e Filippetto.

MarinaCoss’è, nevodo? Che miracolo, che me vegnì a trovar?

FilippettoSon vegnù via de mezzà, e avanti de andar a casa, son vegnù un pochettin a saludarla.

MarinaBravo, Filippetto; ave fatto ben. Senteve, voleu marendar?

FilippettoGrazie, sior’amia. Bisogna che vaga a casa; che se sior padre no me trova, poveretto mi.

MarinaDiseghe che se stà da vostra amia Marina, cossa diralo?

FilippettoSe la savesse! nol tase mai, nol me lassa mai un momento de libertà.

MarinaEl fa ben da una banda. Ma da vostr’amia el ve doverave lassar vegnir.

FilippettoGhe l’ho ditto; nol vol che ghe vegna.

MarinaMo el xe ben un satiro compagno de mio mario.

FilippettoSior barba Simon ghe xelo in casa?

MarinaNol ghe xe, ma no pol far che el vegna.

FilippettoAnca elo, co el me vedè, co vegno qua, el me cria.

MarinaLasse che el diga. La sarave bella. Sè mio nevodo. Sè fio de una mia sorella; quella poverazza xe morta, e posso dir, che no gh’ho altri a sto mondo che vu.

FilippettoNo vorave che, per causa mia, el ghe criasse anca a ela.

MarinaOh per mi, fio mio, no ve tolè sto travaggio. Se el me dise tantin, mi ghe respondo tanton. Poveretta mi, se no fasse cussì. Su tutto el cateria da criar. No credo che ghe sia a sto mondo un omo più rustego de mio mario.

FilippettoPiù de sior padre?

MarinaNo so, vedè, la batte là.

FilippettoMai, mai, dopo che son a sto mondo, nol m’ha mai dà un minimo spasso. El dì da laorar a mezzà e a casa. La festa a far quel che va fatto, e po subito a casa. El me fa compagnar dal servitor, e ghe n’ha volesto a persuader el servitor a menarme qua stamattina. Mai una volta alla Zuecca, mai a Castello, mi no credo de esser passà in vita mia tre o quattro volte per Piazza: quel che el fa elo, el vol che lazza anca mi. La sera fina do ore se stà in mezza, se cena, se va in letto, e bondì sioria.

MarinaPovero putto, dasseno me fe peccà. Xe vero; la zoventù bisogna tegnirla in fren, ma el troppo xe troppo.

FilippettoBasta; no so, se da qua avanti l’anderà cussì.

MarinaSé in ti anni della discrezion, el ve doverave dar un pochetto de libertà.

FilippettoSala gnente, sior’amia?

MarinaDe cossa?

FilippettoNoi gh’ha ditto gnente sior padre?

MarinaOh xe un pezzo, che no lo vedo.

FilippettoNo la sa gnente donca.

MarinaNo so gnente. Cossa ghe xe de niovo?

FilippettoSe ghe lo digo, ghe lo dirala a sior padre?

MarinaNo, no v’indubitè.

FilippettoLa varda ben, la veda.

MarinaVe digo de no, ve digo.

FilippettoLa senta, el me vuol maridar.

MarinaDasseno?

FilippettoEl me l’ha ditto elo.

MarinaAlo trovà la novizza?

FilippettoSiora sì.

MarinaChi xela?

FilippettoGhe lo dirò, ma cara ela, la tasa.

MarinaMo via, debotto me fe rabbia. Cossa credeu che sia?

FilippettoLa xe fia de sior Lunardo Crozzola.

MarinaSì, sì, la cognosso. Cioè, no la cognosso ela, ma cognosso so maregna, siora Margarita Salicola, che ha sposà sior Lunardo, e el xe amigo de mio mario, un salvadego co fa elo. Mo i s’ha ben cattà, vede, el padre del novizzo col padre della novizza. L’aveu vista la putta?

FilippettoSiora no.

MarinaAvanti de serrar el contratto, i ve la farà veder.

FilippettoMi ho paura de no.

MarinaOh bella! e se no la ve piase?

FilippettoSe no la me piase, mi no la togo per diana.

MarinaSarave meggio che la vedessi avanti.

FilippettoCome vorla che fazza?

MarinaDiseghelo a vostro sior padre.

FilippettoGhe l’ho dito, e el m’ha dà su la ose.

MarinaSe savesse come far, vorave farvelo mi sto servizio.

FilippettoOh magari!

MarinaMa anca quel orso de sior Lunardo nol la lassa veder da nissun so fia.

FilippettoSe se podesse, una festa...

MarinaZitto, zitto, che xe qua mio mario.

FilippettoVorla che vaga via?

MarinaFermeve.

Simon e detti.

Simon(Cossa falò qua sto frascon?)

FilippettoPatron, sior barba.

SimonSioria. (bruscamente)

MarinaUn bel accetto, che ghe fe a mio nevodo!

SimonMi v’ho tolto co sto patto, che in casa mia parenti no ghe ne voggio.

MarinaVare! ve vienli a batter alla porta, e a domandarve qualcossa i mi parenti? No i gh’ha bisogno de vu, sior; in cao de tanto, vien mio nevodo a trovarme, e ancora me brontolè? Gnanca se fussimo taggialegni, gnanca se fussimo dalle vallade. Vu sè un omo civil? Sè un tangaro, compatime.

SimonAveu gnancora fenio? Stamattina no gh’ho voggia de criar.

MarinaNo lo podè véder mio nevodo? Cossa v’alo fatto?

SimonNol m’ha fatto gnente; ghe veggio ben; ma savè che in casa mia no gh’ho gusto che ghe vegna nissun.

FilippettoChe nol se indubita, che no ghe vegnirò più.

SimonMe farè servizio.

MarinaE mi vôi che el ghe vegna.

SimonE mi no vôi che el ghe vegna.

MarinaSta sorte de cosse no me le avè da impedir.

SimonTutto quello che no me piase, ve lo posso, e ve lo voggio impedir.

FilippettoPatron. (in atto di partire)

MarinaAspettè. (a Filippetto) Cossa gh’aveu co sto putto?

SimonNo lo voggio.

MarinaMo per cossa?

SimonPer cossa, o per gamba, no vôi nissun.

FilippettoSior’amia, la me lassa andar via.

MarinaAndè, andè, nevodo. Vegnirò mi da vostro sior padre.

FilippettoPatrona; patron, sior barba.

SimonSioria.

Filippetto(Oh el ghe pol a mio padre, el xe più rustego diese volte).

Marina e Simon.

MarinaVardè che sesti! cossa voleu che el diga quel putto!

SimonLo savè pur el mio temperamento. In casa mia voggio la mia libertà.

MarinaChe intrigo ve davelo mio nevodo?

SimonGnente. Ma no voggio nissun.

MarinaPerchè no andeu in te la vostra camera?

SimonPerchè voggio star qua.

MarinaIn verità, che sè caro. Aveu manda la spesa?

SimonSiora no.

MarinaNo se disna ancuo?

SimonSiora no.

MarinaNo se disna?

SimonSiora no. (più forte)

MarinaGhe mancarave anca questa, che andessi in collera anca col disnar.

SimonZa, chi ve sente vu, mi son un strambo, un alocco.

MarinaMa ancuo perchè no se disna?

SimonPerchè avemo da andar a disnar fora de casa. (con malagrazia)

MarinaE mel disè co sta bona grazia?

SimonMe fe vegnir suso el mio mal.

MarinaCaro mario, compatime, gh’avè un natural, che delle volte fe rabbia.

SimonNo lo cognosseu el mio natural? Co lo cognossè, cossa feu ste scene?

Marina(Ghe vol una gran pazienzia). Dove andemio a disnar?

SimonVegnirè con mi.

MarinaMa dove?

SimonDove che ve menerò mi.

MarinaPer cossa no voleu che lo sappia?

SimonCossa importa che lo sappiè? Co sè co vostro mario, no stè a cercar altro.

MarinaIn verità, me parè matto. Bisogna ben che sappia dove che s’ha da andar, come che m’ho da vestir, che zente ghe xe. Se ghe xe suggizion, no voggio miga andar a farme smattar.

SimonDove che vago mi, sè segura che no ghe xe suggizion.

MarinaMa con chi andemio?

SimonVegnirè con mi.

MarinaMo la xe mo curiosa lu!

SimonMo la xe curiosa seguro.

MarinaHo da vegnir senza saver dove?

SimonPatrona sì.

MarinaMuème el nome se ghe vegno.

SimonE vu resterà a casa senza disnar.

MarinaAnderò da mio cugnà Maurizio.

SimonSior Maurizio vostro cugnà anderà a disnar dove che anderemo nu.

MarinaMa dove?

SimonVegnì con mi, che lo saverè. (parte)

Marina, poi Felice, Canciano ed il Conte Riccardo.

MarinaMo caro! mo siestu benedetto! mo che bona grazia che el gh’ha! I batte. Oe, vardè che i batte. (alla scena) La xe una cossa da far rider i capponi. Ho d’andar a disnar fora de casa senza saver dove? Gh’averave anca voggia de andarme a devertir un pochetto, ma senza saver dove, no vago. Se savesse come far a saverlo. Oh chi xe qua? Siora Felice! Chi xe con ela? Uno xe quel scempio de so mario. E quell’altro chi mai xelo? Eh, ela la gh’ha sempre qualchedun che la serve. So mario xe della taggia del mio; ma Felice no se tol suggizion; la la vol a so modo, e quel poverazzo ghe va drio, come un can barbon. Me despiase de mio mario. Cossa diralo, se el vede tutta sta zente? Oe! che el diga quel che el vol; mi no li ho fatti vegnir. Male grazie no ghe ne vôi far.

FelicePatrona, siora Marina.

MarinaPatrona, siora Felice. Patroni riveriti.

CancianoPatrona. (malinconico)

RiccardoServitore umilissimo della signora. (a Marina)

MarinaServa sua. Chi xelo sto signor? (a Felice)

FeliceUn conte, un cavalier forestier, un amigo de mio mario; nevvero, sior Cancian?

CancianoMi no so gnente.

RiccardoBuon amico, e buon servitore di tutti.

MarinaCol xe amigo de sior Cancian, nol pol esser che una persona de merito.

CancianoMi ve digo, che no so gnente.

MarinaCome no saveu gnente, se el vien con vu in casa mia?

CancianoCon mi?

FeliceMo con chi donca? Caro sior Conte, la compatissa. Semo de carneval, sala; mio mario se deverte un pochetto. El vol far taroccar siora Marina: nevvero, sior Cancian?

Canciano(Bisogna che inghiotta).

Marina(Oh, co furba che xe custìa!) Vorle sentarse? Le se comoda.

FeliceSì, sentemose un pochettin. (siede) La se comoda qua, sior Conte.

RiccardoLa fortuna meglio non mi potea collocare.

CancianoE mi dove m’oi da sentar?

FeliceAnde là, arente siora Marina. (a Canciano)

MarinaNo, cara fia, che se vien mio mario, poveretta mi. (piano a Felice)

FeliceVardè là; no ghe xe delle careghe? (a Canciano)

CancianoEh siora sì, la ringrazio. (siede in disparte)

RiccardoAmico, se volete seder qui, siete padrone; non facciamo cerimonie. Io andrò dall’altra parte, presso della signora Marina. (a Canciano)

MarinaSior no, sior no, no la s’incomoda. (a Riccardo)

FelicePer cossa disela ste freddure? Credela fursi, che mio mario sia zeloso? Oe, sior Cancian, defendeve. Sentì, i ve crede zeloso. Me maraveggio de ela, sior Conte. Mio mario xe un galantomo, el sa che muggier che el gh’ha, no! patisse sti mali, e se el li patisse, ghe li farave passar. La saria bella che una donna civil no podesse trattar onestamente un signor, una persona pulita che vien a Venezia per sti quattro zorni de carneval, che me xe stada raccomandada da un mio fradelo che xe a Milan? Cossa diseu. Marina, no saravela una inciviltà? No saravela un’asenaria? Mio mario no xe de sto cuor, el gh’ha ambizion de farse merito, de farse onor, el gh’ha gusto che so muggier se deverta, che la fazza bona figura, che la staga in bona conversazion. Nevvero, sior Cancian?

CancianoSiora sì. (masticando)

RiccardoPer dire la verità, io ne avea qualche dubbio; ma poichè voi mi disingannate, ed il signor Canciano il conferma, vivrò quietissimo, e mi approfitterò dell’onor di servirvi.

Canciano(Son stà mi una bestia, a receverlo in casa la prima volta).

MarinaStala un pezzo, sior Conte, a Venezia?

RiccardoAveva intenzione di starci poco; ma sono tanto contento di questa bella città, che prolungherò il mio soggiorno.

Canciano(Pussibile che el diavolo no lo porta via?)

FeliceE cussì, siora Marina, ancuo disneremo insieme.

MarinaDove?

FeliceDove? no lo savè dove?

MarinaMio mario m’ha ditto qualcossa de sto disnar, ma el logo nol me l’ha ditto.

FeliceDa siora Margarita.

MarinaDa sior Lunardo?

FeliceSì ben.

MarinaAdesso ho capio. Fai nozze?

FeliceChe nozze?

MarinaNo savè gnente?

FeliceMi no. Conteme.

MarinaOh, novità grande.

FeliceDe chi? De Ludetta?

MarinaSì ben; ma, zitto.

FeliceCara vu, conteme. (si tira appresso a Marma)

MarinaSénteli? (accennando Riccardo e Conciano)

FeliceSior Riccardo, la ghe diga qualcossa a mio mario, la ghe vaga arente; la fazza un poco de conversazion anca con elo, el gh’ha gusto che i parla con so muggier, ma nol vol mo gnanca elo esser lassà in t’un canton. Nevvero, sior Cancian?

CancianoEh, nol s’incomoda, che no me n’importa. (a Riccardo)

RiccardoAnzi avrò piacere di discorrere col signor Canciano. Lo pregherò informarmi di alcune cose. (si accosta a Canciano)

Canciano(El sta fresco).

FeliceE cussì? (a Marina)

MarinaAnde là, che sè una gran diavola. (a Felice)

FeliceSe no fasse cussì, morirave etica con quel mio mario.

MarinaE mi?...

FeliceDiseme, diseme. Cossa gh’è de Lucietta?

MarinaVe dirò tutto: ma a pian, che nissun ne senta. (parlano piano)

RiccardoSignore, parmi che voi mi badiate poco, (a Canciano)

CancianoLa compatissa, gh’ho tanti intrighi per mi, che no posso tormene per i altri.

RiccardoBene dunque, non v’incomoderò più. Ma quelle signore parlano segretamente fra di loro; diciamo qualche cosa; facciamo conversazion fra di noi.

CancianoCossa vorla che diga? Mi son omo de poche parole; no stago su le novità, e no amo troppo la conversazion.

Riccardo(È un bel satiro costui).

FeliceNol l’ha vista? (a Marina)

MarinaNo, e no i vol che el la veda.

FeliceMo questo el xe un gran codogno.

MarinaSe savessi? pagheria qualcosa de bello che el la vedesse, avanti de serrar el contratto.

FeliceIn casa nol ghe pol andar?

MarinaOh gnanca per insonio.

FeliceNo se poderia coll’occasion delle maschere?...

MarinaDisè a pian, che i ne sente.

FeliceVia, che i tenda ai fatti soi. Che no i staga a spionar; che i parla, che parlemo anca nu. (a Riccardo) Sentì cossa che me vien m testa. (a Marina, e si parlano piano)

RiccardoDove si va questa sera?

CancianoA casa.

RiccardoE la signora?

CancianoA casa.

RiccardoFate conversazione?

CancianoSior sì. In letto.

RiccardoIn letto? A che ora?

CancianoA do ore.

RiccardoEh, mi burlate.

CancianoSì anca da so servitor.

Riccardo(Sono male impicciato, per quel ch’io vedo).

FeliceCossa diseu? ve piasela? (a Marina)

MarinaSì ben; cussì andarave pulito. Ma no so come far a parlar con mio nevodo. Se el mando a chiamar, mio mario va in bestia.

FeliceMandeghe a dir, che el vegna da mi.

MarinaE so pare?

FeliceNo valo anca elo a disnar da sior Lunardo? Col xe fora de casa, che el vegna; lasseme el travaggio a mi.

MarinaE po?...

FeliceE po, e po! dopo el Po vien l’Adese. Lasseme far a mi, ve digo.

MarinaAdessadesso lo mando a avisar.

FeliceCoss’è, seu muti? (a Riccardo e Canciano)

RiccardoIl signor Canciano non ha volontà di parlare.

FeliceGramazzo! el gh’averà qualcossa per la testa. El xe pien d’interessi: el xe un omo de garbo, sala, mio mario.

RiccardoDubito stia poco bene.

FeliceDasseno? Oh poveretta mi; me despiaserave assae. Cossa gh’aveu, sior Cancian?

CancianoNiente.

FelicePer cossa diselo che el gh’ha mal? (a Riccardo)

RiccardoPerchè ha detto che vuol andar a dormire a due ore di notte.

FeliceDasseno? Fe ben a governarve, fio mio. (a Canciano)

CancianoMa ghe vegnirè anca vu.

FeliceOh, aponto, no v’arecordè che avemo da andar a l’opera?

CancianoA l’opera mi no ghe vago.

FeliceCome? Questa è la chiave del palco; me l’avè pur comprada vu. (a Conciano)

CancianoL’ho comprada... l’ho comprada, perchè m’ave incinganà; ma a l’opera mi no ghe vago, e no gh’avè d’andar gnanca vu.

FeliceOh caro! el burla, sala? El burla, savè, Marina? El mio caro mario me vol tanto ben, el m’ha comprà el palco, e el vegnirà a l’opera con mi: nevvero, fio? (Senti sa, no me far el matto, che poveretto ti). (piano a Conciano)

Marina(O che gaina!)

FeliceVorla restar servida con mi? Ghe xe logo in tel palco: nevvero, sior Cancian? (a Riccardo)

Canciano(Siestu maledetta! La me fa far tutto quel che la vol).

Simon e detti.

SimonMarina. (bruscamente)

MarinaSior.

Simon(Cossa xe sto baccan? Cossa vorli qua? Chi xelo colù?) (accenna Riccardo)

FeliceOh, sior Simon, la reverisso.

SimonPatrona. (a Felice) Ah? (a Marina)

FeliceSemo vegnui a farve una visita.

SimonA chi?

FeliceA vu. Nevvero, sior Cancian?

CancianoSiora sì. (a mezza bocca)

SimonAndè via de qua, vu. (a Marina)

MarinaVolè che usa una mala creanza?

SimonLasseme el pensier a mi, andè via de qua.

FeliceVia, Marina, obbedìlo vostro mario: anca mi, vede, co sior Cancian me dise una cossa, la fazzo subito.

MarinaBrava, brava, ho capìo. Patroni.

RiccardoUmilissima riverenza. (a Marina)

SimonPatron. (ironico al Conte)

MarinaServa sua. (fa la riverenza al Conte)

SimonPatrona. (contrafà la riverenza)

Marina(Taso, perchè, perchè: ma sta vita no la voggio far). (parte)

SimonChi èlo sto sior? (a Felice)

FeliceDomandeghelo a mio mario.

RiccardoSe volete saper chi sono, ve lo dirò io, senza che fatichiate per domandarlo. Io sono il conte Riccardo degli Arcolai, cavaliere d’Abruzzo; son amico del signor Canciano, e buon servidore della signora Felice.

SimonE vu lassè praticar vostra muggier co sta sorte de cai? (a Canciano)

CancianoCossa voleu che fazza?

SimonPuffeta! (parte)

FeliceVedeu che bella creanza che el gh’ha? El n’ha impiantà qua senza dir sioria bestia. Védela, sior Conte, la differenza? Mio mario xe un omo civil; nol xe capace de un’azion de sta sorte. Me despiase, che a disnar con nu ancuo no la podemo menar. Ma ghe dirò po mi un no so che per dopo disnar, e sta sera anderemo a l’opera insieme. Nevvero, sior Cancian?

CancianoMa mi ve digo...

FeliceEh via, vegnì qua, sior pampalugo. (prende per un braccio Conciano, per l’altro Riccardo, e partono.)

Fine dell’Atto Primo.

Camera in casa di Lunardo.

Margarita vestita con proprietà, e Lucietta.

LuciettaBrava, siora madre. Mo co pulito che la s’ha vestìo.

MargaritaCossa voleu, cara fia? Se vien sta zente ancuo, voleu che staga, figurarse, co fa una massera?

LuciettaE mi che figura vorla che fazza?

MargaritaVu da putta stè ben.

LuciettaEh sì sì, stago ben! Co no son ammalada, stago ben.

MargaritaMi no so cossa dir, cara fia. Se podesse, me piaserave anca a mi che gh’avessi el vostro bisogno; ma savè chi xe vostro pare. Con elo no se pol parlar. Se ghe digo de farve qualcossa, el me salta ai occhi. El dise che le putte le ha da andar desmesse; el me sa dir, che ve metto su; e mi, per no sentir a criar, no me n’impazzo; lasso che e fazza elo. Finalmente no sè mia fia, no me posso tor certe boniman.

LuciettaEh lo so, lo so, che no son so fia. (mortificata)

MargaritaCossa voressi dir? No ve voggio ben fursi?

LuciettaSiora sì, la me ne vol; ma no la se scalda gnente per mi. Se fusse so fia, co vien zente de suggizion, no la lasserave miga che stasse co la traversa davanti.

MargaritaVia, cavèvela la traversa.

LuciettaE po, co me l’averò cavada?

MargaritaCo ve l’avere cavada, figurarse, no la gh’averè più.

LuciettaEh za! credela che no sappia, che la me burla.

MargaritaMe fe da rider. Cossa vorressi?

LuciettaVorave anca mi comparir co fa le altre.

MargaritaDiseghelo a vostro padre. Voleu che manda a chiamar un sartor in scondon, e che ve fazza un abito? E po? xelo orbo sior Lunardo? Credeu, figurarse, che nol ve l’abbia da veder?

LuciettaMi no digo un abito; ma qualcossa almanco. La varda; no gh’ho gnanca un fià de cascate. Gh’ho sto strasso de goliè da collo, che me vergogno. El xe antico co fa mia nonna. Per casa co sto abito no stago mal; ma ghe vorria, cussì, qualcossa che paresse bon. Son zovene, e no son mo gnanca una pitocca; me par che qualche bagatella no la me desdiga.

MargaritaAspettè. Se volè un per de cascate, ve le darò mi delle mie. Voleu una collana de perle?

LuciettaMagari.

MargaritaAdesso ve la vago a tor. (Poverazza! la compatisso. Nualtre donne, figurarse, semo tutte cussì). (parte)

Lucietta e detta.

LuciettaVardè! la dise che mio sior padre no vol. Credo che la sia ela mi, che no voggia. Xe vero che sior padre xe un omo rustego, e che in casa nol vol certe belle cosse, ma ela però la s’ha savesto vestir, e co la vol un abito, la se lo fa, e la lassa che el diga. Ma per mi, poverazza, no se ghe pensa. Maregna, basta cussì. E po la cognosso, la gh’ha rabbia con mi, perchè son più zovene e più bella de ela. In casa ghe fazzo fastidio. La me dise fia co la bocca stretta; co ghe digo siora madre, la gh’ha paura che ghe fazza crescer i anni.

MargaritaVia, caveve quella traversa.

LuciettaSiora sì, subito. (si cava il grembiale)

MargaritaVegnì qua, che ve metterò le cascate.

LuciettaCara ela, la lassa véder.

MargaritaVardè; le xe squasi nove.

LuciettaCossa vorla che fazza de sti scovoli da lavar i piatti?

MargaritaScovoli ghe disè? Un per de cascate de cambrada, che no le ho doperae quattro volte.

LuciettaNo la vede co fiappe che le xe?

MargaritaVardè che desgrazia! certo che i ve vegnirà a vardar le cascate, se le xe de lissìa.

LuciettaLe soe però le xe nere.

MargaritaChe cara siora! ve voressi metter co mi? Queste xe le cascate: se le volè, mettevele: se ghe ne volè de meggio, cattevene.

LuciettaVia, no la vaga in collera, che me le metterò.

MargaritaVegnì qua. Za co ste spuzzette, più che se fa, se fa pezo. (mettendole le cascate)

LuciettaCerto! la fa assae per mi. (accomodandosi le cascate)

MargaritaFazzo più de quel che me tocca. (come sopra)

LuciettaCara ela, che no la se struppia. (come sopra)

MargaritaSè ben insolente sta mattina. (come sopra, tirandola)

LuciettaMo via, no la me staga a strascinar, che no son miga una bestia.

MargaritaNo no, no v’indubitè, che no ve vegnirò più intorno. Sè troppo delicata, siora. Feve servir da la serva, che con vu no me ne voggio impazzar.

LuciettaCh’ala le perle?

MargaritaNo so gnente: no voggio più mustazzae.

LuciettaVia mo, cara ela.

MargaritaMatta inspiritada che son, a deventar matta co sta frascona.

Lucietta(Piange, e si asciuga col fazzoletto.)

MargaritaCoss’è sta? cossa gh’aveu?

Lucietta(Come sopra.)

MargaritaPianzè? cossa v’oggio fatto?

LuciettaLa m’ha ditto... de darme... una collana de perle... e no la me la vol... più dar. (piangendo)

MargaritaMo se me fe andar in collera.

LuciettaMe la dala?

MargaritaVia, vegnì qua. (le vuol mettere la collana)

LuciettaLa lassa veder.

MargaritaTrovereu da dir anca in questo? Lassè, lassè che ve la zola<ref>Ch’io ve l’allacci. [nota originale]

LuciettaLa sarà qualche antigaggia. (piano, brontolando)

MargaritaCossa diseu? (allacciando la collana)

LuciettaGnente.

MargaritaSempre brontolè. (conìe sopra)

LuciettaLa varda: una perla rotta. (si trova una perla rotta in seno)

MargaritaE cussì? cossa importa? Slarghele un pochettin.

LuciettaXele tutte rotte?

MargaritaDebotto me faressi dir...

LuciettaQuanti anni gh’ala sta collana?

MargaritaVoleu zogar, che ve la cavo e la porto via?

LuciettaDe diana! sempre la cria.

MargaritaMo se no ve contente mai.

LuciettaStaghio ben?

MargaritaStè benissimo.

LuciettaMe fala ben al viso?

MargaritaPulito, ve digo, pulito. (La gh’ha un’ambizion maledettonazza).

Lucietta(No ghe credo gnente, me vôi vardar). (tira fuori di tasca uno specchietto.)

MargaritaEl specchio gh’avè in scarsella?

LuciettaOh, el xe un strazzeto.

MargaritaSe vostro sior padre ve lo vede!

LuciettaVia, no la ghe lo staga a dir.

MargaritaVelo qua, vede, che el vien.

LuciettaSia malignazo! No m’ho gnanca podesto veder ben. (mette via lo specchio)

Lunardo e dette.

LunardoCoss’è, siora? andeu al festin? (a Margarita)

MargaritaTolè. Velo qua. Me vesto una volta a l’anno, e el brontola. Aveu paura, figurarse, che ve manda in malora?

LunardoMi no m’importa che fruessi, vegnimo a dir el merito, anca un abito a la settimana. Grazie al cielo, no son de quei omeni che patissa la spienza. Cento ducati li posso spender, ma no in ste buffonerie; cossa voleu che diga quei galantomeni che vien da mi? Che sè la piavola de Pranza? No me vôi far smattar.

Lucietta(Gh’ho gusto in verità, che el ghe diga roba).

MargaritaCome credeu che vegnirà vestie quelle altre? Co una scarpa e un zoccolo?

LunardoLassè che le vegna come che le vol. In casa mia no s’ha mai pratica de ste cargadure, e no vôi scomenzar, e no me vôi far metter sui ventoli. M’aveu capio?

LuciettaDasseno, sior padre, ghe l’ho ditto anca mi.

LunardoSenti, sa, no tor esempio da ela... Coss’è quella roba? Cossa xe quei diavolezzi che ti gh’ha al collo? (a Lucietta)

LuciettaEh gnente, sior padre. Una strazzeria, un’antigaggia.

LunardoCavete quelle perle.

MargaritaDasseno, sior Lunardo, che ghe l’ho ditto anca mi.

LuciettaVia, caro elo, semo de carneval.

LunardoCossa s’intende? che siè in maschera? No voggio sti puttelezzi. Ancuo vien zente; se i ve vede, no voggio che i diga che la fia xe matta, e che el pare no gh’ha giudizio. Dà qua quelle perle. (va per levarle, ella si difende) Cossa xe quei sbrindoli? Cascate, patrona? cascate? Chi v’ha dà quei sporchezzi?

LuciettaMe l’ha dae siora madre.

LunardoDonna matta! cussì pulito arlevè mia fia? (a Margarita)

MargaritaSe no la contento, la dise che la odio, che no ghe vôi ben.

LunardoDa quando in qua ve xe vegnù in testa sti grilli? (a Lucietta)

LuciettaL’ho vista ela vestìa, me xe vegnù voggia anca a mi.

LunardoSentìu? Questa xe la rason del cattivo esempio. (a Margarita)

MargaritaEia xe putta, e mi son maridada.

LunardoLe maridae ha da dar bon esempio alle putte.

MargaritaMi no m’ho maridà, figurarse, per vegnir a deventar matta coi vostri fioi.

LunardoNé mi v’ho tolto, vegnimo a dir el merito, acciò che vegnì a discreditar la mia casa.

MargaritaVe fazzo onor più de quello che meritè.

LunardoAnemo, andeve subito a despoggiar. (a Margarita)

MargheritaNo ve dago sto gusto gnanca se me coppè.

LunardoE vu no vegnirè a tola.

MargaritaNo ghe penso nè bezzo, nè bagatin.

LuciettaE mi, sior padre, vegniroggio a tola?

LunardoCavete quelle strasserie.

LuciettaSior sì, co nol vol altro, che el toga. Mi son ubidiente. La varda che roba: gnanca vergogna che me le metta. (si cava le perle e cascate)

LunardoVedeu? Se cognosse, che la xe ben arlevada. Eh la mia prima muggier, poveretta! quella giera una donna de sesto. No la se metteva un galan senza dirmelo, e co mi no voleva, giera fenio, no ghe giera altre risposte. Siestu benedetta dove che ti xe. Matto inspirità che son stà mi a tornarme a maridar.

MargaritaMi, mi ho fatto un bon negozio a tor un satiro per mario.

LunardoPovera grama! ve manca el vostro bisogno? no gh’avè da magnar?

MargaritaCerto! una donna, co la gh’ha da magnar, no ghe manca altro!

LunardoCossa ve manca?

MargaritaCaro vu, no me fe parlar.

LuciettaSior padre.

LunardoCossa gh’è?

LuciettaNo me metterò più gnente senza dirghelo, salo?

LunardoTi farà ben.

LuciettaGnanca se me lo dirà siora madre.

MargaritaEh mozzina! se cognossemo. Sul so viso, figurarse, tegnì da elo, e po da drio le spalle tirè zoso a campane doppie. (a Lucietta)

LuciettaMi siora? (a Margarita)

LunardoTasè là. (a Lucietta)

LuciettaLa dise delle busie. (a Lunardo)

MargaritaSentìu come che la parla? (a Lunardo)

LunardoTasè là, ve digo. Co la maregna no se parla cussì. Gh’ave da portar respetto; l’ave da tegnir in conto de mare.

LuciettaDe mi no la se pol lamentar. (a Lunardo)

MargaritaE mi... (a Lunardo)

LunardoE vu, vegnimo a dir el merito, despoggieve, che farè meggio. (a Margarita)

MargaritaDiseu dasseno?

LunardoDigo dasseno.

Lucietta(Oh magari!)

MargaritaSon capace de strazzarlo sto abito in cento tocchi.

LunardoAnimo, scomenzè, che ve agiuterò.

LuciettaSior padre, vien zente.

LunardoAseni! i averze senza dir gnente? Andè via de qua. (a Lucietta)

LuciettaMo per cossa?

LunardoAndeve a despoggiar. (a Margarita)

MargaritaCossa voleu che i diga?

LunardoCospetto e tacca via!

Simon, Marina e detti.

MarinaPatrona, siora Margarita.

MargaritaPatrona, siora Marina.

LuciettaPatrona.

MarinaPatrona, fia, patrona.

MargaritaSior Simon, patron.

SimonPatrona. (ruvido)

MarinaSior Lunardo, gnanca? Pazenzia.

LunardoLa reverisso. (Cavève). (a Lucietta)

Lucietta(Gnanca se i me coppa no vago via).

SimonSemo qua, sior Lunardo, a ricever le vostre grazie.

Lunardo(Quella matta de mia muggier ancuo la me vol far magnar tanto velen).

SimonMio cugnà Maurizio nol xe gnancora vegnù. (a Lunardo)

Lunardo(Figureve cossa che el dirà sior Simon in tei so cuor, a veder sta cargadura de mia muggier).

Marina(Vardè che bel sesto! nol ve bada gnanca). (a Simon)

SimonTasè là, vu; cossa gh’intreu? (a Marina)

MarinaCara quella grazietta! (a Simon)

MargaritaVia, siora Marina, la se cava zoso.

MarinaVolentiera. (vuole spuntarsi il zendale)

LunardoAnde de là, siora, a cavarghe la vesta e el zendà. (con rabbia a Margarita)

MargaritaVia, via, figurarse, no me magnè. Andemo, siora Marina.

LunardoE despoggieve anca vu. (a Margarita)

MargaritaAnca mi m’ho da despoggiar? Cosa disela, siora Marina? El vol che me despoggia. Xelo bello mio mario? (ridendo)

MarinaDe mi no la gh’ha d’aver suggizion. (a Margarita)

LunardoSentìu? che bisogno ghe giera, vegnimo a dir el merito, che ve vestissi in andriè? (a Margarita)

MargaritaChe caro sior Lunardo! e ela, figurarse, come xela vestia?

LunardoEla xe fora de casa, e vu se in casa.

SimonAnca mi ho combattù do ore co sta matta. La s’ha volesto vestir a so modo. (a Lunardo) Mandè a casa a tor el vostro cotuss.

MarinaFigureve se mando!

MargaritaAndemo, andemo, siora Marina.

MarinaVardè! gnanca se fussimo vestie de ganzo!

MargaritaI xe cussì. Se gh’ha la roba, e no i vol che la se dopera.

MarinaI vederà siora Felice, come che la xe vestia.

MargaritaL’aveu vista?

MarinaLa xe stada da mi.

MargaritaCome gierela, cara vu?

MarinaOe, in tabarin. (con esclamazione)

MargaritaIn tabarin?

MarinaE co pulito!

MargaritaSentìu, sior Lunardo? Siora Felice, figurarse, la xe in tabarin.

LunardoMi no intro in ti fatti dei altri. Ve digo a vu, vegnimo a dir el merito, che la xe una vergogna.

MargaritaChe abito gh’avevela? (a Marina)

MarinaArzento a sguazzo.

MargaritaSentìu, siora Felice gh’ha l’abito co l’arzento, e vu criè, perchè gh’ho sto strazzetto de sea? (a Lunardo)

LunardoCavevelo, ve digo.

MargaritaSé ben minchion, se el credè. Andemo, andemo, siora

MarinaSe ghe tendessimo a lori, i ne metterave i moccoli drio. Se poderessimo ficcar in canèo. Della roba ghe n’ho, e fin che son zovene me la voggio goder. (a Marina) Ma no gh’è altro; cussì la xe. (a Lunardo, e parte)

LunardoCustìa la me vol tirar a cimento.

MarinaCaro sior Lunardo, bisogna compatirla. La xe ambiziosa; certo che no ghe giera bisogno, che per casa la mostrasse sta affetazion, ma la xe zovene: no la gh’ha gnancora el so bon intendacchio .

SimonTasè là. Vardeve vu, siora pettegola.

MarinaSe no portasse respetto dove che son....

SimonCossa diressi?

MarinaVe diria de chi v’ha nanìo. (Orso del diavolo). (parte)

Lunardo e Simon.

SimonMarideve, che gh’avere de sti gusti.

LunardoVe recordeu de la prima muggier? Quella giera una bona creatura; ma questa la xe un muschietto! (Simon)

SimonMa mi, matto bestia, che le donne no le ho mai podeste soffrir, e po son andà a ingambararme co sto diavolo descaenà.

LunardoAl dì d’ancuo no se se pol più maridar.

SimonSe se vol tegnir la muggier in dover, se xe salvadeghi; se la se lassa far, se xe alocchi.

LunardoSe no giera per quella putta che gh’ho, ve protesto da galantomo, vegnimo a dir el merito, che no m’intrigava con altre donne.

SimonMe xe sta ditto, che la maridè: xe vero?

LunardoChi ve l’ha ditto? (con isdegno)

SimonMia muggier.

LunardoCome l’ala savesto? (con isdegno)

SimonCredo che ghe l’abbia ditto so nevodo.

LunardoFelippeto?

SimonSì, Felippeto.

LunardoFrascon, pettegolo, babuin! So pare ghe l’ha confidà, e lu subito el lo xe andà a squaquarar? Conosso che nol xe quel putto che credeva che el fusse. Son squasi pentio d’averla promessa, e ghe mancherave poco, vegnimo a dir el merito, che no strazzasse el contratto.

SimonVe n’aveu per mal, perchè el ghe l’ha ditto a so amia?

LunardoSior sì: chi no sa taser, no gh’ha prudenza, e chi no gh’ha prudenza, no xe omo da maridar.

SimonGh’ave rason, caro vecchio; ma al dì d’ancuo no ghe ne xe più de quei zoveni del nostro tempo. V’arecordeu? No se fava nè più ne manco de quel che voleva nostro sior pare.

LunardoMi gh’aveva do sorelle maridae: no credo averle viste diese volte in tempo de vita mia.

SimonMi no parlava squasi mai gnanca co mia siora mare.

LunardoMi al dì d’ancuo no so cossa che sia un’opera, una comedia.

SimonMi i m’ha menà una sera per forza a l’opera, e ho sempre dormio.

LunardoMio pare, co giera zovene, el me diseva: vustu veder el Mondo niovo? o vustu che te daga do soldi? Mi me taccava ai do soldi.

SimonE mi? sunava le boneman, e qualche soldeto che ghe bruscava, e ho fatto cento ducati, e i ho investii al quattro per cento, e gh’ho quattro ducati de più d’intrada; e co i scuodo, gh’ho un gusto cussì grando, che no ve posso fenir de dir. No miga per l’avarizia dei quattro ducati, ma gh’ho gusto de poder dir: Tolè; questi me li ho vadagnai da puttelo.

LunardoTroveghene uno ancuo, che fazza cussì. I li butta via, vegnimo a dir el merito, a palae.

SimonE pazenzia i bezzi che i butta via. Xe che i se precipita in cento maniere.

LunardoE tutto xe causa la libertà.

SimonSior sì, co i se sa metter le braghesse da so posta, subito i scomenza a praticar.

LunardoE saveu chi ghe insegna? So mare.

SimonNo me disè altro: ho sentio cosse, che me fa drezzar i cavei.

LunardoSior sì; cussì le dise: Povero puttelo! che el se deverta, poveretto! voleu che el mora da malinconia? Co vien zente, le lo chiama: Vien qua, fio mio; la varda, siora Lugrezia, ste care raìse, no falò voggia? Se le savesse co spiritoso che el xe! Cànteghe quella canzonetta: dighe quella bella scena de Truffaldin. No digo per dir, ma el sa far de tutto: el balla, el zoga alle carte, el fa dei sonetti: el gh’ha la morosa, sala? El dise, che el se vol maridar. El xe un poco insolente, ma pazenzia, el xe ancora puttelo, el farà giudizio. Caro colù; vien qua, vita mia; daghe un baso a siora Lugrezia... Via; sporchezzi; vergogna; donne senza giudizio.

SimonCossa che pagherave, che ghe fusse qua a sentirve sette o otto de quelle donne che cognosso mi.

LunardoCospetto de diana! le me sgrafarave i occhi.

SimonHo paura de sì; e cussì, diseme: aveu serrà el contratto co sior Maurizio?

LunardoVegnì in mezzà da mi, che ve conterò tutto.

SimonMia muggier sarà de là co la vostra.

LunardoNo voleu?

SimonNo ghe sarà nissun, m’imagino.

LunardoIn casa mia? no vien nissun senza che mi lo sappia.

SimonSe savessi! da mi sta mattina... basta, no digo altro.

LunardoConteme.... cossa xe sta?

SimonAndemo, andemo; ve conterò. Donne, donne, e po donne.

LunardoChi dise donna, vegnimo a dir el merito, dise danno.

SimonBravo da galantomo. (ridendo ed abbracciando Lunardo)

LunardoE pur, se ho da dir la verità, no le m’ha despiasso.

SimonGnanca a mi veramente.

LunardoMa in casa.

SimonE soli.

LunardoE co le porte serrae.

SimonE co i balconi inchiodai.

LunardoE tegnirle basse.

SimonE farle far a nostro modo.

LunardoE chi xe omeni, ha da far cussì. (parte)

SimonE chi no fa cussì, no xe omeni. (parte)

Altra camera.

Margarita e Marina.

MarinaFeme a mi sto servizio. Chiamè Lucietta, e disemoghe qualcossa de sto so novizzo. Consolemola, e sentimo cossa che che la sa dir.

MargaritaCredème, siora Marina, che no la lo merita.

MarinaMo perchè?

MargaritaPerchè la xe una frascona. Procuro per tutti versi de contentarla, e la xe con mi, figurarse, ingrata, altiera e sofistica al mazor segno.

MarinaCara fia, bisogna compatir la zoventù.

MargaritaCossa credeu, che la sia una puttela?

MarinaQuanti anni gh’averala?

MargaritaMo la gh’averà i so disdotanni fenii lu.

MarinaEh via!

MargaritaSì, da quella che son.

MarinaE mio nevodo ghe n’ha vinti debotto.

MargaritaPer età i va pulito.

MarinaDisè mo anca, che el xe un bon putto.

MargaritaSe ho da dir la verità, gnanca Lucietta no xe cattiva: ma cussì; la va a lune. Delle volte la me struccola de carezze, delle volte la me fa inrabiar.

MarinaI xe i so anni, fia mia. Credemelo, che me recordo giusto come se fusse adesso: anca mi fava cussì con mia siora madre.

MargaritaMa gh’è differenza, vedeu? Una mare pol sopportar, ma a mi no la me xe gnente.

MarinaLa xe fia de vostro mario.

MargaritaGiusto elo me fa passar la voggia de torme qualche pensier; perchè, se la contento, el cria; se no la contento, el brontola. In verità, non so più quala far.

MarinaFé de tutto che la se destriga.

MargaritaMagari doman.

MarinaNo xeli in contratto?

MargaritaNo gh’è miga fondamento in sti omeni; i se pente da un momento all’altro.

MarinaE pur mi ghe scometteria qualcossa, che ancuo se stabilisse ste nozze.

MargaritaAncuo? per cossa?

MarinaSo che sior Lunardo ha invidà a disnar anca mio cugnà Maurizio. No i xe soliti a far sti invidi; vederè quel che digo mi.

MargaritaPol esser; ma me par impussibile, che no i diga gnente a la putta.

MarinaNo saveu, che zente che i xe? I è capaci de dirghe dal ditto al fatto: toccheve la man, e bondì sioria.

MargaritaE se la putta disesse de no?

MarinaPer questo xe meggio che l’avisemo.

MargaritaVoleu che la vaga a chiamar?

MarinaSe ve par che sia ben, chiamemola.

MargaritaCara fia, me reporto a vu.

MarinaEh cara siora Margarita, in materia de prudenza, no ghe xe una par vostro.

MargaritaVago, e vegno. (parte)

MarinaPovera putta! lassarghe vegnir l’acqua adesso cussì! sta so maregna no la gh’ha un fià de giudizio.

Margarita, Lucietta e Marina.

MargaritaVegnì qua, fia, che siora Marina ve vol parlar.

LuciettaLa compatissa, sala, se no son vegnua avanti, perchè se la savesse, ho sempre paura de fallar. In sta casa i catta da dir sun tutto.

MarinaXe vero; vostro sior padre xe un poco troppo suttilo; ma consoleve, che gh’avè una maregna che ve vol ben.

LuciettaSiora sì. (le fa segno col gomito, che non è vero)

Marina(Figurarse. Se gh’avesse una fiastra, anca mi farave l’istesso).

Margarita(Ghe voggio ben, ma no vedo l’ora che la me vaga fora dai occhi).

LuciettaE cussì, siora Marina, cossa gh’ala da dirme?

MarinaSiora Margarita.

MargaritaFia mia.

MarinaDiseghe vu qualcossa.

MargaritaMi ve lasso parlar a vu.

LuciettaPoveretta mi! de ben, o de mal?

MarinaOh de ben, de ben.

LuciettaMo via donca, che no la me fazza più sgangolir.

MarinaMe consolo con vu, Lucietta.

LuciettaDe cossa?

MarinaChe ghe lo diga? (a Margarita)

MargaritaVia, tanto fa, diseghelo. (a Marina)

MarinaMe consolo che sè novizza. (a Luciella)

LuciettaOh giusto! (mortificandosi)

MarinaVardè! no lo credè?

LuciettaMi no, la veda. (come sopra)

MarinaDomandeghelo. (accennando Margarita)

LuciettaXela la verità, siora madre?

MargaritaPer quel che i dise.

LuciettaOh! no ghe xe gnente de seguro?

MargaritaMi credo che sia sicurissimo.

LuciettaOh, la burla, siora Marina.

MarinaBurlo? so anca chi xe el vostro novizzo.

LuciettaDasseno? Chi xelo?

MarinaNo savè gnente vu?

LuciettaMi no, la veda. El me par un insonio.

MarinaLo spiegheressi volentiera sto insonio?

LuciettaNo vorla?

MargaritaPol esser che ve tocca la grazia.

LuciettaMagari. Xelo zovene? (a Marina)

MargaritaFigureve, in circa della vostra età.

LuciettaXelo bello?

MargaritaPiuttosto.

Lucietta(Siestu benedetto!)

MargaritaLa s’ha mo messo, figurarse, in t’un boccon de gringola.

LuciettaMo via, no la me mortifica. Par che ghe despiasa. (a Margarita)

MargaritaOh v’ingannè. Per mi piuttosto stassera che doman.

LuciettaEh, lo so el perchè.

MargaritaDisè mo.

LuciettaLo so, lo so, che no la me pol più veder.

MargaritaSentìu, che bella maniera de parlar? (a Marina)

MarinaVia, via, care creature, buttè a monte.

LuciettaLa diga; cossa gh’alo nome? (a Marina)

MarinaFilippeto.

LuciettaOh che bel nome! xelo civil?

MarinaEl xe mio nevodo.

LuciettaOh sior’amia! gh’ho tanto a caro, sior’amia, sia benedetto, sior’amia. (con allegria bacia Marina)

MargaritaVardè che stomeghezzi.

LuciettaCara siora, la tasa, che l’averà fatto pezo de mi.

MargaritaCerto, per quella bella zoggia che m’ha toccà.

MarinaDisè, fia mia. L’aveu mai visto? (a Lucietta)

LuciettaOh poveretta mi! quando? dove? Se qua no ghe vien mai un can, se no vago mai in nissun liogo.

MargaritaSe lo vedere, el ve piaserà.

LuciettaDasseno? Quando lo vederoggio?

MarinaMi no so; siora Margarita saverà qualcossa.

LuciettaSiora madre, quando lo vederoggio?

MargaritaSì, sì: siora madre, quando lo vederoggio! Co ghe preme, la se raccomanda. E po gnente gnente, la ranzigna la schizza.

LuciettaLa sa, che ghe vôi tanto ben.

MargaritaVa là, va là, mozzina.

Marina(Caspita! la gh’ha de la malizia tanta, che fa paura).

LuciettaLa diga, siora Marina. Xelo fio de sior Maurizio?

MarinaSì, fia mia, e el xe fio solo.

LuciettaGh’ho tanto da caro. La diga: saralo rustego co fa so sior padre?

MarinaOh, che el xe tanto bon!

LuciettaMo quando lo vederoggio?

MarinaPer dir la verità, gh’averave gusto che ve vedessi, perchè se pol anca dar, che alo no ve piasa a vu, o che vu ne ghe piasè a elo?

LuciettaPussibile che no ghe piasa?

MargaritaCossa credeu de esser, figurarse, la dea Venere?

LuciettaNo credo de esser la dea Venere, ma no credo mo gnanca de esser l’orco.

Margarita(Eh, la gh’ha i so catarri).

MarinaSentì, siora Margarita, bisogna che ve confida una cossa.

LuciettaMi possio sentir?

MarinaSì, sentì anca vu. Parlando de sto negozio co siora Felice, la s’ha fatto de maraveggia, che avanti de serrar el contratto, sti putti no s’abbia da veder. La s’ha tolto ela l’impegno de farlo. Ancuo, come savè, la vien qua a disnar, e sentiremo cossa che la dirà.

LuciettaPulito, pulito dasseno.

MargaritaSe fa presto a dir pulito pulito! e se mio mario se n’incorze? Chi tol de mezzo, figurarse, altri che mi?

LuciettaOh, per cossa vorla che el se n’incorza?

MargaritaAlo da vegnir in casa per el luminal?

LuciettaMi no so gnente. Cossa disela, siora Marina?

MarinaSentì, ve parlo schietto. Mi no ghe posso dar torto gnanca a siora Margarita. Sentiremo quel che dise siora Felice. Se gh’è pericolo, gnanca mi no me ne veggio intrigar.

LuciettaVardè; le me mette in saor, e po, tolè suso.

MargaritaZitto, me par de sentir...

MarinaVien zente.

LuciettaUh, se xe sior padre, vago via.

MarinaCossa gh’aveu paura? Omeni no ghe ne xe.

MargaritaOh, saveu chi xe?

MarinaChi?

MargaritaSiora Felice in maschera, in t’un’aria malignazonazza.

LuciettaXela sola?

MargaritaSola. Chi voressi che ghe fusse, patrona? (a Lucietta)

LuciettaVia siora madre, che la sia bona, che ghe vôi tanto ben. (allegra)

MarinaSentiremo qualcossa.

LuciettaSentiremo qualcossa. (allegra)

Felice in maschera in bautta, e dette.

FelicePatrone. (tutte rispondono patrona, secondo il solito)

MargaritaMolto tardi, siora Felice; v’avè fatto desiderar.

LuciettaDe diana! se lavemo desiderada.

FeliceSe savessi! Ve conterò.

MarinaSola sè? No gh’è gnanca vostro mario?

FeliceOh, el ghe xe quel torso de verza.

MargaritaDove xelo?

FeliceL’ho manda in mezzà da vostro mario. No ho volesto che el vegna de qua, perchè v’ho da parlar.

Lucietta(Oh, se la gh’avesse qualche bona niova da darme!)

FeliceSaveu chi ghe xe in mezzà con lori?

MarinaMio mario?

FeliceE sì ben, ma ghe xe un altro.

MarinaChi?

FeliceSior Maurizio.

Lucietta(El padre del putto!) (con allegria)

MarinaCome l’aveu savesto?

FeliceMio mario, che anca elo xe un tangaro, avanti de andar in mezzà, l’ha volesto saver chi ghe giera, e la serva gh’ha ditto che ghe giera sior Simon e sior Maurizio.

MarinaCossa mai fali?

FeliceMi credo, vede, mi credo che i stabilissa quel certo negozio...

MarinaEh sì sì, ho capìo.

MargaritaGh’arrivo anca mi.

Lucietta(Anca mi gh’arrivo).

MarinaE, de quell’altro interesse gh’avemio gnente da novo?

FeliceDe quell’amigo!

MarinaSì, de quell’amigo.

Lucietta(Le parla in zergo; le crede che no capissa).

FelicePodemio parlar liberamente?

MargaritaSì, cossa serve? Za Lucietta sa tutto.

LuciettaOh cara siora Felice, se la savesse quanto che ghe son obbligada.

FeliceMo andè là, fia mia, che sè fortunada. (a Lucietta)

LuciettaPer cossa?

FeliceMi no l’aveva mai visto quel putto. V’assicuro che el xe una zoggia.

Lucietta(Si pavoneggia da sè.)

MargaritaTegnive in bon, patrona. (a Lucietta)

MarinaNo fazzo per dir che el sia mio nevodo; ma el xe un putto de sesto.

Lucietta(Come sopra.)

MargaritaMa ghe vol giudizio, figurarse, e bisogna farse voler ben. (a Lucietta)

LuciettaCo saremo a quella, farò el mio debito.

MarinaE cussì? se vederali sti putti? (a Felice)

FeliceMi ho speranza de sì.

LuciettaCome? quando, siora Felice? quando, come?

FelicePutta benedetta, gh’avè più pressa de mi.

LuciettaNo vorla?

FeliceSentì. Adessadesso el vegnirà qua. (piano a tutte e tre)

MargaritaQua! (con maraviglia)

FeliceSiora sì, qua.

LuciettaPerchè no porlo vegnir qua? (a Margarita)

MargaritaTasè là, vu siora, che no savè quel che ve disè. Cara siora Felice, lo cognossè mio mario, vardè ben che no femo pezo.

FeliceNo v’indubitè gnente. El vegnirà in maschera, vestio da donna; vostro mario nol cognosserà.

MarinaSì ben, sì ben: l’ave pensada pulito.

MargaritaEh cara siora, mio mario xe suttilo: se el se ne incorze, figurarse, poveretta mi.

LuciettaNo sèntela? el vegnirà in maschera. (allegra a Margarita)

MargaritaEh via, frasconazza. (a Lucietta)

LuciettaEl vegnirà vestio da donna. (mortificata a Margarita)

FeliceCredème, siora Margarita, che me fe torto. Stè sora de mi, no abbiè paura. No pol far che el vegna. Se el vien, che semo qua sole, come che semo adesso, podemo un pochettin chiaccolar; se el vien che siemo a tola, o che ghe sia vostro mario, lassème far a mi. So mi quel che gh’ho da dir. I se vederà come che i poderà. Un’occhiadina in sbrisson, no ve basta?

LuciettaIn sbrisson? (a Felice, pateticamente)

MargaritaVegniralo solo?

FeliceNo, cara fìa; solo nol pol vegnir. Vedè ben, in maschera, vestio da donna...

MargaritaCon chi vegniralo donca? (a Felice)

FeliceCon un forestier. (a Margarita) Oe, con quello de sta mattina. (a Marina)

MarinaHo capìo.

MargaritaFigurarse, se mio mario vuol zente in casa, che nol cognosse!

FeliceEl vegnirà in maschera anca elo.

MargaritaPezo: no, no assolutamente.

LuciettaMo via, cara siora madre, la trova difficoltà in tutto. (La xe proprio una caga dubbi).

MargaritaSo quel che digo; e mio mario, figurarse, nissun lo cognossè meggio de mi.

FeliceSentì, fia mia, dal vostro al mio semo là. I xe tutti do taggiai in t’una luna. Mi mo, vedeu? no me lasso far tanta paura.

MargaritaBrava, sarè più spiritosa de mi.

LuciettaI batte.

MargaritaEh che no i batte, no.

MarinaPoverazza, la gh’ha el battaor in tel cuor.

FeliceVedè, cara siora Margarita, che in sto negozio no gh’ho ne intrar, nè insir. L’ho fatto per siora Marina, e anca per sta putta, che ghe voggio ben. Ma se vu po ve n’avè per mal....

LuciettaEh giusto! cossa disela?

MarinaEh via, za che ghe semo. (a Margarita)

MargaritaBen ben; se nasserà qualcossa, sarà pezo per vu. (a Lucietta)

LuciettaNo la sente? I batte, ghe digo. (a Margarita)

MargaritaAdesso sì ch’i ha battù.

LuciettaBisogna che la dorma culìa. Anderò mi.

MargaritaSiora no, siora no, anderò mi. (parte)

Felice, Marina e Lucietta.

LuciettaCara ela, me raccomando. (a Felice)

FeliceNo vorave desgustar siora Margarita.

MarinaNo ghe badè. Se stasse a ela, sta putta no se mariderave mai.

LuciettaSe la savesse!

FeliceCossa vol dir? cossa gh’ala co sta creatura? (a Marina)

MarinaNo saveu? invidia. Gh’ha toccà un mario vecchio, la gh’averà rabbia che a so fiastra ghe tocca un zovene.

LuciettaHo paura de sì mi, che la diga la verità.

FeliceOra la dise una cossa, ora la ghe ne dise un’altra.

MarinaSe ve digo: no gh’è nè sesto, nè modello.

LuciettaNo la sa dir altro che figurarse, figurarse.

Margarita e dette.

MargaritaA vu, siora Felice.

FeliceA mi? cossa?

MargaritaMaschere che ve domanda.

LuciettaMaschere che la domanda! (allegra a Felice)

MarinaSaralo l’amigo? (a Felice)

FelicePol darse. (a Marina) Felo vegnir avanti. (a Margarita)

MargaritaE se vien mio mario?

FeliceSe vien vostro mario, no ghe saverò dar da intender qualche panchiana? No ghe posso dir che la xe mia sorella maridada a Milan? Giusto l’aspettava in sti zorni, e la pol capitar de momento in momento.

MargaritaE la maschera omo?

FeliceOh bella! no ghe posso dir che el xe mio cugnà?

MargaritaE vostro mario cossa diralo?

FeliceMio mario, co voggio che el diga de sì, basta che lo varda; con un’occhiada el me intende.

LuciettaSiora madre, ghe n’ala più?

MargaritaCossa?

LuciettaDelle difficoltà?

MargaritaMe faressi dir, debotto... orsù, tanto fa che le staga de là quelle maschere, come che le vegna de qua. All’ultima delle ultime, gh’averè da pensar vu più de mi. (a Lucietta) Siore maschere, le favorissa, le vegna avanti. (alla scena)

Lucietta(Oh come che me batte el cuor!)

Filippetto in maschera da donna, il Conte Riccardo e detti.

RiccardoServitor umilissimo di lor signore.

FelicePatrone, siore maschere.

MargaritaServa. (sostenuta)

MarinaSiora maschera donna, la reverisso. (a Filippetto)

Filippetto(Fa la riverenza da donna.)

Lucietta(Vardè che bon sesto!)

FeliceMaschere, andeu a spassetti?

RiccardoIl carnovale desta l’animo ai divertimenti.

MarinaSiora Lucietta, cossa diseu de ste maschere?

LuciettaCossa vorla che diga? (mostrando di vergognarsi)

Filippetto(Oh cara! oh che pometto de riosa).

MargaritaSiore maschere, le perdona la mala creanza; ale disnà ele?

RiccardoIo no.

MargaritaIn verità, voressimo andar a disnar.

RiccardoVi leveremo l’incomodo.

Filippetto(De diana! no l’ho malistente vardada!)

RiccardoAndiamo, signora maschera. (a Filippetto)

Filippetto(Sia malignazo!)

MarinaEh, aspettè un pochettin. (a Riccardo e a Filippetto)

Margarita(Me lo sento in te le recchie quel satiro de mio mario).

FeliceMaschera, senti una parola. (a Filippetto)

Filippetto(Si accosta a Felice.)

FeliceVe piasela? (piano a Filippello)

FilippettoSiora sì. (piano a Felice)

FeliceXela bella? (come sopra)

FilippettoDe diana! (come sopra)

Lucietta(Siora madre).

Margarita(Cossa gh’è?)

Lucietta(Almanco che lo podesse veder un pochettin). (piano a Margarila)

Margarita(Adessadesso ve chiappo per un brazzo, e ve meno via).

Lucietta(Pazenzia).

MarinaMaschera. (a Filippetto)

Filippetto(S’accosta a Marina.)

MarinaVe piasela?

FilippettoAssae.

MarinaToleu tabacco, maschera? (a Filippetto)

FilippettoSiora sì.

MarinaSe comande, servive.

Filippetto(Prende il tabacco colle dite, e vuol pigliarlo colla maschera al volto.)

FeliceCo se tol tabacco, se se cava el volto, (gli leva la maschera)

Lucietta(Oh co bello!) (guardandolo furtivamente)

MarinaMo che bella putta! (verso Filippetto)

FeliceLa xe mia sorella.

Lucietta(I me fa da rider). (ridendo)

Filippetto(Oh co la ride pulito!)

FeliceVegnì qua, tireve la bautta sotto la gola. (gli cala la bautta)

Lucietta(El consola el cuor).

MarinaChi xe più bella de ste do putte? (di Filippetto e Lucietta)

Filippetto(Sì vergogna, e guarda furtivamente Lucietta.)

Lucietta(Fa lo stesso.)

Riccardo(Sono obbligato alla signora Felice, che oggi mi ha fatto godere la più bella commedia di questo mondo).)

MargaritaOh via, fenimola, fìgurarse, che xe ora. No parlemo più in equivoco. Ringraziè ste signore, che ha fatto sto contrabando, e raccomandeve al cielo, che se sarè destinai, ve torrè. (a Lucietta e Filippetto)

FeliceVia andè, maschere; contenteve cussì per adesso.

Filippetto(Mi no me so destaccar).

Lucietta(El me porta via el cuor).

MargaritaManco mal che la xe andada ben.

MarinaTireve su la bautta. (a Filippelto)

FilippettoCome se fa? No gh’ho pratica.

FeliceVegnì qua da mi. (gli accomoda la bautta)

Lucietta(Poverazzo! nol se sa giustar la bautta). (ridendo forte)

FilippettoMe burlela? (a Lucietta)

LuciettaMi no. (ridendo)

FilippettoFurba!

Lucietta(Caro colù).

MargaritaOh poveretta mi! oh poveretta mi!

FeliceCoss’è sta?

MargaritaVe qua mio mario.

MarinaSì per diana: anca el mio.

FeliceNo xela mia sorella?

MargaritaEh cara ela, se el me trova in busia, poveretta mi. Presto, presto, scondeve, andè in quella camera. (a Filippetto, spingendolo)) Caro sior, la vaga là drento. (a Riccardo)

RiccardoChe imbroglio è questo?

FeliceLa vaga, la vaga, sior Riccardo. La ne fazza sta grazia.

RiccardoFarò anche questo per compiacervi. (entra in una camera)

Filippetto(Spionerò intanto). (entra in una camera)

Lucietta(Me trema le gambe, che no posso più).

MargaritaVe l’oggio dito? (a Felice e Marina)

MarinaVia via, no xe gnente. (a Margarita)

FeliceCo anderemo a disnar, i se la batterà.

MargaritaSon stada troppo minchiona.

Lunardo, Simon, Canciano e dette.

LunardoOh patrone, xele stufe d’aspettar? Adessadesso anderemo a disnar. Aspettemo sior Maurizio, e subito che el vien, andemo a disnar.

MargaritaNo ghe gierelo sior Maurizio?

LunardoEl ghe giera. El xe andà in t’un servizio, e el tornerà adessadesso. Cossa gh’astu ti, che ti me par sbattuetta?

LuciettaGnente. Vorlo che vaga via? (a Lucietta)

LunardoNo no, sta qua, fia mia, che anca per ti xe vegnù la to zornada: nevvero, sior Simon?

SimonPoverazza! gh’ho a caro.

LunardoAh! cossa diseu? (a Canciano)

CancianoSì, in verità, la lo merita.

Lucietta(No me vol andar via sto tremazzo).

FeliceGh’è qualche novità, sior Lunardo?

LunardoSiora sì.

MarinaVia, che sappiemo anca nu.

MargaritaZa mi sarò l’ultima a saverlo. (a Lunardo)

LunardoSentì, fia, ancuo disè quel che volè, che no gh’ho voggia de criar. Son contento, e voggio che se godemo. Lucietta, vien qua.

Lucietta(Sì accosta tremando.)

LunardoCossa gh’astu?

LuciettaNo so gnanca mi. (tremando)

LunardoGh’astu la freve ? Ascolta, che la te passerà. In presenza de mia muggier, che te fa da mare, in presenza de sti do galantomeni, e delle so parone, te dago la niova, che ti xe novizza.

Lucietta(Trema, piange e quasi casca.)

LunardoOlà, olà, cossa fastu? Te despiase che t’abbia fatto novizza?

LuciettaSior no.

LunardoSastu chi xe el to novizzo?

LuciettaSior sì.

LunardoTi lo sa? come lo sastu? chi te l’ha ditto? (sdegnato)

LuciettaSior no, no so gnente. La compatissa, che no so gnanca cossa che diga.

LunardoAh! povera innocente! cussì la xe arlevada, vedeu? (a Simon e Canaan)

Felice(Se el savesse tutto). (piano a Margarita)

Margarita(M’inspirito che el lo sappia). (a Felice)

Marina(No gh’è pericolo). (a Margarita)

LunardoOrsù, sappiè che el so novizzo xe el fio de sior Maurizio, nevodo de siora Marina.

MarinaDasseno? mio nevodo?

FeliceOh cossa che ne contè!

MarinaMo gh’ho ben a caro, dasseno.

FeliceDe meggio no podevi trovar.

MarinaQuando se farale ste nozze?

LunardoAncuo.

MargaritaAncuo?

LunardoSiora sì, ancuo, adessadesso. Sior Maurizio xe andà a casa; el xe andà a levar so fio, el lo mena qua; disnemo insieme, e po subito i se dà la man.

Margarita(Oh poveretta mi!)

FeliceCussì alla presta?

LunardoMi no veggio brui longhi.

Lucietta(Adesso me trema anca le buelle).

LunardoCossa gh’astu? (a Lucietta)

LuciettaGnente.

Maurizio e detti.

LunardoOh via; seu qua? (a Maurizio)

MaurizioSon qua. (turbato)

LunardoCossa gh’aveu?

MaurizioSon fora de mi.

LunardoCoss’è stà?

MaurizioSon andà a casa, ho cerca el putto. No l’ho trova in nissun liogo. Ho domandà, me son informà, me xe sta ditto, che l’è stà visto in compagnia de un certo sior Riccardo, che pratica siora Felice. Chi elo sto forestier? cossa gh’intrelo con mio fio? (a Felice)

FeliceMi de vostro fio no so gnente. Ma circa al forestier, el xe un cavalier onorato. Nevvero, sior Cancian?

CancianoMi no so gnente chi el sia, e no so chi diavolo l’abbia manda. Ho tasesto fin adesso, ho manda zo dei bocconi amari, per contentarve, per no criar; ma adesso mo ve digo, che per casa mia no lo voggio più. Siora sì, el sarà un fa pelle.

Riccardo e detti.

RiccardoParlate meglio dei cavalieri d’onore. (a Conciano)

LunardoIn casa mia? (a Riccardo)

MaurizioDove xe mio fio? (a Riccardo)

RiccardoVostro figlio è là dentro. (a Maurizio)

LunardoSconto in camera?

MaurizioDov’estu, desgrazià?

FilippettoAh sior padre, per carità. (s’inginocchia)

LuciettaAh sior padre, per misericordia. (s’inginocchia)

MargaritaMario, no so gnente, mario. (raccomandandosi)

LunardoTi me la pagherà, desgraziada. (vuol dare a Margarita)

MargaritaAgiuto.

MarinaTegnilo.

FeliceFermelo.

SimonStè saldo.

CancianoNo fe. (Simon e Conciano strascinano dentro Lunardo, e partono in tre.)

MaurizioVien qua, vien qua, furbazzo. (piglia per un braccio Filippetto)

MargaritaVegnì qua, frasconazza. (piglia per un braccio Lucietta)

MaurizioAndemo. (lo tira)

MargaritaVegnì via con mi. (lo tira)

MaurizioA casa la giustaremo. (a Filippetto)

MargaritaPer causa vostra. (a Lucietla)

Filippetto(Andando via. saluta Lucietta.)

Lucietta(Andando via, si dà de’ pugni.)

FilippettoPoveretta!

LuciettaSon desperada.

MaurizioVa via de qua. (lo caccia via, e partono)

MargaritaSia maledetto co son vegnua in sta casa, (parte spingendo Lucietta.)

MarinaOh che sussuro, o che diavolezzo. Povera putta, povero mio nevodo! (parte)

RiccardoIn che impiccio mi avete messo, signora?

FeliceXelo cavalier?

RiccardoPerchè mi fate questa dimanda?

FeliceXelo cavalier?

RiccardoTale esser mi vanto.

FeliceDonca, che el vegna con mi.

RiccardoA qual fine?

FeliceSon una donna onorata. Ho fallà, e ghe vôi remediar.

RiccardoMa come?

FeliceCome, come! se ghe digo el come, xe fenia la commedia. Andemo. (partono)

Fine dell’Atto Secondo.

Camera di Lunardo.

Lunardo, Canciano e Simon.

LunardoSe tratta de onor, se tratta, vegnimo a dir el merito, de reputazion casa mia. Un omo della mia sorte. Cossa dirai de mi? cossa dirai de Lunardo Crozzola?

SimonQuieteve, caro compare. Vu no ghe n’ave colpa. Xe causa le donne; castighele, e tutto el mondo ve loderà.

CancianoSì ben, bisogna dar un esempio. Bisogna umiliar la superbia de ste muggier cussì altiere, e insegnar ai omeni a castigarle.

SimonE che i diga pur, che semo rusteghi.

CancianoE che i diga pur, che semo salvadeghi.

LunardoMia muggier xe causa de tutto.

SimonCastighela.

LunardoE quella frasconazza la ghe tien drio.

CancianoMortifichela.

LunardoE vostra muggier ghe tien terzo. (a Canciano)

CancianoLa castigherò.

LunardoE la vostra sarà d’accordo. (a Simon)

SimonAnca la mia me la pagherà.

LunardoCari amici, parlemo, consegiemose. Con custie, vegnimo a dir el merito, cossa avemio da far? Per la putta xe facile, e gh’ho pensà, e ho stabilio. Prima de tutto, a monte el matrimonio. Mai più, che no la parla de maridarse. La manderò a serrar in t’un liogo, lontana dal mondo, tra quattro muri, e la xe fenia. Ma le muggier come le avemio da castigar? Disè la vostra opinion.

CancianoVeramente, confesso el vero: son un pochettin intrigà.

SimonSe poderave ficcarle anca ele in t’un retiro tra quattro muri, e destrigarse cussì.

LunardoQuesto, vegnimo a dir el merito, sarave un castigo più per nu, che per ele. Bisogna spender, pagar le spese, mandarle vestie con un pochette de pulizia, e per retirae che le staga, le gh’averà sempre là drento più spasso, e più libertà, che no le gh’ha in casa nostra. Parlio ben? (a Simon)

SimonDisè benissimo. Specialmente da vu e da mi, che no ghe lassemo la brena sul collo, come mio compare Cancian.

CancianoCossa voleu che diga? gh’ave rason. Poderessimo tegnirle in casa, serrae in t’una camera; menarle un pochettin alla festa con nu, e po tornarle a serrar, e che no le vedesse nissun, e che no le parlasse a nissun.

SimonLe donne serrae? senza parlar con nissun? Questo xe un castigo, che le fa crepar in tre dì.

CancianoTanto meggio.

LunardoMa chi è quell’omo, che voggia far l’aguzzìn? e po se i parenti lo sa, i fa el diavolo, i mette sotto mezzo mondo, i ve la fa tirar fora, e po ancora i ve dise che sè un orso, che sè un langaro, che sè un can.

SimonE co avè molà, o per amor, o per impegno, le ve tol la man, e no sè più paron de criarghe.

CancianoGiusto cussì ha fatto con mi mia muggier.

LunardoLa vera saria, vegnimo a dir el merito, doperar un pezzo de legno.

SimonSì, da galantomo, e lassar che la zente diga.

CancianoE se le se revolta contra de nu?

SimonSe poderave dar, savè.

CancianoMi so quel che digo.

LunardoIn sto caso, se troveressimo in t’un brutto cimerito.

SimonE po? no saveu? Ghe ne xe dei omeni che bastona le so muggier, ma credeu che gnanca per questo i le possa domar? Oibò; le fa pezo che mai; le lo fa per despetto; se no i le coppa, no gh’è remedio.

LunardoCopparle po no.

CancianoMo no, certo; perchè po, vòltela, ménela, senza donne no se pol star.

SimonMo no saravela una contentezza, aver una muggier bona, quieta, ubbidiente? No saravela una consolazion?

LunardoMi l’ho provada una volta. La mia prima, poveretta, la giera un agnello. Questa? la xe un basilisco.

CancianoE la mia? Tutto a so modo la vol.

SimonE mi crio, strepito, e no fazzo gnente.

LunardoTutto xe mal, ma un mal che se pol sopportar; ma in tel caso che son mi adesso, vegnimo a dir el merito, se tratta de assae. Vorria resolver, e non so quala far.

SimonMandela dai so parenti.

LunardoCerto! acciò che la me fazza smattar.

CancianoMandela fora. Fela star in campagna.

LunardoPezo! la me consuma le intrae in quattro zorni.

SimonFeghe parlar; trovè qualchedun che la metta in dover.

LunardoEh! no l’ascolta nissun.

CancianoProve a serrarghe i abiti, a serrarghe le zoggie, tegnirla bassa; mortifichela.

LunardoHo provà; se fa pezo che mai.

SimonHo capio; fe cussì, compare.

LunardoCome?

SimonGodevela, come che la xe.

CancianoHo pensier anca mi, che no ghe sia altro remedio che questo.

LunardoSì, l’ho capia che xe un pezzo. Vedo anca mi che, co l’è fatta, no ghe xe più remedio. M’aveva comodà el mio stomego de sopportarla; ma questa che la m’ha fatto, la xe troppo granda. Ruvinarme una putta de quella sorte? farghe vegnir el moroso in casa? Xe vero che mi ghe l’aveva destina per mario, ma cossa savevela, vegnimo a dir el merito, la mia intenzion? Gh’ho dà qualche motivo de maridarla. Ma no me podevio pentir? No se podeva dar, che no se giustessimo? No podeva portar avanti dei mesi e dei anni? E la me lo introduse in casa? in maschera? da scondon? La fa che i se veda? la fa che i se parla? Una mia putta? una colomba innocente? No me tegno; la vôi castigar, la vôi mortificar, se credesse, vegnimo a dir el merito, de precipitar.

SimonCausa siora Felice.

LunardoSì, causa quella matta de vostra muggier. (a Conciano)

CancianoGh’ave rason. Mia muggier me la pagherà.

Felice e detti.

FelicePatroni reventi, grazie del so bon amor.

CancianoCossa feu qua?

LunardoCossa vorla in casa mia?

SimonXela qua, per far che nassa qualche altra bella scena?

FeliceI se stupisse perchè son qua? Voleveli che fusse andada via? Credevelo sior Cancian che fusse andada col forestier?

CancianoSe anderè più con colù, ve farò veder chi son.

FeliceDiseme, caro vecchio, ghe songio mai andada senza de vu?

CancianoLa sarave bella!

FeliceSenza de vu, l’oggio mai recevesto in casa?

CancianoGhe mancarave anca questa.

FeliceE perchè donca credevi che fusse andada con elo?

CancianoPerchè sè una matta.

Felice(El fa el bravo, perchè el xe in compagnia).

Simon(Oe, la gh’ha filo). (piano a Lunardo)

Lunardo(El fa ben a mostrarghe el muso). (piano a Simon)

CancianoAndemo, siora, vegnì a casa con mi.

FeliceAbbiè un pochetto de flemma.

CancianoMe maraveggio, che gh’abbiè tanto muso de vegnir qua.

FelicePer cossa? cossa oggio fatto?

CancianoNo me fe parlar.

FeliceParlè.

CancianoAndemo via.

FeliceSior no.

CancianoAndemo, che cospetto de diana... (minacciandola)

FeliceCospetto, cospetto... so cospettizar anca mi. Coss’è, sior? M’aveu trova in t’un gatolo? Songio la vostra massera? Cussì se parla con una donna civil? Son vostra muggier; me podè comandar, ma no me vôi lassar strapazzar. Mi no ve perdo el respetto a vu, e vu no me l’ave da perder a mi. E dopo che sè mio mario, no m’ave mai più parlà in sta maniera. Coss’è sto manazzar? coss’è sto cospetto? cossa xe sto alzar le man? A mi manazzar? a una donna della mia sorte? Disè, sior Cancian, v’ali messo su sti patroni? v’ah conseggià che me trattè in sta maniera? Ste asenarie l’aveu imparade da lori? Se sè un galantomo, trattè da quello che sè, se ho fallà, correzeme; ma no se strapazza, e no se manazza, e no se dise cospetto, e no se tratta cussì. M’aveu capio, sior Cancian? Abbiè giudizio vu, se volè che ghe n’abbia anca mi.

Canciano(Resta ammutolito.)

Simon(Aveu sentio che raccola?) (a Lunardo)

Lunardo(Adessadesso me vien voggia de chiapparla mi per el collo. E quel martuffo sta zitto). (a Simon)

Simon(Cossa voleu che el fazza? Voleu che el se precipita?)

FeliceVia, sior Cancian, no la dise gnente?

CancianoChi ha più giudizio, el dopera.

FeliceSentenza de Ciceroni Cossa disele ele, patroni?

LunardoCara siora, no me fe parlar.

FelicePerchè? son vegnua a posta, acciò che parlè; so che ve lamentè de mi, e gh’ho gusto de sentir le vostre lamentazion. Sfogheve con mi, sior Lunardo, ma no stè a metter su mio mario. Perchè, se me dirè le vostre rason, son donna giusta, e se gh’ho torto, sarò pronta a darve soddisfazion; ma arecordeve ben, che el metter disunion tra mario e muggier el xe un de quei mali che no se giusta cussì facilmente, e quel che no voressi che i altri fasse con vu, gnanca vu coi altri no l’avè da far, e parlo anca co sior Simon, che con tutta la so prudenza el sa far la parte da diavolo, co bisogna. Parlo con tutti do, e ve parlo schietto perchè me capì. Son una donna d’onor, e se gh’avè qualcossa, parlè.

LunardoDiseme, cara siora, chi è stà che ha fatto vegnir quel putto in casa mia?

FeliceSon stada mi. Mi son stada, che l’ha fatto vegnir.

LunardoBrava, siora!

SimonPulito!

CancianoLodeve, che ave fatto una bell’azion!

FeliceMi no me lodo, so che giera meggio che no l’avesse fatto; ma no la xe una cattiva azion.

LunardoChi v’ha dà licenza, che lo fe vegnir?

FeliceVostra muggier.

LunardoMia muggier? v’ala parlà? v’ala pregà? xela vegnua ela a dirvelo che lo menè?

FeliceSior no; me l’ha ditto siora Marina.

SimonMia muggier?

FeliceVostra muggier.

SimonAla pregà ela el forestier, che tegnisse terzo a quella putta?

FeliceSior no, el forestier l’ho pregà mi.

CancianoVu l’ave pregà? (con hdegno)

FeliceSior sì, mi. (a Canciano, con isdegno)

Canciano(Oh che bestia! no se pol parlar!)

LunardoMo perchè far sta cossa? mo perchè menarlo? mo perchè siora Marina se n’ala intrigà? mo perchè mia muggier s’ala contentà?

FeliceMo perchè questo, mo perchè st’altro! Ascoltème; sentì l’istoria come che la xe. Lasseme dir; no me interrompè. Se gh’ho torto, me darè torto; e se gh’ho rason, me darè rason. Prima de tutto, lasse, patroni, che ve diga una cossa. No andè in collera, e no ve n’abbiè per mal. Sè troppo rusteghi; sè troppo salvadeghi. La maniera che tegnì co le donne, co le muggier, co la fia, la xe cussì stravagante fora dell’ordinario, che mai in eterno le ve poderà voler ben; le ve obedisse per forza, le se mortifica con rason, e le ve considera no marii, no padri, ma tartari, orsi e aguzzini. Vegnimo al fatto. (No vegnimo a dir el merito, vegnimo al fatto). Sior Lunardo vol maridar la so putta, nol ghe lo dise, nol vol che la lo sappia, no la lo ha da veder; piasa, o no piasa, la lo ha da tor. Accordo anca mi, che le putte no sta ben che le fazza l’amor, che el mano ghe l’ha da trovar so sior padre, e che le ha da obedir, ma no xe mo gnanca giusto de metter alle fie un lazzo al collo, e dirghe: ti l’ha da tior. Gh’ave una fia sola, e gh’ave cuor de sacrificarla? (a Lunardo) Mo el putto xe un putto de sesto, el xe bon, el xe zovene, nol xe brutto, el ghe piaserà. Seu seguro, vegnimo a dir el merito, che el gh’abbia da piaser? e se nol ghe piasesse? Una putta arlevada a la casalina con un mario fio d’un pare salvadego, sul vostro andar, che vita doveravela far? Sior sì, avemo fatto ben a far che i se veda. Vostra muggier lo desiderava, ma no la gh’aveva coraggio. Siora Marina a mi s’ha raccomandà. Mi ho trovà l’invenzion della maschera, mi ho pregà el forestier. I s’ha visto, i s’ha piasso, i xe contenti. Vu doveressi esser più quieto, più consolà. Xe compatibile vostra muggier, merita lode siora Marina. Mi ho operà per bon cuor. Se sè omeni, persuadeve, se sè tangheri, sodisfeve. La putta xe onesta, el putto no ha fallà; nualtre semo donne d’onor. Ho fenio la renga; laudè el matrimonio, e compatì l’avvocato. (Lunardo, Simon e Canaan si guardano l'un l' altro, senza parlare.)

Felice(I ho messi in sacco, ma con rason).

LunardoCossa diseu, sior Simon?

SimonMi, se stasse a mi, lauderave.

CancianoGnanca mi no ghe vago in tel verde.

LunardoE pur ho paura che bisognerà che taggiemo.

FelicePer cossa?

LunardoPerchè el padre del putto, vegnimo a dir el merito...

FeliceVegnimo a dir el mereito, al padre del putto xe andà a parlarghe sior Conte, el xe in impegno che se fazza sto matrimonio, perchè el dise che innocentemente el xe sta causa elo de sti sussuri, e el se chiama affrontà, e el vol sta sodisfazion; el xe un omo de garbo, el xe un omo che parla ben, e son segura che sior Maurizio no saverà dir de no.

LunardoCossa avemio da far?

SimonCaro amigo, de tante che ghe ne avemo pensà, no ghe xe la meggio de questa. Tor le cosse come le vien.

LunardoE l’affronto?

FeliceChe affronto? co el xe so mario, xe fenio l’affronto.

CancianoSentì, sior Lunardo; siora Felice gh’ha anca ela le so debolezze, ma per dir la verità, qualche volta la xe una donna de garbo.

FeliceNevvero, sior Cancian?

LunardoMo via, cossa avemio da far?

SimonPrima de tutto, mi dirave de andar a disnar.

CancianoPer dirla, pareva che el disnar s’avesse desmentegà.

FeliceEh, chi l’ha ordenà, no xe alocco. El s’ha sospeso, ma nol xe andà in fumo. Fé cussì, sior Lunardo, se volè che magnemo in pase: mandè a chiamar vostra muggier, vostra fia, diseghe qualche cossa, brontolè al solito un pochettin, ma po fenimola; aspettemo che vegna sior Riccardo, e se vien el putto, fenimola.

LunardoSe vien qua mia muggier e mia fia, ho paura de no poderme tegnir.

FeliceVia, sfogheve, gh’ave rason. Seu contento cussì?

CancianoChiamemole.

SimonAnca mia muggier.

FeliceMi, mi: aspettè mi. (parte correndo)

Lunardo, Canciano e Simon.

LunardoUna gran chiaccola gh’ha quella vostra muggier. (a Conciano)

CancianoVedeu! no me disè donca che son un martuffo, se qualche volta me lasso menar per el naso. Se digo qualcossa, la me fa una renga, e mi laudo.

SimonGran donne! o per un verso, o per l’altro, le la vol a so modo seguro.

LunardoCo le lassè parlar, no le gh’ha mai torto.

Felice, Marina, Margarita, Lucietta e detti.

FeliceVele qua, vele qua. Pentìe, contrite, e le ve domanda perdon. (a Lunardo)

LunardoSe me fa anca de queste? (a Margarita)

FeliceNo la ghe n’ha colpa, son causa mi. (a Lunardo)

LunardoCossa meriteressistu, frasconcella! (a Lucietta)

FeliceParlè con mi, ve responderò mi. (a Lunardo)

LunardoI omeni in casa? I morosi sconti? (a Margarita e Lucietta)

FeliceCriè co mi, che son causa mi. (a Lunardo)

LunardoAndeve a far squartar anca vu. (a Felice)

FeliceVegnimo a dir el merito.... (a Lunardo, deridendolo)

CancianoCome parleu co mia muggier? (a Lunardo)

LunardoCaro vu, compatime. Son fora de mi. (a Conciano)

Margarita(Mortificata.)

Lucietta(Piange.)

MargaritaSiora Felice. Cossa n’aveu dito? Cussì pulito la xe giustada?

SimonAnca vu, siora, meriteressi la vostra parte. (a Marina)

MarinaMi chiappo su, e vago via.

FeliceNo, no, fermeve. Al povero sior Lunardo ghe giera resta in corpo un poco de collera: l’ha voleste buttarla fora. Da resto el ve scusa, el ve perdona, e se vien el putto, el se contenterà che i se sposa; nevvero, sior Lunardo?

LunardoSiora sì, siora sì. (ruvido)

MargaritaCaro mario, se savessi quanta passion che ho provà! Credemelo, no saveva gnente. Co xe vegnù quelle maschere, no voleva lassarle vegnir. Xe sta.... xe sta...

FeliceVia, son stada mi, cossa occorre?

Margarita(Diseghe anca vu qualcossa). (piano a Lucietta)

LuciettaCaro sior padre, ghe domando perdonanza. Mi no ghe n’ho colpa....

FeliceSon stada mi, ve digo, son stada mi.

MarinaPer dir la verità, gh’ho anca mi la mia parte de merito.

SimonEh, savemo che sè una signora de spirito. (a Marina, con ironia)

MarinaPiù de vu certo.

FeliceChi xe? (osservando fra le scene)

MargaritaOe, i xe lori. (a Felice)

Lucietta(El mio novizio). (da sè, allegra)

LunardoCoss’è? chi xe? chi vien? Omeni? Ande via de qua. (alle donne)

FeliceVardè! cossa femio? Aveu paura che i omeni ne magna? No semio in quattro? no ghe seu vu? Lassè che i vegna.

LunardoComandeu vu, patrona?

FeliceComando mi.

LunardoQuel forestier no lo voggio. Se el vegnirà elo, anderò via mi.

FeliceMo perchè noil voleu? El xe un signor onorato.

LunardoChe el sia quel che el vol, no lo voggio. Mia muggier e mia fia no le xe use a véder nissun.

FeliceEh, per sta volta le gh’averà pazenzia, nevvero, fie?

MargaritaOh mi sì.

LuciettaOh anca mi.

LunardoMi sì, anca mi. (burlandole) Ve digo, che no lo voggio. (a Felice)

Felice(Mg che orso, me che satiro!) Aspettè aspettè, che lo farò star in drio. (si accosta alla scena)

Lucietta(Eh non m’importa. Me basta uno che vegna).

Maurizio, Filippetto e detti.

MaurizioPatroni. (sostenuto)

LunardoSioria. (brusco)

Filippetto(Saluta furtivamente Lucietta. Maurizio lo guarda. Filippetto finge che non sia niente.)

FeliceSior Maurizio, aveu savesto come che la xe stada?

MaurizioMi adesso no penso a quel che xe stà, penso a quel che ha da esser per l’avegnir. Cossa dise sior Lunardo?

LunardoMi digo cussì, vegnimo a dir el merito, che i fioi, co i xe ben arlevai, no i va in maschera, e no i va in casa, vegnimo a dir el merito, delle putte civil.

MaurizioGh’ave rason: andemo via de qua. (a Filippetto)

Lucietta(Piange forte.)

LunardoDesgraziada! cossa xe sto fifar?

FeliceMo ve digo ben la verità, sior Lunardo, vegnimo a dir el merito, che la xe una vergogna. Seu omo, o seu puttelo? Disè, desdisè, ve muè co fa le zirandole.

MarinaVardè che sesti? No ghe l’aveu promessa? no aveu serrà el contratto? Cossa xe sta? cossa xe successo? Ve l’alo menada via? v’alo fato disonor a la casa? Coss’è sti puttelezzi? cossa xe ste smorfie? cossa xe sti musoni? (a Lunardo)

MargaritaChe voggio mo intrar anca mi in sto negozio. Sior sì, m’ha despiasso che el vegna: l’ha fatto mal a vegnir; ma col gh’ha dà la man, no xe fenio tutto? Fina a un certo segno me l’ho lassada passar, ma adesso mo ve digo, sior sì, el l’ha da tor, el l’ha da sposar. (a Lunardo)

LunardoChe el la toga, che el la sposa, che el se destriga: son stuffo; no posso più.

Lucietta(saltano per allegrezza.)

MaurizioCo sta rabbia i s’ha da sposar? (a Lunardo)

FeliceSe el xe inrabià, so danno. Noll’ha miga da sposar elo.

MargaritaVia, sior Lunardo, voleu che i se daga la man?

LunardoAspettè un pochettin. Lasse che me daga zoso la collera.

MargaritaVia, caro mario, ve compatisso. Conosso el vostro temperamento: sè un galantomo, sè amoroso, sè de bon cuor; ma, figurarse, sè un pochetto suttilo. Sta volta gh’ave anca rason: ma finalmente tanto vostra fia, quanto mi, v’avemo domandà perdonanza. Credeme, che a redur una donna a sto passo, ghe vol assae. Ma lo fazzo, perchè ve veggio ben, perchè voggio ben a sta putta, benchè no l’al conossa, o no la lo voggia conosser. Per ela, per vu, me caverave tutto quello che gh’ho: sparzerave el sangue per la pase de sta fameggia; contentè sta putta, quieteve vu, salvè la reputazion della casa, e se mi no merito el vostro amor, pazenzia, sarà de mi quel che destinerà mio mario, la mia sorte, o la mia cattiva degrazia. (a Lunardo)

LuciettaCara siora madre, sìela benedetta, ghe domando perdon anca a ela de quel che gh’ho ditto, e de quel che gh’ho fatto. (piangendo)

Filippetto(La me fa da pianzer anca mi).

Lunardo(Sì asciuga gli occhi.)

CancianoVedeu, sior Lunardo? Co le fa cussì, no se se pol tegnir. (a Lunardo)

SimonIn suma, o co le bone, o co le cattive, le fa tutto quel che le vol.

FeliceE cussì, sior Lunardo?...

LunardoAspettè. (con isdegno)

Felice(Mo che zoggia!)

LunardoLucietta. (amorosamente)

LuciettaSior.

LunardoVien qua.

LuciettaVegno. (si accosta bel bello)

LunardoTe vustu maridar?

Lucietta(si vergogna, e non risponde.)

LunardoVia, respondi, te vustu mandar? (con isdegno)

LuciettaSior sì, sior sì. (forte, tremando)

LunardoTi l’ha visto ah, el novizio?

LuciettaSior sì.

LunardoSior Maurizio.

MaurizioCossa gh’è? (ruvido)

LunardoVia, caro vecchio, no me respondè, vegnimo a dir el merito, cussì rustego.

MaurizioDisè pur su quel che volevi dir.

LunardoSe no gh’ave gnente in contrario, mia fia xe per vostro fio. (i due sposi si rallegrano)

MaurizioSto baron no lo merita.

FilippettoSior padre... (in aria di raccomandarsi)

MaurizioFarme un’azion de sta sorte? (senza guardar Filippetto)

FilippettoSior padre... (come sopra)

MaurizioNo lo vôi maridar.

FilippettoOh poveretto mi! (traballando mezzo svenuto)

LuciettaTegnilo, tegnilo.

FeliceMo via, che cuor gh’aveu? (a Maurizio)

LunardoEl fa ben a mortificarlo.

MaurizioVien qua. (a Filippetto)

FilippettoSon qua.

MaurizioXestu pentio de quel che ti ha fatto?

FilippettoSior sì, dasseno, sior padre.

MaurizioVarda ben, che anca se ti te maridi, veggio che ti me usi l’istessa ubbidienza, e che ti dipendi da mi.

FilippettoSior sì, ghe lo prometto.

MaurizioVegnì qua, siora Lucietta, ve accetto per fia; e ti, el cielo te benedissa; daghe la man.

FilippettoCome se fa? (a Simon)

FeliceVia, deghe la man; cussì.

Margarita(Poverazzo!)

Lunardo(Si asciuga gli occhi.)

MargaritaSior Simon, sior Cancian, sarè vu i compari.

CancianoSiora sì, semo qua, semo testimoni.

SimonE co la gh’averà un puttelo?

Filippetto(Ride e salta.)

Lucietta(si vergogna.)

LunardoO via, putti, stè aliegri. Xe ora che andemo a disnar.

FeliceDisè, caro sior Lunardo, quel forestier che per amor mio xe de là che aspetta, ve par convenienza de mandarlo via? El xe stà a parlar co sior Maurizio, el l’ha fatto vegnir qua elo. La civiltà non insegna a trattar cussì.

LunardoAdesso andemo a disnar.

FeliceInvidèlo anca elo.

LunardoSiora no.

FeliceVedeu? sta rusteghezza, sto salvadegume che gh’avè intorno, xe sta causa de tutti i desordeni che xe nati ancuo, e ve farà esser... Tutti tre, saveu? parlo con tutti tre: ve farà esser rabbiosi, odiosi, malcontenti, e universalmente burlai. Siè un poco più civili, trattabili, umani. Esaminè le azion de le vostre muggier, e co le xe oneste, donè qualcossa, sopportè qualcossa. Quel Conte forestier xe una persona propria, onesta, civil; a trattarlo no fazzo gnente de mal; lo sa mio mario, el vien con elo; la xe una pura e mera conversazion. Circa al vestir, co no se va drio a tutte le mode, co no se ruvina la casa, la pulizia sta ben, la par bon. In soma, se volè viver quieti, se volè star in bona co le muggier, fe da omeni, ma no da salvadeghi; comandè, no tiraneggiè, e amè, se volè esser amai.

CancianoBisogna po dirla: gran mia muggier!

SimonSeu persuaso, sior Lunardo?

LunardoE vu?

SimonMi sì.

LunardoDiseghe a quel sior forestier, che el resta a disnar con nu. (a Margarita)

MargaritaManco mal. Voggia el cielo che sta lizion abbia profittà.

MarinaE vu, nevodo, come la trattereu la vostra novizza? (a Filipetto)

FilippettoCussì; su l’ordene che ha ditto siora Felice.

LuciettaOh, mi me contento de tutto.

MargaritaGhe despiase solamente, co le cascate xe fiappe.

LuciettaMo via, no la m’ha gnancora perdonà?

FeliceA monte tutto. Andemo a disnar, che xe ora. E se el cuogo de sior Lunardo non ha provisto salvadeghi, a tola no ghe n’ha da esser, e no ghe ne sarà. Semo tutti desmesteghi, tutti boni amici, con tanto de cuor. Stemo aliegri, magnemo, bevemo, e femo un prindese alla salute de tutti quelli che con tanta bontà e cortesia n’ha ascoltà, n’ha sofferto, e n’ha compatio.

Fine della Commedia.