Le baruffe chiozzotte

Strada con varie casupole.

Pasquae Lucietta da una parte. Libera, Orsetta e Checca dall’altra. Tutte a sedere sopra seggiole di paglia, lavorando merletti sui loro cuscini posti ne’ loro scagnetti.

LuciettaCreature, cossa diseu de sto tempo?

OrsettaChe ordene xelo?

LuciettaMi no so, varè. Oe, cugnà, che ordene xelo? (a Pasqua)

PasquaNo ti senti che boccon de sirocco?

OrsettaXelo bon da vegnire de sottovento ?

PasquaSì ben, sì ben. Se i vien i nostri omeni, i gh’ha el vento in poppe.

LiberaAncuo o doman i doverave vegnire.

CheccaOh! bisogna donca che spessega a laorare: avanti che i vegna, lo vorave fenire sto merlo.

LuciettaDi’, Checca: quanto te n’amanca a fenire?

CheccaOh! me n’amanca un brazzo.

LiberaTi laori molto puoco, fia mia. (a Checca)

CheccaOh! quanto xe che gh’ho sto merlo su sto balon?

LiberaUna settemana.

CheccaBen! una settemana?

LiberaDestrìghete, se ti vuol la carpetta.

LuciettaOe, Checca, che carpetta te fastu?

CheccaUna carpetta niova de caliman.

LuciettaDasseno? Te mettistu in donzelon .?

CheccaIn donzelon? No so miga cossa che voggia dire.

OrsettaOh che pandola! No ti sa che co una putta xe granda, se ghe fa el donzelon; e che co la gh’ha el donzelon, xe segno che i soi i la vuol maridare?

CheccaOe, sorella! (a Libera)

LiberaFia mia.

CheccaMe voleu maridare?

LiberaAspetta che vegna mio mario.

CheccaDonna Pasqua, mio cugnà Fortunato no xelo andà a pescare co paron Toni?

PasquaSì, no lo sastu che el xe in tartana col mio paron e co Beppe so fradelo?

CheccaNo ghe xe anca Titta Nane co lori?

LuciettaSi ben: cossa voressistu dir? Cossa pretenderavistu da Titta Nane? (a Checca)

CheccaMi? gnente.

LuciettaNo ti sa che xe do anni che mi ghe parlo? E che col vien in terra, el m’ha promesso de darme el segno?

Checca(Malignaza culìa! La i vol tutti per ela!)

OrsettaVia, via, Lucietta, no star a bacilare. Avanti che Checca mia sorella se maride, m’ho da maridare mi, m’ho da maridare. Co vegnirà in terra Beppe to fradelo, el me sposerà mi, e se Titta Nane vorrà, ti te poderà sposare anca ti. Per mia sorela, gh’è tempo.

CheccaOh! vu, siora, no voressi mai che me maridasse. (a Orsetta)

LiberaTasi là; tendi al to laoriere.

CheccaSe fusse viva mia donna mare...

LiberaTasi, che te trago el balon in coste.

Checca(Sì, sì, me voggio maridare, se credesse de aver da tiore un de quei squartai che va a granzi).

Toffoloe suddette, poi Canocchia.

LuciettaOe, bondì, Toffolo.

ToffoloBondì, Lucietta.

OrsettaSior mamara, cossa sèmio nualtre?

ToffoloSe averè pazenzia, ve saluderò anca vualtre.

Checca(Anca Toffolo me piaserave).

PasquaCoss’è, putto? No laorè ancuó?

ToffoloHo laorà fin adesso. So sta col battello sotto marina a cargar dei fenochi: i ho portai a Brondolo al corrier de Ferrara, e ho chiappà la zornada.

LuciettaNe pagheu gnente?

ToffoloSì ben; comande.

Checca(Uh! senti che sfazzada?) (ad Orsetta)

ToffoloAspettè. Oe! zucche barucche . (chiama

Canocchia(Con una tavola con sopra vari pezzi di zucca gialla cotta) Comande, paron.

ToffoloLassè veder.

CanocchiaAdesso: varè, la xe vegnua fora de forno.

ToffoloVoleu, Lucietta? (le offerisce un pezzo di zucca)

LuciettaSì ben, dè qua.

ToffoloE vu, donna Pasqua, voleu?

PasquaDe diana! la me piase tanto la zucca barucca! Dèmene un pezzo.

ToffoloTolè. No la magnè, Lucietta?

LuciettaLa scotta. Aspetto che la se giazze.

CheccaOe! bara Canocchia.

CanocchiaSon qua.

CheccaDèmene anca a mi un bezze.

ToffoloSo qua mi; ve la pagherò mi.

CheccaSior no, no voggio.

ToffoloMo per cossa?

CheccaPerchè no me degno.

ToffoloS’ha degnà Lucietta.

CheccaSì sì, Lucietta xe degnevole, la se degna de tutto.

LuciettaCoss’è, siora? Ve ne aveu per mal, perchè so stada la prima mi?

CheccaMi co vu, siora, no me n’impazzo. E mi no togo gnente da nissun.

LuciettaE mi cossa toghio?

CheccaSiora sì, avè tolto anca i trigoli dal putto donzelo de bara Losco.

LuciettaMi, busiara?

PasquaA monte.

LiberaA monte, a monte.

CanocchiaGh’è nissun che voggia altro?

ToffoloAndè a bon viazo.

CanocchiaZucca barucca, barucca calda. (gridando parte)

I suddetti fuor di, Canocchia.

Toffolo(Arecordève, siora Checca, che m’avè dito che de mi no ve degnè).

Checca(Andè via, che no ve tendo).

Toffolo(E sì, mare de diana, gh’aveva qualche bona intenzion).

Checca(De cossa?)

Toffolo(Mio santolo me vol metter suso peota, e co son a traghetto, anca mi me vol mandare).

Checca(Dasseno?)

Toffolo(Ma vu avè dito che no ve degnè).

Checca(Oh! ho dito della zucca, no ho miga dito de vu).

LiberaOe, oe, digo: cossa xe sti parlari?

Toffolovarè? vardo a laorare.

LiberaAnde via de là, ve digo.

ToffoloCossa ve fazzio? Tolè; anderò via. (si scosta, e va bel bello dall’altra parte.)

Checca(Sia malignazo!)

Orsetta(Mo via, cara sorella, se el la volesse, savè che putto che el xe: no ghe la voressi dare?)

Lucietta(Cossa diseu, cugnà? La se mette suso a bonora).

Pasqua(Se ti savessi che rabbia che la me fa!) (a Lucietta)

Lucietta(varè che fusto! Viva cocchietto! la voggio far desperare). (da sè)

ToffoloSfadigheve a pian, donna Pasqua.

PasquaOh! no me sfadigo, no, fio: no vedè che mazzette grosse? El xe merlo da diese soldi.

ToffoloE vu, Lucietta?

LuciettaOh! el mio xe da trenta.

ToffoloE co bello che el xe!

LuciettaVe piaselo?

ToffoloMo co pulito! Mo cari quei deolini .

LuciettaVegnì qua; sentève.

Toffolo(Oh! qua son più alla bonazza ). (siede)

Checca(Oe! cossa diseu?) (a Orsetta, facendole osservare Toffolo vicino a Lucietta.)

Orsetta(Lassa che i fazza, no te n’impazzare). (a Checca)

Toffolo(Se starò qua, me bastonerali?) (a Lucietta)

Lucietta(Oh che matto!) (a Toffolo)

Orsetta(Cossa diseu?) (a Libera, accennando Lucietta)

ToffoloDonna Pasqua, voleu tabacco?

PasquaXelo bon?

ToffoloEl xe de quello de Malamocco.

PasquaDamene una presa.

ToffoloVolentiera.

Checca(Se Titta Nane lo sa, poveretta ela). (da sè)

ToffoloE vu, Lucietta, ghe ne voleu?

Lucietta(De qua, sì ben. Per far despetto a culìa). (accenna Checca)

Toffolo(Mo che occhi baroni!) (a Lucietta)

Lucietta(Oh giusto! No i xe miga quelli de Checca). (a Toffolo)

Toffolo(Chi? Checca? gnanca in mente). (a Lucietta)

Lucietta(varè, co bella che la xe!) (a Toffolo, accennando Checca, con derisione.)

Toffolo(Vara chiòe!) (a Lucietta)

Checca(Anca sì che i parla de mi). (da sè)

Lucietta(No la ve piase?) (a Toffolo)

Toffolo(Made). (a Lucietta)

Lucietta(I ghe dise puinetta). (a Toffolo, sorridendo)

Toffolo(Puinetta i ghe dise?) (a Lucietta, sorridendo e guardando Checca).

CheccaOe, digo; no so miga orba, varè. La voleu fenire? (forte verso Toffolo e Lucietta)

ToffoloPuina fresca, puina(forte imitando quelli che vendono la puina, cioè la ricotta.)

CheccaCossa xe sto parlare? Cossa xe sto puinare (s’alza)

OrsettaNo te n’impazzare. (a Checca, e s’alza)

LiberaTendi a laorare. (a Orsetta e Checca, alzandosi)

OrsettaChe el se varda elo, sior Toffolo Marmottina.

ToffoloCoss’è sto Marmottina?

OrsettaSior sì; credeu che nol sappiemo che i ve dise Toffolo Marmottina?

LuciettaVarè che sesti! varè che bella prudenzia!

OrsettaEh via, cara siora Lucietta Panchiana

LuciettaCossa xe sta Panchiana? Tendè a vu, siora Orsetta Meggiotto.

LiberaNo stè a strapazzar mie sorelle, che mare de diana...

PasquaPortè respetto a mia cugnà. (s’alza)

LiberaEh! tasè, donna Pasqua Fersora.

PasquaTasè vu, donna Libera Gallozzo.

ToffoloSe no fussi donne, sangue de un’anguria...

LiberaVegnirà el mio paron.

CheccaVegnirà Titta Nane. Ghe vôi contare tutto, ghe vôi contare.

LuciettaCóntighe. Cossa m’importa?

OrsettaChe el vegna paron Toni Canestro...

LuciettaSì, sì, che el vegna paron Fortunato Baìcolo...

OrsettaOh che temporale!

LuciettaOh che susio !

PasquaOh che bissabuova !

OrsettaOh che stramanio !

Paron Vicenzo e detti.

VicenzoOlà, olà! zitto, donne. Cossa diavolo gh’aveu?

LuciettaOe, vegnì qua, paron Vicenzo.

OrsettaOe, sentì, paron Vicenzo Lasagna

VicenzoQuieteve, che xe arrivà in sto ponto la tartana de paron Toni.

PasquaOe, zitto, che xe arrivà mio mario. (a Lucietta)

LuciettaUh, ghe sarà Titta Nane!

LiberaOe, putte, no fe che vostro cugnà sappia gnente.

OrsettaZitto, zitto, che gnanca Beppe no sappia.

ToffoloLucietta, so qua mi, no ve stè a stremire.

LuciettaVa via. (a Toffolo)

PasquaVia. (a Toffolo)

ToffoloA mi? sangue d’un bisatto!

PasquaVa a ziogare al trottolo.

LuciettaVa a ziogare a chiba.

ToffoloA mi, mare de diana? Anderò mo giusto, mo, da Checchina. ( s’accosta a Checca)

LiberaVia, sporco.

OrsettaCàvete.

CheccaVa in malora.

ToffoloA mi sporco? A mi va in malora? (con sdegno)

VicenzoVa in burchio.

ToffoloOlà, olà, paron Vicenzo. (con caldo)

VicenzoVa a tirar l’alzana. (gli dà uno scappellotto)

ToffoloGh’avè rason, che no voggio precipitare. (parte)

PasquaDove xeli co la tartana? (a Vicenzo)

VicenzoIn rio xe secco, no i ghe può vegnire. I xe ligai a Vigo. Se volè gnente, vago a vedere se i gh’ha del pesse, e se i ghe n’ha, ghe ne voi comprare per mandarlo a vendere a Pontelongo.

LuciettaOe, no ghe disè gnente. (a Vicenzo)

LiberaOe, paron Vicenzo, no ghe stessi miga a contare.

VicenzoChe cade!

OrsettaNo ghe stessi a dire...

VicenzoMo no stè a bacilare. (parte)

LiberaVia, no femo che i nostri omeni n’abbia da trovarè in baruffa.

PasquaOh, mi presto la me monta, e presto la me passa.

LuciettaChecca, xestu in collera?

CheccaNo ti sa far altro che far despetti.

OrsettaA monte, a monte. Semio amighe?

LuciettaNo voleu che lo semio?

OrsettaDame un baso, Lucietta.

LuciettaTiò, vissere. (si badano)

OrsettaAnca ti, Checca.

CheccaNo gh’ho bon stomego.

LuciettaVia, matta.

CheccaVia, che ti xe doppia co fa le ceole.

LuciettaMi? Oh, ti me cognossi puoco. Viè qua; dame un baso.

CheccaTiò. Varda ben, no me minchionare.

PasquaTiò el to balon, e andemo in cà, che po anderemo in tartana. (piglia lo scagno col cuscino, e parte)

LiberaPutte, andemo anca nu, che li anderemo a incontrare. (parte col suo scagno)

OrsettaNo vedo l’ora de vederlo el mio caro Beppe. (parte col suo scagno)

LuciettaBondì, Checca. (prende il suo scagno)

CheccaBondì. Vòggieme ben. (prende il suo scagno, e parte)

LuciettaNo t’indubitare. (prende il suo scagno, e parte)

Veduta del canale con varie barche pescareccie, fra le quali la tartana di paron Toni.

Paron Fortunato, Beppo, Titta Nane e altri uomini nella tartana, e paron Toni in terra, poi paron Vicenzo

ToniVia, da bravi, a bel bello, mettè in terra quel pesse.

VicenzoBen vegnuo, paron Toni.

ToniSchiao, paron Vicenzo.

VicenzoCom’ela andada?

ToniEh! no se podemo descontentare.

VicenzoCossa gh’aveu in tartana?

ToniGh’avemo un puoco de tutto, gh’avemo.

VicenzoMe dareu quattro cai de sfoggi?

ToniPare, sì.

VicenzoMe dareu quattro cai de barboni ?

ToniPare, sì.

VicenzoBòseghe ghe n’aveu?

ToniMare de diana! ghe n’avemo de cussì grande, che le pare, co buò respetto, lengue de manzo, le pare.

VicenzoE rombi?

ToniGhe n’aemo siè, ghe n’aemo, co è el fondi d’una barila.

VicenzoSe porlo veder sto pesse?

ToniAndè in tartana, che ghe xe paron Fortunato; avanti che lo spartimo, fèvelo mostrare.

VicenzoAnderò a vede se se podemo giustare.

ToniAndè a pian. Oe, deghe man a paron Vicenzo.

Vicenzo(Gran boni omeni che xe i pescaori!) (va in tartana)

ToniMagari lo podessimo vende tutto a bordo el pesse, che lo venderia volentiera. Se andemo in man de sti bazariotti, no i vuol dar gnente; i vuol tutto per lori. Nualtri, poverazzi, andemo a rischiare la vita in mare, e sti marcanti col baretton de veludo i se fa ricchi co le nostre fadighe.

Beppo(Scende di tartana con due canestri) Oe, fradelo?

ToniCoss’è, Beppe? Cossa vustu?

BeppoSe ve contentessi, vorria mandar a donare sto cao de barboni al Lustrissimo.

ToniPer cossa mo ghe li vustu donare?

BeppoNo savè che l’ha da essere mio compare?

ToniBen! mandegheli, se ti ghe li vuol mandare. Ma cossa credistu? Che in t’un bisogno che ti gh’avessi, el se moverave gnanca dalla cariega? Col te vederà, el te metterà una man sulla spalla: Bravo, Beppe, te ringrazio, comandeme. Ma se ti ghe disi: Lustrissimo, me premeria sto servizio; nol s’arecorda più dei barboni: nol te gh’ha gnanca in mente; nol te cognosse più nè per compare, nè per prossimo, ne per gnente a sto mondo.

BeppoCossa voleu che fazze? Per sta volta lassè che ghe li manda.

ToniMi no te digo che no ti li mandi.

BeppoChiò, Ménola. Porta sti barboni a sior cavaliere; dighe che ghe lo mando mi sto presente. (il putto parte)

Pasqua, Luciettae detti.

PasquaParon! (a Toni)

ToniOh muggiere!

LuciettaFradelo! (a Toni)

ToniBondì, Lucietta.

LuciettaBondì, Beppe.

BeppoStastu ben, sorela?

LuciettaMi sì. E ti?

BeppoBen, ben. E vu, cugnà, steu ben?

PasquaSì, fio. Avè fatto bon viazo? (a Toni)

ToniCossa parleu de viazo? Co semo in terra, no se recordemo più de quel che s’ha passao in mare. Co se pesca, se fa bon viazo, e co se chiappa , no se ghe pensa a rischiar la vita. Avemo portà del pesse, e semo aliegri, e semo tutti contenti.

PasquaVia, via, manco mal. Seu stai in porto?

ToniSì ben, semo stai a Senegaggia.

LuciettaOe, m’aveu portà gnente?

ToniSì, t’ho porta do pera de calze sguarde e un fazzoletto da collo.

LuciettaOh! caro el mio caro fradelo; el me voi ben mio fradelo.

PasquaE a mi, sior, m’aveu porta gnente?

ToniAnca a vu v’ho portao da farve un cottolo e una vestina.

PasquaDe cossa?

ToniVedere.

PasquaMo de cossa?

ToniVedere, ve digo, vedere.

LuciettaE ti, m’astu portà gnente? (a Beppo)

BeppoVara chiòe! Cossa vustu che mi te porte? Mi ho compra l’anelo per la mia novizza

LuciettaXelo bello?

BeppoVelo qua eh! Varda. (le mostra l’anello)

LuciettaOh co bello che el xe! Per culìa sto anelo?

BeppoPer cossa mo ghe distu culìa?

LuciettaSe ti savessi cossa che la n’ha fatto! Domandighe alla cugnà: quella frascona de Orsetta, e quell’altra scagazzera de Checca, comuodo che le n’ha strapazzao. Oh! cossa che le n’ha dito!

PasquaE donna Libera n’ala dito puoco? Ne podevela malmenare più de quello che la n’ha malmenao?

ToniCoss’è? Coss’è sta?

BeppoCossa xe successo?

LanciettaGnente. Lengue cattive. Lengue da tenaggiare.

PasquaSemo là sulla porta che laoremo col nostro balon...

LuciettaNu no se n’impazzemo...

PasquaSe savessi! Causa quel baron de Toffolo Marmottina.

LuciettaLe gh’ha zelusia de quel bel suggetto.

BeppoCossa! Le ha parla co Toffolo Marmottina?

LuciettaSe ve piase.

ToniO via, no vegnì adesso a metter suso sto putto, e a far nassere delle custion.

LuciettaUh se savessè.

PasquaTasi, tasi, Lucietta, che debotto torremo de mezo nu.

BeppoCon chi parlavelo Marmottina?

LuciettaCon tutte.

BeppoAnca con Orsetta?

LuciettaMe par de sì.

BeppoSangue de diana!

ToniOh via, fenimola, che no voggio sussuri.

BeppoNo, Orsetta no la voggio altro; e Marmottina, corpo de una balena, el me l’ha da pagare.

ToniAnemo, andemo a casa.

LuciettaTitta Nane dove xelo?

ToniEl xe in tartana. (con sdegno)

LuciettaAlmanco lo vorria saludare.

ToniAndemo a casa, ve digo.

LuciettaVia, che pressa gh’aveu?

ToniPodevi far de manco de vegnire qua a sussurare.

LuciettaVedeu, cugnà? Avevimo dito de no parlàre.

PasquaE chi xe stada la prima a schittare ?

LuciettaOh! mi coss’oggio dito?

PasquaE mi coss’oggio parlà?

BeppoAvè dito tanto, che se fusse qua Orsetta, ghe daria un schiaffazzo in tel muso. Da culìa no vol altro. Voggio vender l’anelo.

LuciettaDàmelo a mi, dàmelo.

BeppoEl diavolo che ve porta.

LuciettaOh che bestia!

ToniTo danno, ti meriti pezo. A casa, te digo. Subito a casa.

LuciettaVarè che sesti! Cossa songio? La vostra massera? Sì, sì, no v’indubitè, che co vu no ghe voggio stare. Co vederò Titta Nane, ghe lo dirò. O che el me sposa subito, o per diana de dia, voggio andar più tosto a servire. (parte)

PasquaMo gh’avè dei gran tiri da matto.

ToniVoleu ziogar che debotto... (fa mostra di volerle dare)

PasquaMo che omeni! Mo che omeni malignazi! (parte)

ToniMo che donne; mo che donne da pestare co fa i granzi per andare a pescare. (parte)

Fortunato, Titta Nane, Vicenzoche scendono dalla tartana con uomini carichi di canestri.

Titta NaneCossa diavolo xe sta quel sussuro?

VicenzoGnente, fradelo, no saveu? Donna Pasqua Farsora la xe una donna che sempre cria.

Titta NaneCon chi criàvela?

VicenzoCon so mario.

Titta NaneLucietta ghe gierela?

VicenzoMe par de sì, che la ghe fusse anca ela.

Titta NaneSia maledìo! Giera là sotto prova a stivare el pesse: no ho gnanca podesto vegnire in terra.

VicenzoOh che caro Titta Nane! Aveu paura de no vederla la vostra novizza?

Titta NaneSe savessi! Muoro de voggia.

FortunatoParò Izenzo. (parla presto, e chiama paron Vicenzo)

VicenzoCoss’è, paron Fortunato?

FortunatoQuesto xe otto pesse. Quato cai foggi, do cai baboni, sie, sie, sie boseghe, e un cao baccole

VicenzoCossa?

FortunatoE un cao baccole.

VicenzoNo v’intendo miga.

FortunatoNo intendè? Quattro cai de sfoggi, do cai de barboni, sie boseghe, e un cao de baracole.

Vicenzo(El parla in t’una certa maniera...).

FortunatoMandè a casa e pesse, vegniò po mi a to i bezzi.

VicenzoMissier sì, co volè i vostri bezzi, vegnì, che i sarà parecchiai.

FortunatoNa pesa abacco.

VicenzoCome?

FortunatoTabacco, tabacco.

VicenzoHo capìo. Volentiera. (gli dà tabacco)

FortunatoHo perso a scattoa in mare, e in tartana gh’è puochi e to tabacco. A Senegaggia e n’ho comprao un puoco; ma no xe e nostro da Chioza. Tabacco, tabacco de Senegaggia, e tabacco, e pare balini chioppo.

VicenzoCompatime, paron Fortunato, mi no v’intendo una maledetta.

FortunatoOh bella, bella, bella! no intendè? Bella! no parlo mia foeto, parlo chiozzotto, parlo.

VicenzoHo capìo. A revederse, paron Fortunato.

FortunatoSioìa, paò Izenzo.

VicenzoSchiavo, Titta Nane.

Titta NaneParon, ve saludo.

VicenzoPutti, andemo. Portè quel pesse con mi. (Mo caro quel paron Fortunato! El parla che el consola). (parte)

Fortunato e Titta Nane.

Titta NaneVoleu che andemo, paron Fortunato?

FortunatoPetè.

Titta NaneCossa voleu che aspettemo?

FortunatoPetè.

Titta NanePetè, petè, cossa ghe xe da aspettare?

FortunatoI ha a potare i terra de atro pesse, e de a faìna. Petè.

Titta NanePetémo. (caricandolo)

FortunatoCoss’è to bulare? Coss’è to ciare, coss’è to zigare?

Titta NaneOh! tasè, paron Fortunato. Xe qua vostra muggiere co so sorela Orsetta e co so sorela Checchina.

FortunatoOh oh, mia muggiere, mia muggiere! (con allegria)

Libera, Orsetta, Checca e detti.

LiberaParon, cossa feu che no vegnì a casa? (a Fortunato)

FortunatoApetto e pesse, apetto. Ossa fatu, muggiere? Tatu ben (3), muggiere?

LiberaStago ben, fio; e vu steu ben?

FortunatoTago ben, tago. Cugnà, saudo; saudo, Checca, saudo. (saluta)

OrsettaSioria, cugnà.

CheccaCugnà, bondì sioria.

OrsettaSior Titta Nane, gnanca?

Titta NanePatrone.

CheccaStè molto alla larga, sior. Cossa gh’aveu paura? Che Lucietta ve diga roba?

Titta NaneCossa fala Lucietta? Stala ben?

OrsettaEh! la sta ben sì, quella cara zoggia.

Titta NaneCoss’è, no sè più amighe?

OrsettaOh! e come che semo amighe. (ironico)

CheccaLa ne vol tanto ben! (con ironia)

LiberaVia, putte, tasè. Avemo donà tutto ; avemo dito de no parlare, e no veggio che la possa dire de madesì, e de qua, de là, che vegnimo a pettegolare.

FortunatoOe, muggiere, ho portao de a faìna da sottovento, de a faìna e sogo tucco, e faemo a poenta, faemo.

LiberaBravo! ave portà della farina de sorgo turco? Gh’ho ben a caro dasseno.

FortunatoE ho portao...

Titta NaneVorave che me disessi... (a Libera)

FortunatoLassè parlare i omeni, lassè parlare. (a Titta Nane)

LiberaCaro vu, quieteve un pochetto. (a Fortunato)

Titta NaneVorave che me disessi cossa ghe xe sta con Lucietta.

LiberaGnente. (con malizia)

Titta NaneGnente?

OrsettaGnente, via, gnente. (urtando Libera)

CheccaXe meggio cussì, gnente. (urtando Orsetta)

FortunatoOe putti, potè in terra e sacco faìna, (verso la tartana)

Titta NaneMo via, care creature, se gh’è sta qualcossa, diselo. Mi no voggio che siè nemighe. So che vualtre sè bona zente. So che anca Lucietta la xe una perla.

LiberaOh caro!

OrsettaOh che perla!

CheccaOh co palicaria!

Titta NaneCossa podeu dir de quella putta?

OrsettaGnente.

CheccaDomandeghelo a Marmottina.

Titta NaneChi elo sto Marmottina?

LiberaMo via, putte, tasè. Cossa diavolo gh’aveu che no ve podè tasentare?

Titta NaneE chi elo sto Marmottina?

OrsettaNo lo cognossè Toffolo Marmottina?

CheccaQuel battelante, no lo cognossè? (scendono di tartana col pesce e un sacco.)

FortunatoAndemo, andemo, el pesse e a faìna, (a Titta Nane)

Titta NaneEh, sia maledetto! (a Fortunato) Cossa gh’ìntrelo con Lucietta?

CheccaEl se ghe senta darente.

OrsettaEl vol imparar a laorare a mazzette.

CheccaEl ghe paga la zucca barucca.

LiberaE po sto baron, per causa soa el ne strapazza.

Titta NaneMo, me la disè ben grandonazza!

FortunatoA casa, a casa, a casa. (alle donne)

LiberaOe, el n’ha manazzà fina. (a Titta Nane)

CheccaEl m’ha dito puinetta.

OrsettaTutto per causa della vostra perla.

Titta NaneDov’elo? dove stalo? dove zirelo? dove lo poderavio trovare? (affannoso)

OrsettaOe, el sta de casa in calle della Corona, sotto el sottoportego in fondi per sboccar in canale.

LiberaEl sta in casa co bara Trigolo.

CheccaE el battelo el lo gh’ha in riode Palazzo, in fazza alla pescaria, arente al battelo de Checco Bodolo.

Titta NaneA mi; lasse far a mi: se lo trovo, lo taggio in fette co fa l’asiao.

CheccaEh! se lo volè trovare, lo troverè da Lucietta.

Titta NaneDa Lucietta?

OrsettaSì, dalla vostra novizza.

Titta NaneNo, no la xe più la mia novizza. La voggio lassare, la voggio impiantare; e quel galiotto de Marmottina, sangue de diana, che lo voggio scannare. (parte)

FortunatoAnemo, a casa ve digo; andemo a casa, andemo.

LiberaSì, andemo, burattaora, andemo.

FortunatoCossa seu egnue a dire? Cossa seu egnue a fare? Cossa seu egnue a tegolare? A fare precipitare, a fare? Mae e diana! Se nasse gnente, gnente se nasse, e oggio maccare el muso, e oggio maccare, e oggio fae stae in letto, e oggio: in letto, in letto, maleettonazze, in letto. (parte)

LiberaTolè suso! Anca mio mario me manazza . Per causa de vualtre pettazze, me tocca sempre a tiore de mezzo a mi, me tocca. Mo cossa diavolo seu? Mo che lengua ghaveu? Ave promesso de no parlare, e po vegnì a dire, e po vegnì a fare. Mare de troccolo, che me volè far desperare, (parte)

OrsettaSentistu?

CheccaOe! cossa gh’astu paura?

OrsettaMi? gnente.

CheccaSe Lucietta perderà el novizzo, so danno.

OrsettaMi lo gh’ho intanto.

CheccaE mi me lo saverò trovare.

OrsettaOh che spasemi!

CheccaOh che travaggi!

OrsettaGnanca in mente!

CheccaGnanca in ti busi del naso! (partono)

Strada con case, come nella prima scena..

Toffolo, poi Beppo.

ToffoloSì ben, ho fatto male; ho fatto male, ho fatto male. Co Lucietta no me ne doveva impazzare. La xe novizza; co ela no me n’ho da impazzare. Checca xe ancora donzella: un de sti zorni i la metterà in donzelon, e co ela posso fare l’amore. La se n’ha avuo per male. La gh’ha rason, se la se n’ha avuo per male. Xe segno che la me vol ben, xe segno. Se la podesse vedè almanco! Se ghe podesse un puoco parlare, la voria pasentare. Xe vegnù paron Fortunato: sì ben che no la gh’ha el donzelon, ghe la poderia domandare. La porta xe serrada; no so se i ghe sia in casa, o se no i ghe sia in casa. (si accosta alla casa)

BeppoVelo qua quel furbazzo! (uscendo dalla sua casa)

ToffoloSe podesse, vorave un puoco spionare. (si accosta di più)

BeppoOlà! olà! sior Marmottina.

ToffoloCoss’è sto Marmottina?

BeppoCavete.

ToffoloVara, chiòe! Cavete! Coss’è sto cavete?

BeppoVustu ziogare che le dago tante peae , quante che ti ghe ne può portare?

ToffoloChe impazzo ve daghio?

BeppoCossa fastu qua?

ToffoloPazzo quel che voggio, fazzo.

BeppoE mi qua no voggio che ti ghe staghe.

ToffoloE mi che voggio mo stare. Ghe voggio stare, ghe voggio.

BeppoVa via, te digo.

ToffoloMade.

BeppoVa via, che te dago una sberla.

ToffoloMare de diana, ve trarò una pierada. (raccoglie delle pietre)

BeppoA mi, galiotto? (mette mano a un coltello)

ToffoloLasseme star, lasseme.

BeppoCavete, te digo.

ToffoloNo me voggio cavare gnente, no me voggio cavare.

BeppoVa via, che te sbuso.

ToffoloSta da lonzi, che te spacco la testa. (con un sasso)

BeppoTìreme, se ti gh’ha cuor.

Toffolo(Tira dei sassi, e Beppo tenta cacciarsi sotto.)

Paron Toni esce di casa, poi rientra, e subito torna a sortire; poi Pasqua e Lucietta.

ToniCossa xe sta cagnara?

Toffolo(Tira un sasso a paron Toni.)

ToniAgiuto; i m’ha dà una pierà. Aspetta, galiotto, che vôi che ti me la paghe. (entra in casa)

ToffoloMi no fazzo gnente a nissun, no fazzo. Cossa me vegniu a insolentare? (prendendo sassi)

BeppoMetti zo quelle piere.

ToffoloMetti via quel cortello.

ToniVia, che te taggio a tocchi. (sorte con un pistolese)

PasquaParon, fermeve. (trattenendo paron Toni)

LuciettaFradei, fermeve. (trattenendo paron Toni)

BeppoLo volemo mazzare.

LuciettaVia, strambazzo, fermete. (trattiene Beppo)

ToffoloStè in drio, che ve coppo. (minacciando con sassi)

LuciettaZente! (gridando)

PasquaCreature! (gridando)

Paron Fortunato, Libera, Orsetta, Checca. Uomini che portano pesce e farina, ed i suddetti.

FortunatoCom’ela? Com’ela? Forti, forti, com’ela?

OrsettaOe! custion.

CheccaCustion? poveretta mi! (corre in casa)

LiberaInspiritai, fermeve.

BeppoPer causa vostra. (alle donne)

OrsettaChi? cossa?

LiberaMe maraveggio de sto parlare.

LuciettaSì, sì, vualtre tegnì tenzon.

PasquaSì, sì, vualtre sè zente da precipitare.

OrsettaSentì che sproposità!

LiberaSentì che lengue!

BeppoVe lo mazzerò sulla porta.

OrsettaChi?

BeppoQuel furbazzo de Marmottina.

ToffoloVia, che mi no son Marmottina. (tira de’ sassi)

PasquaParon, in casa. (spingendo Toni)

LuciettaIn casa, fradelo, in casa. (spingendo Beppo)

ToniStè ferma.

PasquaIn casa, ve digo, in casa. (lo fa entrare in casa con lei)

BeppoLasseme stare. (a Lucietta)

LuciettaVa drento, te digo, matto; va drento. (lo fa entrare con lei. Serrano la porta)

ToffoloBaroni, sassini, vegnì fuora se gh’avè coraggio.

OrsettaVa in malora. (a Toffolo)

LiberaVatte a far squartare. (lo spinge via)

ToffoloCoss’è sto spenzere? Cossa xe sto parlare?

FortunatoVa ia, va ia, che debotto, se te metto e ma a torno, te fazzo egnì fuora e buelle pe a bocca.

ToffoloVe porto respetto, ve porto, perchè sè vecchio, e perchè se cugnà de Checchina. Ma sti baroni, sti cani, sangue de diana, me l’ha da pagare. (verso la porta di Toni)

Titta Nane con pistolese, e detti.

Titta NaneVardete, che te sbuso. (contro Toffolo, battendo il pistolese per terra.)

ToffoloAgiuto! (si tira alla porta)

FortunatoSaldi. Femève. (lo ferma)

LiberaNo fe!

OrsettaTegnilo.

Titta NaneLassème andare, lassème. (si sforza contro Toffolo)

ToffoloAgiuto! (dà nella porta che si apre, e cade dentro)

FortunatoTitta Nane, Titta Nane, Titta Nane. (tenendolo e tirandolo)

LiberaMenèlo in casa, menèlo. (a Fortunato)

Titta NaneNo ghe voggio vegnire. (sforzandosi)

FortunatoTi gh’ha ben da egnire. (lo tira in casa per forza)

LiberaOh che tremazzo!

OrsettaOh che batticuore!

Pasqua(Cacciando di casa Toffolo) Va via de qua.

Lucietta(Cacciando Toffolo) Va in malora.

PasquaScarcavallo.. (via)

LuciettaScavezzacollo. (via, e serra la porta)

ToffoloCossa diseu, creature? (a Libera e Orsetta)

LiberaTo danno. (vìa)

OrsettaMagari pezo. (via)

ToffoloSangue de diana, che li vôi querelare. (parte)

Fine dell’Atto Primo.

Cancelleria criminale.

Isidoro al tavolino scrivendo, poi Toffolo, poi il Comandadore.

Isidoro(Sta scrivendo.)

ToffoloLustrissimo siò canciliere.

IsidoroMi no son el cancellier; son el cogitor.

ToffoloLustrissimo siò cogitore.

IsidoroCossa vustu?

ToffoloL’abbia da savere che un baron, lustrissimo, m’ha fatto impazzo, e el m’ha manazao col cortelo, e el me voleva dare, e po dopo xe vegnù un’altra canaggia, lustrissimo..)

IsidoroSiestu maledetto! Lassa star quel lustrissimo.

ToffoloMo no, siò cogitore, la me staga a sentire, e cussì, comuodo ch’a ghe diseva, mi no ghe fazzo gnente, e i m’ha dito che i me vuol amazzare.

IsidoroVien qua; aspetta. (prende un foglio per scrivere)

ToffoloSo qua, lustrissimo. (Maledii! I me la gh’ha da pagare.).

IsidoroChi estu ti?

ToffoloSo battelante, lustrissimo.

IsidoroCossa gh’astu nome?

ToffoloToffolo.

IsidoroEl cognome?

ToffoloZavatta.

IsidoroAh! no ti xe scarpa, ti xe zavatta.

ToffoloZavatta, lustrissimo.

IsidoroDa dove xestu?

ToffoloSo chiozzotto, da Chiozza.

IsidoroAstu padre?

ToffoloMio pare, lustrissimo, el xe morto in mare.

IsidoroCossa gh’avevelo nome?

ToffoloToni Zavatta, Baracucco.

IsidoroE ti gh’astu nissun soranome?

ToffoloMi no, lustrissimo.

IsidoroXe impossibile che no ti gh’abbi anca ti el to soranome.

ToffoloChe soranome vuorla che gh’abbia?

IsidoroDime, caro ti: no xestu sta ancora, me par, in cancelleria?

ToffoloSiò sì, una volta me son vegnù a esaminare.

IsidoroMe par, se no m’inganno, d’averte fatto citar col nome de Toffolo Marmottina.

ToffoloMi so Zavatta, no so Marmottina. Chi m’ha messo sto nome, xe stao una carogna, lustrissimo.

IsidoroDebotto te dago un lustrissimo sulla coppa.

ToffoloL’abbia la bontà de compatire.

IsidoroChi xe quei che t’ha manazzà?

ToffoloParon Toni Canestro, e so fradelo, Beppe Cospettoni; e po dopo Titta Nane Moletto .

IsidoroGh’aveveli arme?

ToffoloMare de diana se i ghe n’aveva! Beppe Cospettoni gh’aveva un cortelo da pescaore. Paron Toni xe vegnuo fuora con un spadon da taggiare la testa al toro, e Titta Nane gh’aveva una sguèa de quelle che i tien sotto poppe in tartana.

IsidoroT’hai dà? T’hai ferìo?

ToffoloMade. I m’ha fatto paura.

IsidoroPer cossa t’hai manazzà? Per cossa te voleveli dar?

ToffoloPer gnente.

IsidoroAveu crià? Ghe xe sta parole?

ToffoloMi no gh’ho dito gnente.

IsidoroXestu scampà? T’astu defeso? Come xela fenìa?

ToffoloMi so sta là... cussì... Fradei, digo, se me volè mazzare, mazzème, digo.

IsidoroMa come xela fenìa?

ToffoloXe arrivao delle buone creature, e i li ha fatti desmettere, e i m’ha salvao la vita.

IsidoroChi xe sta ste creature?

ToffoloParon Fortunato Cavicchio, e so muggiere donna Libera Galozzo, e so cugnà Orsetta Meggiotto, e un’altra so cugnà Checca Pumetta.

Isidoro(Sì sì, le cognosso tutte custìe. Checca tra le altre xe un bon tocchetto). (scrive) Ghe giera altri presenti?

ToffoloGhe giera donna Pasqua Fersora e Lucietta Panchiana.

Isidoro(Oh! anca queste so chi le xe). (scrive) Gh’astu altro da dir?

ToffoloMi no, lustrissimo.

IsidoroFastu nissuna istanza alla giustizia?

ToffoloDe cossa?

IsidoroDomandistu che i sia condannai in gnente?

ToffoloLustrissimo sì.

IsidoroIn cossa?

ToffoloIn galìa, lustrissimo.

IsidoroTi sulle forche, pezzo de aseno.

ToffoloMi, sior? Per cossa?

IsidoroVia, via, pampalugo. Basta cussì, ho inteso tutto, (scrive in un piccolo foglio.)

Toffolo(No vorave che i me vegnisse anca lori a querelare, perchè gh’ho tratto delle pierae. Ma che i vegna pure; mi so sta el primo a vegnire, e chi è 'l primo, porta via la bandiera). (da sè)

Isidoro(Suona il campanello.)

ComandadoreLustrissimo.

IsidoroAnde a citar sti testimoni. (s’alza)

ComandadoreLustrissimo sì, la sarà servida.

ToffoloLustrissimo, me raccomando.

IsidoroBondì, Marmottina.

ToffoloZavatta, per servirla.

IsidoroSì, zavatta, senza siòla, senza tomera, senza sesto, e senza modello. (parte)

ToffoloEl me vol ben el siò cogitor. (al comandadore, ridendo)

ComandadoreSì, me n’accorzo. Xeli per vu sti testimoni?

ToffoloSiò sì, siò comandadore.

ComandadoreVe preme che i sia citai?

ToffoloMe preme seguro, siò comandadore.

ComandadoreMe paghereu da bever?

ToffoloVolentiera, siò comandadore.

ComandadoreMa mi no so miga dove che i staga

ToffoloVe l’insegnerò mi, siò comandadore.

ComandadoreBravo, sior Marmottina.

ToffoloSieu maledetto, siò comandadore. (partono)

Strada, come nella prima scena dell’atto primo.

Pasqua e Lucietta escono dalla loro casa, portando le loro sedie di paglia, i loro scagni e i loro cuscini, e siedono, e si mettono a lavorare merletti..

LuciettaAle mo fatto una bella cossa quelle pettazze? Andare a dire a Titta Nane che Marmottina m’è vegnù a parlare?

PasquaE ti astu fatto ben a dire al to fradelo quello che ti gh’ha dito?

LuciettaE vu, siora? No avè dito gnente, siora?

PasquaSì ben; ho parlà anca mi, e ho fatto mal a parlare.

LuciettaMalignazo! Aveva zurà anca mi de no dire.

PasquaLa xe cussì, cugnà, credème, la xe cussì. Nualtre femene, se no parlemo, crepemo.

LuciettaOe; no voleva parlare, e no m’ho podesto tegnire. Me vegniva la parola alla bocca, procurava a inghiottire e me soffegava. Da una recchia i me diseva: tasi; da quell’altra i diseva: parla. Oe, ho serrà la recchia del tasi, e ho slargà la recchia del parla; e ho parlà fina che ho podesto.

PasquaMe despiase che i nostri omeni i ha avuo da precipitare.

LuciettaEh! gnente. Toffolo xe un martuffo; no sarà gnente.

PasquaBeppe vol licenziar Orsetta.

LuciettaBen! El ghe ne troverà un’altra; a Chiozza no gh’è carestia de putte.

PasquaNo, no; de quarantamile aneme che semo, mi credo che ghe ne sia trentamile de donne.

LuciettaE quante che ghe ne xe da maridare!

PasquaPer questo, vedistu? me despiase, che se Titta Nane te lassa, ti stenterà a trovarghene un altro.

LuciettaCossa gh’oggio fatto mi a Titta Nane?

PasquaGnente no ti gh’ha fatto; ma quelle pettegole l’ha messo suso.

LuciettaSe el me volesse ben, nol ghe crederave.

PasquaNo sastu che el xe zeloso?

LuciettaDe cossa? No se può gnanca parlare? No se può ridere? No se se può devertire? I omeni i sta diese mesi in mare; e nualtre avemo da star qua muffe muffe a tambascare co ste malignaze mazzocche?

PasquaOe, tasi, tasi; el xe qua Titta Nane.

LuciettaOh! el gh’ha la smara. Me n’accorzo, col gh’ha la smara.

PasquaNo ghe star a fare el muson.

LuciettaSe el me lo farà elo, ghe lo farò anca mi.

PasquaGhe vustu ben?

LuciettaMi sì.

PasquaMòlighe, se ti ghe vol ben.

LuciettaMi no, varè.

PasquaMo via, no buttare testarda.

LuciettaOh! piuttosto crepare.

PasquaMo che putta morgnona!

Titta Nane e dette.

Titta Nane(La voria licenziare; ma no so come fare). (da sè)

Pasqua(Vàrdelo un poco). (a Lucietta)

Lucietta(Eh! che ho da vardare al mio merlo mi, ho da vardare). (a Pasqua)

Pasqua(Ghe pesterave la testa su quel balon!) (da sè)

Titta Nane(No la me varda gnanca. No la me gh’ha gnanca in mente).

PasquaSioria, Titta Nane.

Titta NaneSioria.

Pasqua(Saludilo). (a Lucietta)

Lucietta(Figureve, se voggio esser la prima mi!) (a Pasqua)

Titta NaneGran premura de laorare!

PasquaCossa diseu? Semio donne de garbo, fio?

Titta NaneSì, sì, co se puol, se fa ben a spessegare , perchè co vien dei zoveni a sentarse arente, no se puol laorare.

Lucietta(Tossisce con caricatura.)

Pasqua(Mòlighe). (a Lucietta)

Lucietta(Made).

Titta NaneDonna Pasqua, ve piase la zucca barucca?

PasquaVarè vedè! Per cossa me lo domandeu?

Titta NanePerchè gh’ho la bocca.

Lucietta(Sputa forte.)

Titta NaneGran catarro, patrona!

LuciettaLa zucca me fa spuare. (lavorando senza alzar gli occhi)

Titta NaneCussì v’avessela soffegà. (con isdegno)

LuciettaPossa crepare chi mi vuol male. (come sopra)

Titta Nane(Orsù, l’ho dita, e la voggio fare). Donna Pasqua, parlo co vu, che sè donna. A vu v’ho domandà vostra cugnà Lucietta, e a vu ve digo che la licenzio.

PasquaVarè che sesti! Per cossa?

Titta NanePer cossa, per cossa!...

Lucietta(S’alza per andar via.)

PasquaDove vastu?

LuciettaDove che voggio. (va in casa, e a suo tempo ritorna)

PasquaNo stè a badare ai pettegolezzi. (a Titta Nane)

Titta NaneSo tutto, e me maraveggio de vu, e me maraveggio de ela.

PasquaMo se la ve vol tanto ben.

Titta NaneSe la me volesse ben, no la me volterave le spalle.

PasquaPoverazza! La sarà andada a pianzere, la sarà andada.

Titta NanePer chi a pianzer? Per Marmottina?

PasquaMo no, Titta Nane, mo no, che la ve vol tanto ben! che co la ve vede andar in mare, ghe vien l’angossa. Co vien suso dei temporali, la xe mezza matta; la se stremisse per causa vostra. La se leva suso la notte, la va al balcon a vardar el tempo. La ve xe persa drio, no la varda per altri occhi che per i vostri.

Titta NaneE perchè mo no dirme gnanca una bona parola?

PasquaNon la puol; la gh’ha paura; la xe propriamente ingroppà.

Titta NaneNo gh’ho rason fursi de lamentarme de ela?

PasquaVe conterò mi, come che la xe sta.

Titta NaneSior no; voi che ela mel diga, e che la confessa, e che la me domanda perdon.

PasquaGhe perdonereu?

Titta NaneChi sa? Poderave esser de sì. Dove xela andà?

PasquaVela qua, vela qua che la vien.

LuciettaTolè, sior, le vostre scarpe, le vostre cordelle, e la vostra zendalina che m’avè dà. (getta tutto in terra)

PasquaOh poveretta mi! Xestu matta? (raccoglie la roba, e la mette sulla seggiola.)

Titta NaneA mi sto affronto?

LuciettaNo m’aveu licenzià? Tolè la vostra roba, e pettèvela.

Titta NaneSe parlerè co Marmottina, lo mazzerò.

LuciettaOh viva diana! M’avè licenzià, e me voressi anca mo comandare?

Titta NaneV'ho licenzià per colù, v’ho licenzià.

PasquaMe maraveggio anca, che crediè che Lucietta se voggia taccare con quel squartao .

LuciettaSo brutta, so poveretta, so tutto quel che volè, ma gnanca co un battelante no me ghe tacco.

Titta NanePer cossa ve lo feu sentar arente? Per cossa toleu la zucca barucca?

LuciettaVarè che casi!

PasquaVarè che gran criminali!

Titta NaneMi, co fazzo l’amore, no voggio che nissun possa dire. E la voggio cussì, la voggio. Mare de diana! A Titta Nane nissun ghe l’ha fatta tegnire. Nissun ghe la farà portare.

LuciettaVarè là, che spuzzetta! (si asciuga gli occhi)

Titta NaneMi so omo, saveu? so omo. E no son un puttelo, saveu?

Lucietta(Piange, mostrando di non voler piangere.)

PasquaCossa gh’astu? (a Lucietta)

LuciettaGnente. (piangendo dà una spinta a donna Pasqua)

PasquaTi pianzi?

LuciettaDa rabbia, da rabbia, che lo scannerave colle mie man.

Titta NaneVia, digo! Cossa xe sto fifare ? (accostandosi a Lucietta)

LuciettaAndè in malora.

Titta NaneSentiu, siora? (a donna Pasqua)

PasquaMo no gh’ala rason? Se sè pezo d’un can.

Titta NaneVoleu ziogare che me vago a trar in canale?

PasquaVia, matto!

LuciettaLassè che el vaga, lassè. (come sopra, piangendo)

PasquaVia, frascona!

Titta NaneGh’ho volesto ben, gh’ho volesto. (intenerendosi)

PasquaE adesso no più? (a Titta Nane)

Titta NaneCossa voleu? Se no la me vuole.

PasquaCossa distu, Lucietta?

LuciettaLassème stare, lassème.

PasquaTiò le to scarpe, tiò la to cordella, tiò la to zendalina. (a Lucietta)

LuciettaNo voggio gnente, no voggio.

PasquaVien qua, senti. (a Lucietta)

LuciettaLassème stare.

PasquaDighe una parola.

LuciettaNo.

PasquaVegnì qua, Titta Nane.

Titta NaneMade.

PasquaMo via. (a Titta Nane)

Titta NaneNo voggio.

PasquaDebotto ve mando tutti do a far squartare.

Il Comandadore e detti.

ComandadoreSeu vu donna Pasqua, muggier de paron Toni Canestro? (a Pasqua)

PasquaMissiersì, cossa comandeu?

ComandadoreE quella xela Lucietta, sorella de paron Toni? (a Pasqua)

PasquaSior sì; cossa voressi da ela?

Lucietta(Oh poveretta mi! Cossa vuorlo el comandadore?)

ComandadoreVe cito per ordine de chi comanda, che andè subito a Palazzo in cancellaria a esaminarve.

PasquaPer cossa?

ComandadoreMi no so altro. Ande e obbedì, pena diese ducati, se no gh’andè.

Pasqua(Per la custion). (a Lucietta)

Lucietta(Oh! mi no ghe voggio andare).

Pasqua(Oh! bisognerà ben che gh’andemo).

ComandadoreXela quella la casa de paron Vicenzo? (a Pasqua)

PasquaSior sì, quella.

ComandadoreNo occorr’altro. La porta xe averta, anderò de suso, (entra in casa)

PasquaAveu sentio, Titta Nane?

Titta NaneHo sentio. Quel furbazzo de Marmottina m’averà querelao. Bisogna che me vaghe a retirare.

PasquaE mio mario?

LuciettaE i me fradeli?

PasquaOh poverette nu! Va là, va alla riva, va a vede se ti li catti , vali a avisare. Mi anderò a cercare paron Vicenzo e mio compare Dottore, anderò dalla Lustrissima, anderò da sior Cavaliere. Poveretta mi, la mia roba, el mio oro, la mia povera ca, la mia povera ca! (parte)

Titta NaneVedeu, siora? Per causa vostra.

LuciettaMi? Coss’oggio fatto? Per causa mia?

Titta NanePerchè no gh’ave giudizio; perchè sè una frasca.

LuciettaVa in malora, strambazzo.

Titta NaneAnderò via bandìo, ti sarà contenta.

LuciettaBandìo ti anderà? Viè qua. Per cossa bandìo?

Titta NaneMa se ho d’andare, se i m’ha da bandire, Marmottina lo voi mazzare.

LuciettaXestu matto?

Titta NaneE ti, e ti, ti me l’ha da pagare, (a Lucietta, minacciandola.)

LuciettaMi? Che colpa ghe n’oggio?

Titta NaneVàrdete da un desperao, vàrdete.

LuciettaOe, oe, vien el comandadore.

Titta NanePoveretto mi! Presto, che no i me vede, che no i me fazze chiappare. (parte)

LuciettaCan, sassin, el va via, el me manazza. Xelo questo el ben che el me vuole? Mo che omeni! Mo che zente! No, no me voggio più maridare. Più tosto me voggio andar a negare. (parte)

Il Comandadore di casa ecc. e paron Fortunato.

ComandadoreMo, caro paron Fortunato, sè omo, savè cossa che xe ste cosse.

FortunatoMi a suso no e so mai stao , a suso. Cancelaìa mai stao mi, cancelaìa.

ComandadoreNo ghe sè mai sta in cancellaria?

FortunatoSiò no, siò no, so mai stao.

ComandadoreUn’altra volta no dire più cussì.

FortunatoE pe cossa gh’ha a andà mia muggiere?

ComandadorePer esaminarse.

FortunatoLe cugnae anca?

ComandadoreAnca ele.

FortunatoAnca e putte a andare? E putte, anca e putte?

ComandadoreNo vale co so sorella maridada? Cossa gh’ale paura?

FortunatoE pianse, e ha paura, no le vuò andare.

ComandadoreSe no le gh’anderà, sarà pezo per ele. Mi ho fatto el mio debito. Farò la riferta che sè citai, e pensèghe vu. (parte)

FortunatoBisogna andare, bisogna; bisogna andare, muggiere. Muggiere, mettite el ninzoletto, muggiere. Cugnà Orsetta, e ninzoetto. Cugnà Checca, e ninzoetto. Bisogna andare, (forte verso) la scena) Bisogna, bisogna andare. Maledìo e baruffe, i baroni furbazzi. Via petto, trighève, cossa feu? Donne, femene: maledìo, maledìo, petto. Ve vegnio a petubare, ve vegnio a petubare. (entra in casa)

Cancelleria.

Isidoro e paron Vicenzo.

VicenzoLa vede, lustrissimo, la xe una cossa da gnente.

IsidoroMi no ve digo che la sia una gran cossa. Ma ghe xe l'indolenza, ghe xe la nomina dei testimoni, xe incoà el processo: la giustizia ha d’aver el so logo.

VicenzoCrédala mo, lustrissimo, che colù che xe vegnù a querelare, sia innocente? L’ha tratto anca elo delle pierae.

IsidoroTanto meggio. Co la formazion del processo rileveremo la verità. Vicenzo. La diga, lustrissimo: no la se poderave giustare?

IsidoroVe dirò: se ghe fusse la pase de chi xe offeso, salve le spese del processo, la se poderave giustar.

VicenzoVia, lustrissimo; la me cognosse, so qua mi, la me varda mi.

IsidoroVe dirò, paron Vicenzo. V'ho dito che la se poderave giustar; perchè fin adesso dal costituto dell’indolente no ghe xe gran cosse. Ma no so quel che possa dir i testimoni; e almanco ghe ne vôi esaminar qualchedun. Se no ghe sarà delle cosse de più; che no ghe sia ruze vecchie, che la baruffa no sia stada premeditada, che no ghe sia prepotenze, pregiudizi del terzo, o cosse de sta natura, mi anzi darò man a l’aggiustamento. Ma mi per altro no vôi arbitrar. Son cogitor, e no son cancellier, e ho da render conto al mio principal. El cancellier xe a Venezia, da un momento all’altro el s’aspetta. El vederà el processetto; ghe parlarè vu, ghe parlerò anca mi; a mi utile no me ne vien, e no ghe ne voggio. Son galantomo, me interesso volentiera per tutti; se poderò farve del ben, ve farò del ben.

VicenzoEla parla da quel signor che la xe; e mi so quel che averò da fare.

IsidoroPer mi, ve digo, no voggio gnente.

VicenzoVia, un pesse, un bel pesse.

IsidoroOh! fina un pesse, sì ben. Perchè gh’ho la tola, ma anca a mi me piase far le mie regolette

VicenzoEh! lo so che siò cogitore el xe de bon gusto, siò cogitore.

IsidoroCossa voleu far? Se laora; bisogna anca devertirse.

VicenzoE ghe piase i ninzoletti a siò cogitore.

IsidoroOrsù, bisogna che vada a spedir un omo. Stè qua. Se vièn sta zente, disèghe che adesso torno. Disèghe alle donne, che le vegna a esaminarse, che no le gh’abbia paura, che son bon con tutti, e co le donne son una pasta de marzapan. (parte)

VicenzoSiò sì, el xe un galantomo; ma in casa mia noi ghe bazzega. Dalle mie donne nol vien a far careghetta . Sti siori dalla perucca co nualtri pescaori no i ghe sta ben. Oh per diana! Vele qua che le se vie a esaminare. Aveva paura che no le ghe volesse vegnire. Le gh’ha un omo con ele. Ah! sì, el xe paron Fortunato. Vegnì, vegnì, creature, che no gh’è nissun.

Pasqua, Lucietta, Libera, Orsetta, Checca tutte in ninzoletto. Paron Fortunato ed il suddetto.

CheccaDove semio?

OrsettaDove andemio?

LiberaOh poveretta mi! No ghe so mai vegnua in sto liogo.

FortunatoParò Izenzo, sioria, parò Izenzo. (saluta paron Vicenzo)

VicenzoParon Fortunato. (salutandolo)

LuciettaMe trema le gambe, me trema.

PasquaE mi? Oh che spasemo che me sento!

FortunatoDoe xelo e siò cancelliere? (a Vicenzo)

VicenzoNol ghe xe; el xe a Venezia al siò cancelliere. Vegnirà a esaminare el siò cogitore.

Libera(Oe, el cogiterà!) (a Orsetta, urtandola, facendo vedere che lo conoscono molto.

Orsetta(Oe, quel lustrissimo inspiritao). (a Checca, urtandola e ridendo.)

Pasqua(Astu sentìo? Ne esaminerà el cogitore). (a Lucietta, con piacere.)

Lucietta(Oh! gh’ho da caro. Almanco lo cognossemo). (a Pasqua)

Pasqua(Sì, el xe bonazzo). (a Lucietta)

Lucietta(V’arecordeu che l’ha compra da nu sie brazza de merlo da trenta soldi, e el ne l’ha paga tre lire?) (a Pasqua)

Isidoro e detti.

IsidoroCossa feu qua?

Tutte le donneLustrissimo, lustrissimo.

IsidoroCossa voleu? Che ve esamina tutte in t’una volta? Ande in sala, aspettè; ve chiamerò una alla volta.

PasquaPrima nu.

LuciettaPrima nu.

OrsettaSemo vegnue prima nu.

IsidoroMi no fazzo torto a nissun: ve chiamerò per ordene, come che troverò i nomi scritti in processo. Checca xe la prima. Che Checca resta, e vualtre andè fora.

PasquaMo za, seguro, la xe zovenetta. (parte)

LuciettaNo basta miga. Bisogna esser fortunae. (parte)

Isidoro(Gran donne! Le vol dir certo. Le vol dir, se le credesse de dir la verità).

FortunatoAndemo fuoa, andemo fuoa, andemo. (parte)

OrsettaOe, siò cogitore: no la ne fazza star qua tre ore, che gh’avemo da fare, gh’avemo. (parte)

IsidoroSì, sì, ve destrigherò presto.

LiberaOe, ghe la raccomando, salo? El varda ben che la xe una povera innocente. (a Isidoro)

IsidoroIn sti loghi no ghe xe pericolo de ste cosse.

Libera(El xe tanto ingalbanìo, che me fido puoco). (parte)

Isidoro e Checca, poi il Comandadore.

IsidoroVegnì qua, fia, sentève qua. (siede)

CheccaEh! sior no, stago ben in pie.

IsidoroSentève, no ve voggio veder in pie.

CheccaQuel che la comanda. siede)

IsidoroCossa gh’aveu nome?

CheccaGh’ho nome Checca.

IsidoroEl cognome?

CheccaSchiantina.

IsidoroGh’aveu nissun soranome?

CheccaOh giusto, soranome!

IsidoroNo i ve dise Puinetta?

CheccaOh! certo, anca elo me vuol minchionare, (s’ingrugna)

IsidoroVia, se sè bella, siè anca bona. Respondème. Saveu per cossa che siè chiamada qua a esaminarve?

CheccaSior sì, per una baruffa.

IsidoroContème come che la xe stada.

CheccaMi no so gnente, che mi no ghe giera. Andava a ca co mia sorella Libera, e co mia sorella Orsetta, e co mio cugnà Fortunato; e ghe giera paron Toni, e Beppe Cospettoni, e Titta Nane, che i ghe voleva dare a Toffolo Marmottina, e elo ghe trava delle pierae.

IsidoroPer cossa mo ghe voleveli dar a Toffolo Marmottina?

CheccaPerchè Titta Nane fa l’amore co Lucietta Panchiana, e Marmottina ghe xe andao a parlare, e el gh’ha pagao la zucca barucca.

IsidoroBen; ho capio, basta cussì. Quanti anni gh’aveu?

CheccaEl vuol saver anca i anni?

IsidoroSiora sì; tutti chi se esamina, ha da dir i so anni; e in fondo dell’esame se scrive i anni. E cussì, quanti ghe n’aveu?

CheccaOh! mi no me li scondo i mi anni. Disisette fenii.

IsidoroZurè d’aver dito la verità.

CheccaDe cossa?

IsidoroZurè, che tutto quel che ave dito nel vostro esame, xe la verità.

CheccaSior sì, zuro che ho dito la verità.

IsidoroEl vostro esame xe finio.

CheccaPosso andar via donca.

IsidoroNo, fermève un pochetto. Come steu de morosi?

CheccaOh! mi no ghe n’ho morosi.

IsidoroNo disè busie.

CheccaOggio da zurare?

IsidoroNo, adesso no ave più da zurar; ma le busie no sta ben a dirle. Quanti morosi gh’aveu?

CheccaOh mi! nissun me vuol, perchè son poveretta.

IsidoroVoleu che ve lazza aver una dota?

CheccaMagari!

IsidoroSe gh’avessi la dota, ve marideressi?

CheccaMi sì, lustrissimo, che me marideria.

IsidoroGh’aveu nissun per le man?

CheccaChi vorlo che gh’abbia?

IsidoroGh’aveu nissun che ve vaga a genio?

CheccaEl me fa vergognare.

IsidoroNo ve vergognè, semo soli; parleme con libertà.

CheccaTitta Nane, se lo podesse avere, mi lo chiorave.

IsidoroNo xelo el moroso de Lucietta?

CheccaEl la gh’ha licenzià.

IsidoroSe el l’ha licenziada, podemo veder se el ve volesse.

CheccaDe quanto sarala la dota?

IsidoroDe cinquanta ducati.

CheccaOh sior sì! Cento me ne dà mio cugnà. Altri cinquanta me ne ho messi da banda col mio balon. Mi credo che Lucietta no ghe ne daghe tanti.

IsidoroVoleu che ghe fazza parlar a Titta Nane?

CheccaMagari, lustrissimo!

IsidoroDove xelo?

CheccaEl xe retirà.

IsidoroDove?

CheccaGhel dirò in t’una recchia, che no voria che qualcun me sentisse. (gli parla nell' orecchia)

IsidoroHo inteso. Lo manderò a chiamar. Ghe parlerò mi, e lasse far a mi. Ande, putta, andè, che no i diga, se me capì! (suona il campanello)

CheccaUh! caro lustrissimo benedetto.

ComandadoreLa comandi.

IsidoroChe vegna Orsetta.

ComandadoreSubito. (parte)

IsidoroVe saverò dir. Ve vegnirò a trovar.

CheccaLustrissimo sì. (s'alza) Magari che ghe la fasse veder a Lucietta! Magari!

Orsetta e detti, poi il Comandadore

Orsetta(Tanto ti xe stada? Cossa t’alo esaminà?) (piano a Checca).

Checca(Oh sorella! Che bel esame che ho fatto! Te conterò tutto). (a Orsetta, e parte)

IsidoroVegnì qua, sentève.

OrsettaSior sì. (siede con franchezza)

Isidoro(Oh, la xe più franca custìa!) Cossa gh’aveu nome?

OrsettaOrsetta Schiantina.

IsidoroDetta?

OrsettaCoss’è sto detta?

IsidoroGh’aveu soranome?

OrsettaChe soranome vorlo che gh’abbia?

IsidoroNo ve diseli de soranome Meggiotto?

OrsettaIn veritae, lustrissimo, che se no fusse dove che son, ghe vorave pettenare quella perucca.

IsidoroOe, parlè con rispetto.

OrsettaCossa xe sto Meggiotto? I meggiotti a Chiozza xe fatti coi semolei e colla farina zala; e mi no son nè zala, nè del color dei meggiotti.

IsidoroVia, no ve scaldé, patrona, che questo no xe logo da far ste scene. Respondéme a mi. Saveu la causa per la qual sé vegnua a esaminarve?

OrsettaSior no.

IsidoroVe lo podeu immaginar?

OrsettaSior no.

IsidoroSaveu gnente de una certa baruffa?

OrsettaSo, e no so.

IsidoroVia, contème quel che savè.

OrsettaChe el me interroga, che responderò.

Isidoro(Custìa xe de quelle che fa deventar matti i poveri cogitori). Conosseu Toffolo Zavatta?

OrsettaSior no.

IsidoroToffolo Marmottina?

OrsettaSior sì.

IsidoroSaveu che nissun ghe volesse dar?

OrsettaMi no posso saver che intenzion che gh’abbia la zente.

Isidoro(Oh che dretta!) Aveu visto nissun con delle arme contro de elo?

OrsettaSior sì.

IsidoroChi giereli?

OrsettaNo m’arecordo.

IsidoroSe i nominerò, ve i arecordereu?

OrsettaSe la i nominerà, ghe responderò.

Isidoro(Siestu maladetta! La me vuol far star qua fin sta sera). Ghe giera Titta Nane Moletto?

OrsettaSior sì.

IsidoroGhe giera paron Toni Canestro?

OrsettaSior sì.

IsidoroGhe giera Beppe Cospettoni?

OrsettaSior sì.

IsidoroBrava, siora Meggiotto.

OrsettaEl diga: gh’alo nissun soranome elo?

IsidoroVia via, manco chiaccole. (scrivendo)

Orsetta(Oh! ghe lo metterò mi: el sior cogitore giazzao).

IsidoroToffolo Marmottina alo tratto delle pierae?

OrsettaSior sì, el ghe n’ha tratto. (Magari in te la testa del cogitore!)

IsidoroCossa diseu?

OrsettaGnente, parlo da mia posta. No posso gnanca parlare?

IsidoroPer cossa xe nato sta contesa?

OrsettaCossa vorlo che sappia?

Isidoro(Oh, son debotto stufo!) Saveu gnente che Titta Nane gh’avesse zelusia de Toffolo Marmottina?

OrsettaSior sì; per Lucietta Panchiana.

IsidoroSaveu gnente che Titta Nane abbia licenzià Lucietta Panchiana?

OrsettaSior sì, ho sentio a dir che el la gh’ha licenzià.

Isidoro(Checca ha dito la verità. Vederò de farghe sto ben). Oh via, debotto sè destrigada . Quanti anni gh’aveu?

OrsettaOh ca de dia! Anca i anni el vuol savere?

IsidoroSiora sì, anca i anni.

OrsettaEl li ha da scrivere?

IsidoroI ho da scriver.

OrsettaBen; che el scriva... disnove.

Isidoro(Scrive) Zurè d’aver dito la verità.

OrsettaHo da zurare?

IsidoroZurè d’aver dito la verità.

OrsettaGhe dirò: co ho da zurare, veramente ghe n’ho ventiquattro.

IsidoroMi no ve digo che zurè dei anni, che a vualtre donne sto zuramento nol se pol dar. Ve digo che zurè, che quel che ave dito in te l’esame, xe la verità.

OrsettaOh sior sì, zuro.

Isidoro(Suona il campanello.)

ComandadoreChi vorla?

IsidoroDonna Libera.

ComandadoreLa servo. (parte)

Orsetta(Varè. Anca i anni se gh’ha da dire!) (s’alza)

Donna Libera e detti, poi il Comandadore.

Libera(T’astu destrigà?) (ad Orsetta)

Orsetta(Oe, sentì. Anca i anni che se gh’ha, el vuol savere).

Libera(Burlistu?)

Orsetta(E bisogna zurare). (parte)

Libera(Varè che sughi! s’ha da dire i so anni, e s’ha da zurare! So ben quel che farò mi. Oh! i mi anni no li voggio dire, e no voggio zurare).

IsidoroO via, vegnì qua, sentève.

Libera(Non risponde.)

IsidoroOe, digo, vegnì qua, sentève. (facendole segno che si sieda)

Libera(Va a sedere.)

IsidoroChi seu?

Libera(Non risponde.)

IsidoroRespondè, chi seu? (urtandola)

LiberaSior.

IsidoroChi seu?

LiberaCossa disela?

IsidoroSeu sorda? (forte)

LiberaGhe sento puoco.

Isidoro(Stago fresco!) Cossa gh’aveu nome?

LiberaPiase?

IsidoroEl vostro nome.

LiberaLa diga un poco più forte.

IsidoroEh! che no voggio deventar matto, (suona il campanello)

ComandadoreLa comandi.

IsidoroChe vegna drento quell’omo.

ComandadoreSubito. (parte)

IsidoroAndè a bon viazo. (a Libera)

LiberaSior?

IsidoroAndè via de qua. (spingendola, perchè se ne vada)

Libera(Oh! l’ho scapolada pulito. I fatti mi, no ghe li voggio dire). (parte)

Isidoro, poi paron Fortunato, poi il Comandadore.

IsidoroSto mistier xe bello, civil, decoroso, anca utile. Ma delle volte le xe cosse da deventar matti.

FortunatoTissimo siò cogitore, tissimo.

IsidoroChi seu?

FortunatoFortunato Aichio.

IsidoroParlè schietto, se volè che v’intenda. Capisso per discrezion: paron Fortunato Cavicchio. Saveu per cossa che siè cità a esaminarve?

FortunatoSiò sì, siò.

IsidoroVia donca: disè per cossa che sè vegnù?

FortunatoSo egnù, pechè me ha dito e comandadore.

IsidoroBella da galantomo! So anca mi che sè vegnù perchè ve l'ha dito el comandador. Saveu gnente de una certa baruffa?

FortunatoSiò sì, siò.

IsidoroVia, disème come che la xe stada.

FortunatoL’ha a saere, che ancuò so egnù da mare, e so rivao a igo co a tatana; e xe egnuo mia muggiere, e a cugnà Ossetta, e a cugnà Checca.

IsidoroSe no parlè più schietto, mi no ve capisso.

FortunatoSiò sì, siò. Andando a ca co mia muggiere, e co mia cugnà, ho isto parò Toni, ho isto, e bara Beppe ho isto, e Titta Nane Moetto, e Toffolo Maottina; e parò Toni tiffe, a spada; e Beppe alda, alda o ottello; e Maottina tuffe, tuffe pierae; è egnuo Titta Nane, è egnuo Titta Nane. Lago, lago co paosso. lago. Tia, mola, baacca . Maottina è caccao, e mi no so atro. M’ala capio?

IsidoroGnanca una parola.

FortunatoMi pao chiozzotto, utissimo. De che paese xela, utissimo?

IsidoroMi son venezian; ma non ve capisso una maledetta.

FortunatoComandela e tona a die?

IsidoroCossa?

FortunatoComandela e tona a dire? a dire? a dire?

IsidoroVa in malora, va in malora, va in malora.

FortunatoTissimo. (partendo)

IsidoroPapagà maledetto!

FortunatoTissimo. (allontanandosi)

IsidoroSe el fusse un processo de premura, poveretto mi!

FortunatoSiò cogitore! Tissimo. (sulla porta e parte)

IsidoroEl diavolo che te porta! (suona il campanello)

ComandadoreSon a servirla.

IsidoroLicenziè quelle donne, mandèle via, che le vaga via, che no voi sentir altro.

ComandadoreSubito. (parte)

Isidoro, poi Pasqua e Lucietta, poi il Comandadore.

IsidoroBisogna dar in impazienze per forza.

PasquaPer cossa ne mandelo via? (con calore)

LuciettaPer cossa no ne vorlo esaminare?

IsidoroPerchè son stuffo.

PasquaSì, sì, caretto, savemo tutto.

LuciettaL’ha sentio quelle che gh’ha premesto e nualtre semo scoazze

IsidoroLa fenìmio?

LuciettaPuinetta el l’ha tegnua più d’un’ora.

PasquaE Meggiotto quanto ghe xela stada?

LuciettaMa nu anderemo da chi s’ha d’andare.

PasquaE se faremo fare giustizia.

IsidoroNo savè gnente. Sentì.

PasquaCossa voravelo dire?

LuciettaCossa ne voravelo infenocchiare?

IsidoroVualtre sè parte interessada; no podè servir per testimonio.

LuciettaNo xe vero gnente, no xe vero gnente. No semo interessa, no xe vero gnente.

PasquaE anca nu volemo testimoniare.

IsidoroFenila una volta.

PasquaE se faremo sentire.

LuciettaE saveremo parlare.

IsidoroSieu maledette.

ComandadoreLustrissimo.

IsidoroCossa gh’è?

ComandadoreXe vegnù el lustrissimo sior cancellier.

PasquaOh! giusto elo.

LuciettaAnderemo da elo.

IsidoroAndè dove diavolo che volè. Bestie, diavoli, satanassi, (parte)

PasquaMare de diana! che ghe la faremo tegnire. (parte)

LuciettaViva cocchietto, che ghe la faremo portare. (parte)

Fine dell’Atto Secondo.

Strada con case, come nelle altre scene.

BeppoNo m’importa; che i me chiappe, se i me vo’ chiappare. Anderò in preson; no m’importa gnente; ma mi retirà no ghe voggio più stare. No muoro contento, se a Orsetta no ghe dago una slepa. E a Marmottina ghe voggio taggiare una recchia, se credesse d’andare in galìa, se credesse. La porta xe serrà de custìe, xe serrà anca da mi, xe serrà. Lucietta e mia cugnà le sarà andae a parlare per mi e per mio fradello Toni; e custìe le sarà andae a parlare per Marmottina. Sento zente, sento. Me pare sempre d’aver i zaffi alla schina. Zitto, zitto, che viè Viè, viè., che te voggio giustare.

Libera, Orsetta e Checca col ninzoletto sulle spalle, e detto.

LiberaBeppe! (amorosamente)

OrsettaEl mio caro Beppe!

BeppoIn malora, ia!

OrsettaCon chi la gh’astu?

LiberaA chi in malora?

BeppoIn malora quante che sè.

CheccaVaghe ti in malorzega. (a Beppo)

Orsetta(A Checca) Cossa t’avemio fatto? (a Beppo)

BeppoTi sarà contenta, anderò in preson; ma avanti ch’a ghe vaghe...

OrsettaNo, no t’indubitare. No sarà gnente.

LiberaParon Vicenzo l’ha dito cussì ch’a no se stemo a travaggiare, che la cossa sarà giustà.

CheccaE po gh’avemo per nu el cogitore.

OrsettaSe può savere con chi ti la gh’ha almanco?

BeppoCon ti la gh’ho.

OrsettaCo mi?

BeppoSì, con ti.

OrsettaCossa t’oggio fatto?

BeppoCossa te vastu a impazzare co Marmottina? Perchè ghe parlistu? Per cossa te vienlo a cattare?

OrsettaMi?

BeppoTi.

OrsettaChi te l’ha dito?

BeppoMia cugnà e mia sorella me l’ha dito.

OrsettaBusiare!

LiberaBusiare!

CheccaOh che busiare!

OrsettaEl xe vegnù a parlare con Checca.

LiberaE po el xe andao a sentarse da to sorella.

OrsettaE el gh’ha pagao la zucca.

CheccaBasta dire che Titta Nane ha licenziao Lucietta.

BeppoL’ha licenzià mia sorella? Per cossa?

CheccaPer amore de Marmottina.

OrsettaE mi cossa gh’oggio da intrare?

BeppoMarmottina no xe vegnù a parlare co ti? (a Orsetta) L’ha parlao co Lucietta? E Titta Nane l’ha licenzià?

OrsettaSì, can, no ti me credi, baron? No ti credi alla to povera Orsetta, che te voi tanto ben; che ho fatto tanti pianti per ti; che me desconisso per causa toa?

BeppoCossa donca me vienle a dire quelle petazze?

LiberaPer scaregarse ele, le ne càrega nu.

CheccaNu no ghe femo gnente, e ele le ne vuol male.

BeppoChe le vegna a ca, che le vegna! (in aria minacciosa)

OrsettaZitto, che le xe qua.

LiberaTasè.

CheccaNo ghe disè gnente.

Pasqua e Lucietta col ninzoletto sulle spalle, e detti.

LuciettaCoss’è? (a Beppo)

PasquaCossa fastu qua? (a Beppo)

BeppoCossa me seu vegnue a dire? (con sdegno)

LuciettaSentì.

PasquaVie qua, senti.

BeppoCossa v’andeu a inventare?...

LuciettaMo viè qua, presto. (con affanno)

PasquaPresto, poveretto ti!

BeppoCoss’è? Cossa gh’è da niovo? (si accosta, e lo prendono in mezzo)

LuciettaVa via.

PasquaVatte a retirare, (intanto le altre tre donne si cavano i ninzoletti)

BeppoMo se le m’ha dito che non xe gnente.

LuciettaNo te fidare.

PasquaLe te vol sassinare.

LuciettaSemo stae a Palazzo, e nu no i n’ha gnanca volesto ascoltare.

PasquaEle i le gh’ha riceveste, e nualtre i n’ha cazzao via.

LuciettaE Orsetta xe stada drente più de un’ora col cogitore.

PasquaTi xe processà.

LuciettaTi xe in cattura.

PasquaVatte a retirare.

BeppoComuodo? A sta via? se sassina i omeni? (a Orsetta)

OrsettaCoss’è stà?

BeppoTegnirme qua per farme precipitare?

OrsettaChi l’ha dito?

LuciettaL’ho dito mi, l’ho dito.

PasquaE savemo tutto, savemo.

LuciettaVa via. (a Beppo)

PasquaVa via. (a Beppo)

BeppeVago via... ma me l’averè da pagare. (a Orsetta)

Paron Toni e detti.

PasquaMarìo!

LuciettaFradelo!

PasquaAndè via.

LuciettaNo ve lassè trovare.

ToniTasè, tasè, non abbiè paura, tasè. Xe vegnuo a trovarme paron Vicenzo, e el m’ha dito che l’ha parlà co sior cancelliere, che tutto xe accomodao, che se può caminare.

OrsettaSentìu?

LiberaVe l’avemio dito?

CheccaSemio nu le busiare?

OrsettaSemio nu che ve vuol sassinare?

BeppeCossa v’insunieu? Cossa v’andeu a inventare? (a Tasqua e Ludetta)

Paron Vicenzo e detti.

OrsettaVelo qua paron Vicenzo. No xe giusta tutto, paron Vicenzo?

VicenzoNo xe giusta gnente.

OrsettaCome no xe giusta gnente?

VicenzoNo gh’è caso che quel musso ustinà de Marmottina voggia dar la pase , e senza la pase no se puoi giustare.

PasquaOe, sentìu!

LuciettaNo ve goggio dito?

PasquaNo ghe credè gnente.

LuciettaNo xe giustà gnente.

PasquaNo ve fidè a caminare.

LuciettaAndeve subito a retirare.

Titta Nane e detti.

PasquaOh! Titta Nane, cessa feu qua?

Titta NaneFazzo quello che voggio, fazzo.

Pasqua(Oh! no la ghe xe gnancora passà).

LuciettaNo gh’avè paura dei zaffi? (a Titta Nane)

Titta NaneNo gh’ho paura de gnente. (a Lucietta, con sdegno) So stao dal cogitore; el m’ha mandao a chiamare, e el m’ha (a) (6= (e) dito che camina quanto che voggio, e che no staghe più a bacilare. (a paron Vicenzo)

OrsettaParlè mo adesso, se gh’ave fià de parlare. (a Lucietta) No ve l’oggio dito che gh’avemo per nu el cogitore?

Comandadore e detti.

ComandadoreParon Toni Canestro, Beppo Cospettoni e Titta Nane Moiette, vegnì subito a Palazzo con mi da sior cancellier.

PasquaOh poveretta mi!

LuciettaSemo sassinai.

PasquaChe fondamento ghe xe in te le vostre parole? (a Orsetta)

LuciettaDe cossa ve podeu fidare de quel panchiana del cogitore? (a Orsetta)

Isidoro e detti.

Lucietta(Uh!) (vedendo Isidoro)

IsidoroChi è che me favorisse?

OrsettaVela là , lustrissimo. Mi no so gnente. (accennando Lucietta.

LuciettaCossa vorli dai nostri omeni? Cossa ghe vorli far?

IsidoroGnente; che i vegna con mi, e che no i gh’abbia paura de gnente. Son galantomo. Me son impegnà de giustarla, e sior cancellier se remette in mi. Andè, paron Vicenzo, andè a cercar Marmottina, e fe de tutto de menarlo da mi; e se nol voi vegnir per amor, disèghe che lo farò vegnir mi per forza.

VicenzoSior sì; so qua, co se tratta de far del ben. Vago subito. Beppe, paron Toni, vegnì co mi, che v’ho da parlare.

ToniSo co vu, compare. Co so co vu, so seguro. (parte)

Titta Nane(Oe! mi no me slontano dal cogitore). (da sé)

BeppoOrsetta, a revéderse.

OrsettaXestu in collera? (a Beppo)

BeppoVia, che cade? A monte, a monte. Se parleremo.

Beppo(parte con paron Toni e paron Vicenzo)

Isidoro, Checca, Lucietta, Pasqua e Titta Nane.

Checca(La diga, lustrissimo?) (a Isidoro, piano)

Isidoro(Coss’è, fia?)

Checca(Gh’alo parlà?)

Isidoro(Gh’ho parlà).

Checca(Coss’alo dito?)

Isidoro(Per dirvela, nol m’ha dito nè sì, né no. Ma me par che i dusento ducati no ghe despiasa).

Checca(Me raccomando).

Isidoro(Lassè far a mi). Via, andemo, Titta Nane.

Titta NaneSo qua con ela. (in atto di partire)

LuciettaGnanca, patron? Gnanca un strazzo de saludo? (a Titta Nane)

PasquaChe creanza gh’aveu? (a Titta Nane)

Titta NanePatrone. (con disprezzo)

IsidoroVia, saludè Checchina. (a Titta Nane)

Titta NaneBella putta, ve saludo. (con buona grazia, Lucietta smania)

CheccaSiorìa, Titta Nane.

Titta-Nane(Gh’ho gusto che la magna l'agio Lucietta, gh’ho gusto; me voggio refare). (parte)

Isidoro(Anca questo per mi xe un divertimento). (parte)

Lucietta, Orsetta, Checca, Pasqua e Libera.

Lucietta(Aveu sentìo cossa che el gh’ha dito? Bella putta el gh’ha dito).

Pasqua(Mo via, cossa vustu andar a pensare?)

LuciettaE ela? Siorìa, Titta Nane, siorìa, Titta Nane, (caricandola) forte, che sentano.

CheccaCoss’è, siora, me burleu?

OrsettaDighe che la se varda ela.

LiberaChe la gh’ha el so bel da vardare.

LuciettaMi? Oh de mi ghe xe puoco da dire; che cattive azion mi no ghe ne so fare.

PasquaVia, tasi, no te n’impazzare. No sastu chi la xe? Tasi. (a Lucietta)

CheccaCossa semio?

OrsettaCossa voressi dire? (a Libera)

LiberaVia; chi ha più giudizio, el dopera . (a Orsetta)

LuciettaOh la savia Sibilla! Le putte che gh’ha giudizio, parona, le lassa star i novizzi, e no le va a robar i morosi.

OrsettaA vu cossa ve robemio?

LuciettaTitta Nane xe mio novizzo.

CheccaTitta Nane v’ha licenzià.

PasquaNo xe vero gnente.

LiberaTutta la contrà l’ha sentìo.

PasquaVia, che sè una pettegola.

OrsettaTasè là, donna stramba .

LuciettaSentì che sbrenà!

LiberaSentì che bella putta! (con ironia e collera)

LuciettaMeggio de to sorella.

CheccaNo ti xe gnanca degna de minzonarme .

LuciettaPovera sporca!

OrsettaCome parlistu? (s’avanzano in zuffa)

PasquaVoleu ziogare che ve petuffo?

LiberaChi?

OrsettaMare de diana! che te sflazelo vara.

LuciettaOh che giandussa!

OrsettaParla ben, parla. (le dà sulla mano)

LuciettaOe! (alza le mani per dare)

LiberaTìrete in là, oe! (spingendo Pasqua)

PasquaCoss’è sto spenze? (spingendo Libera)

OrsettaOe, oe! (si mette a dare, e tutte due si danno gridando)

TutteOe, oe!

Paron FORTUNATO e dette.

FortunatoFermève, fermève, donne, donne, fermève. (Le donne seguono a darsi gridando sempre. Fortunato in mezzo, finchè gli riesce di separarle, e caccia le sue in casa.

LiberaTi gh’ha rason. (entra)

CheccaTi me l’ha da pagare. (entra)

OrsettaVe vôi cavare la petta, vara. (entra)

PasquaMaledetta! Se no me fava male a sto brazzo, te voleva collegare per terra. (entra)

LuciettaE vu, savè, sior carogno, se no ghe farè far giudizio a culìe, ve trarrò sulla testa un de quei pitteri che spuzza. (entra)

FortunatoAnde là, puh! Maledie! Donne, donne, sempre baruffe, sempre chià. Dise be e proverbio: Donna danno, donna malanno, malanno, danno, malanno. (entra in casa)

Camera in una casa particolare.

Isidoro e Titta Nane.

IsidoroVegnì con mi, non abbiè suggizion; qua no semo a Palazzo, qua no semo in cancellaria. Semo in casa de un galantuomo, de un venezian che vien a Chiozza do volte all’anno, e co noi ghe xe elo, el me lassa le chiave a mi, e adesso de sta casa son paron mi, e qua s’ha da far sta pase, e s’ha da giustar tutti pettegolezzi, perchè mi son amigo di amici, e a vualtri Chiòzzotti ve voggio ben.

Titta NanePer so grazia, siò cogitore.

IsidoroVegnì qua, za che semo soli...

Titta NaneDove xeli sti altri?

IsidoroParon Vicenzo xe andà a cercar Marmottina, e el vegnirà qua, che za el sa dove che l’ha da vegnir. Paron Toni l’ho mandà da mi in cancellaria a chiamar el mio servitor, perchè vôi che sigillemo sta pase con un per de fiaschetti. E Beppo, co v’ho da dir la verità, el xe andà a chiamar donna Libera e paron Fortunato.

Titta NaneE se Marmottina no volesse vegnire?

IsidoroSe nol vorrà vegnir, lo farò portar. Orsù, za che semo soli, respondème a ton sul proposito che v’ho parlà. Checchina ve piasela? La voleu?

Titta NaneCo gh’ho da dire la giusta veritae, la me piase puoco, e fazzo conto de no la volere.

IsidoroCome! No m’ave miga dito cussì stamattina.

Titta NaneCossa gh’oggio dito?

IsidoroM’ave dito: no so, son mezzo impegna. M’avè domandà cossa la gh’ha de dota. Mi v’ho anca dito che la gh’aveva dusento e passa ducati. M’ha parso che la dota ve comoda; m’ha parso che la putta ve piasa. Cossa me scambieu adesso le carte in man?

Titta NaneLustrissimo, mi no ghe scambio gnente, lustrissimo. L’abbia da saere che a Lucietta, lustrissimo, xe do anni che ghe fazzo l’amore, e me son instizzao, e ho fatto quel che ho fatto, per zelusia e per amore, e la gh’ho licenzia. Ma la gh’abbia da saere, lustrissimo, che a Lucietta ghe voggio ben, ghe voggio; e co un omo xe instizzao, no! sa quello ch’a se dighe. Stamattina Lucietta l’averave mazza, e za un puoco gh’ho volesto dare martello; ma co ghe penso, mare de diana! lustrissimo, no la posso lassare; e ghe voggio ben, ghe voggio. La m’ha affrontao, la gh’ho licenzia; ma me schioppa el cuor.

IsidoroOh bella da galantomo! E mi ho manda a chiamar donna Libera e paron Fortunato per parlarghe de sto negozio e domandarghe Checca per vu.

Titta NaneGrazie, lustrissimo. (con dispiacere)

IsidoroNo la volè donca?

Titta NaneGrazie alla so bontae. (come sopra)

IsidoroSì? o no?

Titta NaneCo bo respetto: mi no, lustrissimo.

IsidoroAndeve a far squartar, che no me n’importa.

Titta NaneComuodo pàrlela, lustrissimo? So poveromo, so un povero pescaore; ma so galantomo, lustrissimo.

IsidoroMe despiase, perchè gh’averave gusto de maridar quella putta.

Titta NaneLustrissimo, la me compatissa, se no ghe fasse affronto, ghe vorave dire do parole, ghe vorave dire.

IsidoroDisè pur: cossa me voressi dir?

Titta NaneCaro lustrissimo, la prego, no la se n’abbia per male.

IsidoroNo, no me n’averò per mal. (Son curioso de sentir cossa che el gh’ha in testa de dirme).

Titta NaneMi parlo co tutto e respetto. Baso dove che zappa e siò cogitore; ma se m’avesse da maridare, no vorria che un lustrissimo gh’avesse tanta premura per mia muggier.

IsidoroOh che caro Titta Nane! Ti me fa da rider, da galantomo. Per cossa credistu che gh’abbia sta premura per quella putta?

Titta NaneChe cade? Affin de ben, affin de ben, che cade? (ironico)

IsidoroSon un zovene onesto, e non son capace...

Titta NaneEh! via, che cade?

Isidoro(Oh che galiotto!)

Paron Vicenzo e detti, poi Toffolo.

VicenzoSo qua, lustrissimo. Finalmente l’ho persuaso a vegnire.

IsidoroDov’èlo?

VicenzoEl xe de fuora: che lo chiame?

IsidoroChiamèlo.

VicenzoToffolo, vegnì a nu.

ToffoloSo qua, pare. Tissimo. (a Isidoro, salutandolo)

IsidoroVien avanti.

ToffoloLustrissimo siò cogitore. (salutandolo ancora)

IsidoroDime un poco, per cossa no vustu dar la pase a quei tre omeni, coi quali ti ha avù stamattina quella contesa?

ToffoloPerchè, lustrissimo, i me vuol amazzare.

IsidoroCo i te domanda la pase, no i te voi mazzar.

ToffoloI xe galiotti, lustrissimo.

Titta NaneOlà, olà! (a Toffolo minacciandolo, acciò parli con rispetto)

IsidoroQuietève. (a Titta) E ti parla ben, o te farò andar in t’un camerotto.

ToffoloQuel che la comanda, lustrissimo.

IsidoroSastu che per le pierae che ti ha tratto, ti meriti anca ti d’esser processà, e che stante la malizia co la qual ti xe vegnù a querelar, ti sarà condanna in te le spese?

ToffoloMi so poveromo, lustrissimo; mi no posso spendere. Vegnì qua, mazzème; so poveromo, mazzème. (a Vicenzo e Titta)

Isidoro(Costù el par semplice; ma el gh’ha un fondo de malizia de casa del diavolo).

VicenzoDaghe la pase, e la xe fenìa.

ToffoloVoggio esser seguro della mia vita.

IsidoroBen, e mi te farò assicurar. Titta Nane, me deu parola a mi de no molestarlo?

Titta NaneMi sì, lustrissimo. Basta che el lassa stare Lucietta e che nol bazzega per quelle contrae.

ToffoloMi, fradelo, Lucietta no la gh’ho gnanca in mente, e no ziro colà per ela, no ziro.

IsidoroPer chi ziristu donca?

ToffoloLustrissimo, anca mi so da maridare.

IsidoroMo via, di’ suso. Chi gh’astu da quelle bande?

ToffoloLustrissimo...

VicenzoOrsetta?

ToffoloMade.

IsidoroChecca fursi?

ToffoloAh, ah! bravo, lustrissimo, bravo. (ridendo)

Titta NaneTi xe un busiaro.

ToffoloPer cossa busiaro?

Titta NanePerchè Checca m’ha dito, e donna Libera e Orsetta m’ha dito, che ti t’ha sentao da Lucietta, e ti gh’ha pagao da marenda .

ToffoloPer far despetto, l’ho fatto.

Titta NaneA chi?

IsidoroQuietève. (a Titta Nane) Distu dasseno che ti ghe vol ben a Checca?

ToffoloMi sì, da putto.

IsidoroLa toressistu per muggier?

ToffoloMare de diana, se la chiorave!

IsidoroE ela mo te vorala?

ToffoloVara chiòe! Per cossa no m’averavela da volere? La m’ha dito delle parole, la m’ha dito, che no le posso mo gnanca dire. So sorela m’ha descazzao, da resto... e co metto peota a Vigo, la poderò mantegnire.

Isidoro(Mo el sarave giusto a proposito per Checchina).

Paron Toni, un Servitore con fiaschi, e detti.

ToniXe qua el servitor, lustrissimo.

IsidoroBravo. Metti zoso quei fiaschi, e va de là in cusina e varda in quel armeretto, che gh’è dei gotti. (servitore parte)

Toni(Com’èla, paron Vicenzo?)

Vicenzo(Ben, ben! S’ha scoverto delle cosse... Anderà tutto ben).

IsidoroToffolo, allegramente, che vôi che femo sto matrimonio.

ToffoloMagari, lustrissimo!

ToniOlà, Toffolo, con chi?

IsidoroCon Checchina.

ToffoloE mio fradelo Beppe sposerà Orsetta.

IsidoroBravi! E Titta Nane sposerà Lucietta.

Titta NaneSe la vegnirà co le bone, può essere che mi la spose.

IsidoroA monte tutto. No gh’ha da esser puntigli. Avemo da far ste nozze, e vegnì qua tutti, e sposève qua. Provederò mi i confetti, e ceneremo, e faremo un festin, e staremo allegri

ToffoloParò Toni, aliegri.

ToniAliegri, parò Vicenzo.

VicenzoAliegri.

IsidoroVia, Titta Nane, anca vu aliegri.

Titta NaneSo qua, so qua, no me cavo.

IsidoroVia, fe pase.

ToffoloPase. (abbraccia Toni)

ToffoloToni. Pase (abbraccia Toffolo)

ToffoloToffolo. Amigo. (abbraccia Titta Nane)

Titta NaneAmigo. (abbraccia Toffolo)

ToffoloParò Vicenzo. (abbraccia Vicenzo)

VicenzoAmici, amici.

Beppo e dettì.

ToffoloAmigo, pase, parente, amigo. (saluta ed abbraccia Beppo)

BeppoFèrmete. Oh che strepiti! Oh che sussuri! Fradelo, no ve posso fenir de dire.

IsidoroCoss’è sta?

BeppoLe ha criao, le s’ha dao, le s’ha petuffao. (parla delle donne)

IsidoroChi?

BeppoMia cugnà Pasqua, Lucietta, donna Libera, Checca, Orsetta. So andao per andare, come che m’ha dito e siò cogitore. No le m’ha volesto in ca, no le m’ha volesto, Orsetta m’ha serrao el balcon in tel muso. Lucietta no vol più Titta Nane. Le cria che le s’averze, e ho paura che le se voggia tornar a dare.

Titta NaneSangue de diana! Com’èla? Sangue de diana! (parte)

ToniVeggio andar a defendere mia muggiere. (parte)

BeppoSe daremo, se daremo, faremo custion, se daremo. (parte)

VicenzoFermève, fermève; no stè a precipitare. (parte)

ToffoloChe i lassa stare Checca, oe! che i la lassa stare, (parte)

IsidoroSieu maledetti, sieu maledetti, sieu maledetti! (parte)

Strada con case, come altre volte.

Lucietta e Orsetta alle finestre delle loro case, donna Pasqua di dentro.

LuciettaCoss’è? No ti vol più mio fradelo? No ti xe gnanca degna d’averlo.

OrsettaOh! ghe vuol puoco a trovare de meggio.

LuciettaChi troverastu?

OrsettaRulo.

LuciettaGhe mancherave puoco che no te fasse la rima.

OrsettaNo se salo, che ti xe una sbocca !

LuciettaSì, se fusse co fa ti.

OrsettaTasi sa, che son una putta da ben.

LuciettaSe tale ti fussi, tale ti operaressi.

OrsettaVia, sussurante.

LuciettaCatta baruffe.

PasquaLucietta, vien drento, Lucietta. (di dentro, chiamandola forte)

LuciettaTi gh’anderà via ve’ de sta contrà.

OrsettaChi?

LuciettaTi.

PasquaLucietta! (di dentro)

OrsettaChiò, vara. (si batte nel gomito)

LuciettaVa al turo. (si ritira)

OrsettaPovera sporca! Con chi credistu aver da fare? Mi sì che me mariderò; ma tì? No ti troverà nissun che te voggia. Uh! quel povero desgrazià che te voleva, el stava fresco; el giera conzà co le ceolette. Nol te vol più, ve’. Titta Nane, no ve’, nol te vol più, ve’.

Lucietta(Torna al balcone) Mi no me n’importa; che anca se el me volesse, mi no lo voggio.

OrsettaLa volpe no vol ceriese.

LuciettaSì, sì, el sposerà quella sporca de to sorella.

OrsettaOe! parla ben.

PasquaLucietta. (di dentro)

LuciettaA mi, se ghe ne veggio, no me n’amanca.

OrsettaEh! lo so che ti gh’ha el protettore.

LuciettaTasi là, che te farò desdire.

PasquaLucietta, Lucietta! (di dentro)

OrsettaOh che paura! (burlandosi di Lucietta)

LuciettaTe farò vegnire l’angossa.

OrsettaMarameo, squaquarà, marameo.

LuciettaVago via, perchè no me degno. (si rilira)

OrsettaVa via, va via, no te far smattare . (si ritira)

LuciettaMeggiotto. (torna, chiamandola col suo soprannome)

OrsettaPanchiana. (torna, e fa lo stesso)

LuciettaTuffe. (si ritira)

OrsettaMalagrazia. (si ritira)

Lucietta(Torna) Mo che bella zoggia. (con ironia e disprezzo)

OrsettaMo che boccoletto da riosa! (torna, e lo dice con ironia e disprezzo.)

Titta Nane, poi Toni, Beppo e dette.

Titta NaneCoss’è? Cossa astu dito dei fatti mii? (a Lucietta)

LuciettaVa in malora. Va a parlare con Checca. (parte)

OrsettaNo ghe tendo, che la xe una matta. (a Titta Nane)

ToniChe muodo xe questo de strapazzare? (a Orsetta)

OrsettaVia, che sè tutta zente cattiva. (a Toni)

BeppoOrsetta, Orsetta!

OrsettaVatte a far squartare. (parte)

ToniE ti no stare più a vegnire per casa, che no te voggio. (a Titta Nane)

BeppoE no bazzegare qua oltra, che no te volemo. (a Titta Nane)

Titta NaneGiusto, mo, per questo mo ghe voggio vegnire.

BeppoSe a Marmottina ghe l’ho promettue , a ti, mare de diana! te le darò, vara. (entra in casa)

Titta NaneChiò sto canelao (fa un atto di disprezzo)

ToniIn tartana da mi no ghe stare a vegnire. Provedite de paron, che mi me provederò de omo. (entra in casa)

Titta Nane, poi paron Vicenzo, poi Toffolo, poi Isidoro.

Titta NaneCorpo de una gaggiandra! qualchedun me l’ha da pagare.

VicenzoTitta Nane, com’èla?

Titta NanePetto de diana! petto de diana! Arme, fora arme.

VicenzoVa via, matto. No star a precipitare.

Titta NaneVeggio farme piccare, ma avanti, sangue de diana, ghe ne voggio colegare tre o quattro!

ToffoloSo qua. Come xéla?

Titta NaneArme, fora arme.

ToffoloMi no so gnente. (corre via e s’incontra violentemente con Isidoro urtandosi, ed Isidoro dà una spinta a Toffolo e lo getta in terra)

IsidoroAh bestia!

ToffoloAiuto.

IsidoroCon chi la gh’astu? (a Toffolo)

ToffoloI me vol dare. (alzandosi)

IsidoroChi è che te vuol dar?

ToffoloTitta Nane.

Titta NaneNo xe vero gnente.

IsidoroVa via de qua subito. (a Titta Nane)

VicenzoNol la gh’ha co elo, lustrissimo; el la gh’ha co Beppo e con paron Toni.

IsidoroVa via de qua, te digo. (a Titta Nane)

VicenzoVia, andemo, cognè obbedire, cognè , (a Titta Nane)

Isidoro(Menèlo via, paron Vicenzo, e tegnilo con vu, e trattegnive sotto el portego in piazza, dal barbier o dal marzeretto, che se vorrò, se ghe sarà bisogno, ve manderò po a chiamar). (a Vicenzo)

Vicenzo(Sarà obedìa, lustrissimo). Andemo. (a Titta Nane)

Titta NaneNo voggio vegnire.

VicenzoAndemo co mi, no te dubitare. So omo, so galantomo, viè co mi, non te dubitare.

IsidoroVia, va con elo; e fa quel che te dise paron Vicenzo; e abbi pasenzia, e aspetta, che pol esser che ti sii contento, e che te fazza dar quanta sodisfazion che ti vol.

Titta NaneMe raccomando a ela, lustrissimo. So poveromo, so galantomo, siò cogitore; me raccomando a ela, siò cogitore lustrissimo. (parte)

Isidoro e Toffolo.

Isidoro(Mi so cossa ghe voria per giustarli. Un pezzo de legno ghe voria. Ma averave perso el devertimento). Vien qua, Toffolo.

ToffoloLustrissimo.

IsidoroVustu che pariamo a sta putta, e che vedémo se se pol concluder sto maridozzo?

ToffoloMagari, lustrissimo! Ma bisogna parlare co donna Libera so sorella, e co so cugnà parò Fortunato.

IsidoroSarali in casa sta zente?

ToffoloNo so, lustrissimo. Adesso, se la vuò che chiame...

IsidoroAndemo drente piuttosto.

ToffoloMi in ca no ghe posso vegnire.

IsidoroPerchè no ghe pustu vegnir?

ToffoloA Chiozza, lustrissimo, un putto donzelo nol ghe può andare dove ghe xe delle putte da maridare.

IsidoroE pur so che tra vualtri se fa continuamente l’amor.

ToffoloIn stra, lustrissimo, se fa l’amore; e po la se fa domandare, e co la s’ha domandà, se può andare.

IsidoroChiamemole in strada donca.

ToffoloOlà, parò Fortunato, ghe seu? Donna Libera, olà.

Donna Libera e detti, poi paron Fortunato.

Isidoro(Eh! co sta sorda no me ne voggio impazzar).

LiberaCoss’è? Cossa vustu?

ToffoloQua è siò cogitore...

LiberaLustrissimo, cossa comandalo?

IsidoroCom’èla! No sè più sorda?

LiberaOh! lustrissimo, no. Gh’aveva una flussion. So varìa.

IsidoroCussì presto?

LiberaDa un momento all’altro.

IsidoroAnca sì, che gieri deventada sorda per no dir...

FortunatoTissimo. (ad Isidoro)

IsidoroHo gusto che sia qua anca compare burataora. Son qua per dirve se marideressi Checchina.

LiberaMagari, lustrissimo! Me la destrigheria volentiera.

FortunatoMi, utissimo, gh’ho pomesso cento ucati.

LiberaE altri cinquanta ghe li averemo sunai.

IsidoroE mi ghe farò aver una grazia de altri cinquanta.

LiberaSielo benedetto! Gh’alo qualche partio?

IsidoroVardè: ve piaselo quel partio? (accenna Toffolo)

FortunatoToffao? Toffao? Catta bauffe, catta bauffe.

ToffoloMi no dago impazzo a nissun, co i me lassa stare...

LiberaCon un puo’ de battelo, come l’alo da mantegnire?

ToffoloNo metteroggio suso peota, no metteroggio?

LiberaE dove la menerastu, se no ti gh’ha nè tetto, nè ca?

FortunatoLa ustu menare i battelo la novizza a dormire?

ToffoloVe podè tegnire i cento ducati, ve podè tegnire, e farme le spese a mi e a mia muggiere.

IsidoroSì ben; nol dise mal, el gh’ha più giudizio che no credeva. Podè per qualche tempo tegnirlo in casa.

LiberaMo per quanto, lustrissimo?

IsidoroA conto de sti cento ducati, per quanto voressistu che i te fasse le spese?

ToffoloNo so; almanco siè anni.

FortunatoPuffeta! puffeta! Siè anni? Puffeta!

IsidoroTi voressi ben spender poco.

ToffoloChe la fazza ela, lustrissimo.

IsidoroVia, per un anno ve comoda? (a Libera)

LiberaCossa diseu, paron? (a Fortunato)

FortunatoFe vu, parona; parona, fe vu, parona. (a Lìbera)

ToffoloMi stago a tutto, lustrissimo.

IsidoroChiamè la putta. Sentime cossa che la dise, (a Lìbera)

LiberaOe, Checca!

FortunatoChecca, Checca! (chiama forte)

Checca e detti, e Lucietta.

CheccaSo qua: cossa voleu?

LiberaNo ti sa?

CheccaEh! ho sentio tutto.

FortunatoBava! E tà a pionare, bava!

IsidoroE cussì, cossa diseu? (a Checca)

CheccaLa senta una parola. (a Isidoro)

IsidoroSon qua.

Checca(De Titta Nane no ghe xe speranza?) (a Isidoro)

Isidoro(El m’ha dito un de no tanto fatto . (a Checca)

Toffolo(Anca in recchia el ghe parla?) (con isdegno)

Checca(Mo per cossa?) (a Isidoro)

Isidoro(Perchè el xe innamorà de Lucietta). (a Checca)

ToffoloLustrissimo siò cogitore.

IsidoroCossa gh’è?

ToffoloVorave sentire anca mi, vorave.

IsidoroVia, destrigheve. Lo voleu, o no lo voleu? (a Checca)

CheccaCossa diseu, sorella? (a Libera) Cossa diseu. cugnà? (a Fortunato)

LiberaCossa distu ti? Lo vustu? (a Checca)

CheccaPerchè no?

ToffoloOh cara, la me vuole, oh cara! (giubilando)

IsidoroFioli, co gh’intro mi in te le cosse, mi no voggio brui longhi. Destrighemose, e marideve.

Orsetta e detti, poi Beppo.

OrsettaComuodo? Checca s’ha da maridare avanti de mi? Mi che xe tre anni che so in donzelon, no m’averò gnancora da maridare; e custìa che xe la minore, s’ha da sposare avanti della maggiore?

FortunatoSì bè, sì bè, a gh’ha rason, sì bè.

CheccaGh’astu invidia? Marìdete. Chi te tien, che no ti te maridi?

FortunatoSiò sì, siò sì, marìdete, se ti te vuò maridare.

LiberaTi lo gh’avevi el novizzo. Per cossa lo xestu andà a desgustare? (a Orsetta)

FortunatoAh! per cossa? (a Orsetta)

IsidoroNo gièrelo Beppo el so novizzo? (a Libera)

LiberaSior sì, Beppo.

FortunatoBeppo.

IsidoroAspettè. Beppo ghe xelo in casa? (alla sua casa)

BeppoSo qua, lustrissimo.

IsidoroPer cossa seu andà in collera con Orsetta?

BeppoMi, lustrissimo? L’è stada ela che m’ha strapazzao; l’è stada ela che m’ha descazzao.

IsidoroSentìu, siora?

OrsettaNo sala che la collera orba, che no se sa delle volte quel che se diga!

IsidoroSentìu? No la xe più in collera. (a Beppo)

BeppoAnca mi son uno che presto me la lasso passare.

IsidoroVia donca; la xe giustada. Se no volè che Checca se marida prima de vu, e vu deghe la man a Beppo avanti de ela. (a Orsetta)

OrsettaCossa diseu, sorella? (a Libera)

LiberaA mi ti me domandi?

FortunatoFala bella, Orsetta. Fala bella, fala bella, (eccita con allegria Orsetta a maritarsi.)

Lucietta e detti.

LuciettaCome, puoco de bon! Sior omo senza reputazion, averessi tanto ardire de sposare culìa che n’ha strapazzà. (a Beppo)

Isidoro(Meggio da galantomo!)

OrsettaCossa xe sta culìa? (a Lucietta, con calore)

LiberaOe, no se femo in vissere.

FortunatoOlà, olà, olà.

BeppoMi no so cossa dire, mi no so cossa fare, mi me vôi maridare.

LuciettaMi prima m’ho da maridare; e fin che ghe so mi in ca, altre cugnà no ghe n’ha da vegnire.

IsidoroMo perchè no la marideu? (a Beppo)

BeppoPerchè Titta Nane la gh’ha licenzià.

IsidoroVa là, Toffolo; va in piazza sotto el portego dal barbier; dighe a paron Vicenzo che el vegna qua, e che el mena qua Titta Nane, e che i vegna subito.

ToffoloTissimo sì. Checca, vegno ve’, vegno. (parte)

Lucietta(Co Checca xe novizza co Marmottina, mi de Titta Nane no gh’ho più zelusia). (da sè)

IsidoroGhe xe caso, donne, donne, che no digo altro, che voggiè far pase, che voggiè tornar a esser amighe?

LuciettaSe ele no gh’ha gnente co mi, mi no gh’ho gnente co ele.

IsidoroCossa diseu? (a Libera, Orsetta e Checca)

OrsettaMi da là a là no gh’è altro.

LiberaMi? Co no son tirada per i cavei, no parlo mai co nissun.

IsidoroE vu, Checca?

CheccaDe diana! A mi me piase stare in pase co tutti.

IsidoroVia donca, pacifichève, basève.

OrsettaMi sì.

LuciettaSo qua.

Pasqua e detti.

PasquaCossa? cossa fastu? Ti vuò far pase? Con custìe? co sta zente?

IsidoroOh! vegnireu vu adesso a romper le scatole?

PasquaMe maraveggio: le m’ha strapazzà.

IsidoroQuietève anca vu, fenimola.

PasquaNo me voggio quietare; me diole ancora sto brazzo. No me voggio quietare.

Orsetta(Magari l’avessio strupià!)

Paron Toni e detti.

IsidoroOe, paron Toni.

ToniLustrissimo.

IsidoroSe no farè far giudizio a vostra muggier...

ToniHo sentio, ho sentio, lustrissimo, ho sentio. Animo; fa pase. (a Pasqua)

PasquaNo voggio.

ToniFa pase. (minaciandola)

PasquaNo, no voggio.

ToniFa pase, te digo; fa pase. (tira fuori un legno)

PasquaSì, sì, marìo, farò pase. (mortificata s’accosta)

IsidoroOh bravo! Oh bravo! Oh co bravo!

LiberaViè qua, Pasqua.

PasquaSo qua, (s’abbracciano)

LiberaAnca vu, putte. (tutte s’abbracciano e si baciano)

IsidoroBrave, e viva; e che la dura fin che la se rompe.

Paron Vicenzo, Titta Nane, Toffolo e detti; poi Servitore.

VicenzoSemo qua, lustrissimo.

IsidoroOh, vegnì qua, Titta Nane, adesso xe el tempo che mi ve fazza cognosser se ve vôi ben, e che vu fe cognosser che sè omo.

VicenzoGh’ho tanto dito anca mi a Titta Nane, che el me par mezzo a segno; e gh’ho speranza che el farà tutto quello che vuole el lustrissimo siò cogitore.

IsidoroVia donca, mandè a monte tutto. Tornè amigo de tutti, e disponeve a sposar Lucietta.

Titta NaneMi, lustrissimo? No la sposo gnanca se i me picche.

IsidoroOh bella!

Lucietta(Mo no xele cosse da pestarlo co fa el baccalà!)

PasquaOe, sentì: se ti credessi che t’avesse da toccare Checca, vara ve’, la s’ha da sposare co Toffolo. (a Titta Nane)

FortunatoE mi cento uccati e dago.

Titta NaneMi no ghe ne penso, che la se spose co chi la vuole.

IsidoroE perchè no voleu più Lucietta? (a Titta Nane)

Titta NanePerchè la m’ha dito va in malora, la m’ha dito.

LuciettaOh, vara ve’! E a mi cossa no m’astu dito?

IsidoroOrsù chi vol, vol; e chi no vol, so danno. Vualtri a bon conto, Checca e Toffolo, deve la man.

ToffoloSo qua.

CheccaSo qua anca mi.

OrsettaSior no, fermève, che m’ho da mandar prima mi.

IsidoroAnimo, Beppo, da bravo.

BeppoOe, mi no me farò pregare.

LuciettaSior no, se no me marido mi, no ti t’ha maridar gnanca ti. (a Beppo)

PasquaE la gh’ha rason Lucietta.

ToniE mi cossa soggio? Mi no gh’ho da intrare? A mi no s’ha da parlare?

IsidoroVoleu che ve la diga? Ande al diavolo quanti che se, che son stuffo. (in atto di partire)

CheccaVia, che nol vaga. (a Isidoro)

FortunatoTissimo. (a Isidoro)

OrsettaChe el se ferma. (a Isidoro)

FortunatoTissimo. (a Isidoro, fermandolo)

LuciettaChe el gh’abbia pazenzia. (a Isidoro)

IsidoroPer causa vostra tutti i altri torrà de mezzo, (a Lucietta)

LuciettaVia, lustrissimo, che noi me mortifica più davantazo. Per causa mia no voggio che toga de mezzo nissun. Se son mi la cattiva, sarò mi la desfortunà. Nol me vuol Titta Nane? Pazenzia. Cossa gh’oggio fatto? Se ho dito qualcossa, el m’ha dito de pezo elo. Ma mi ghe voggio ben, e gh’ho perdonà, e se elo no me vol perdonare, xe segno che nol me vuol ben. (piange)

PasquaLucietta? (con passione)

OrsettaOe, la pianze. (a Titta Nane)

LiberaLa pianze. (a Titta Nane)

CheccaLa me fa peccao. (a Titta Nane)

Titta Nane(Maledìo! Se no me vergognasse!)

LiberaMo via, pussibile che gh’abbiè sto cuor? Poverazza! Vardè se no la farave muover i sassi. (a Titta Nane)

Titta NaneCossa gh’astu? (a Lucietta, rusticamente)

LuciettaGnente. (piangendo)

Titta NaneVia, animo. (a Lucietta)

LuciettaCossa vustu?

Titta NaneCoss’è sto fiffare?

LuciettaCan, sassin. (a Titta Nane, con passione)

Titta NaneTasi. (con imperio)

LuciettaTi me vuol lassare?

Titta NaneMe farastu più desperare?

LuciettaNo.

Titta NaneMe vorastu ben?

LuciettaSì.

Titta NaneParon Toni, donna Pasqua, lustrissimo, co bona licenzia. Dame la man. (a Lucietta)

LuciettaTiò. (gli dà la mano)

Titta NaneTi xe mia muggiere. (sempre ruvido)

IsidoroOh bella! Oe, Sansuga? (al servitore)

ServitoreLustrissimo.

IsidoroVa subito a far quel che t’ho dito.

ServitoreSubito. (parte)

IsidoroA vu, Beppo. Sotto vu.

BeppoMi? La varda co che facilitae. Paron Fortunato, donna Libera, lustrissimo, co so bona grazia. (dà la mano a Orsetta) Marìo e muggiere.

OrsettaOh! adesso mo, maridete anca ti, che no me n’importa, (a Checca)

IsidoroToffolo, chi è de volta?

ToffoloMi prima barca. Parò Fortunato, donna Libera, lustrissimo, co so bona licenzia. (dà la mano a Checca)

CheccaOe, la dota. (a Isidoro)

IsidoroSon galantomo, ve la prometto.

CheccaTiò la man. (a Toffolo.)

ToffoloMuggiere.

CheccaMarìo.

ToffoloE viva.

FortunatoE viva allegramente. Muggiere, anca mi so in gringola.

ServitoreXe qua tutti, co la comanda. (a Isidoro)

IsidoroNovizzi, allegramente. V’ho parecchià un poco de rinfresco; gh’ho un per de sonadori; vegnì con mi, che vôi che se devertimo. Andemo, che balleremo quattro furlane.

OrsettaQua, qua ballemo, qua.

IsidoroSì ben, dove che volè. Animo, portè fuora delle careghe. Fè vegnir avanti quei sonadori; e ti, Sansuga, va al casin, e porta qua quel rinfresco.

LuciettaSior sì, ballemo, devertimose, za che semo novizzi: ma la senta, lustrissimo, ghe vorave dire do parolette. Mi ghe son obligà de quel che l’ha fatto per mi, e anca ste altre novizze le ghe xe obligae; ma me despiase che el xe foresto, e col va via de sto liogo, no vorave che el pariasse de nu, e che andasse fuora la nomina che le Chiozzotte xe baruffante; perchè quel che l’ha visto e sentìo, xe sta un accidente. Semo donne da ben, e semo donne onorate; ma semo allegre, e volemo stare aliegre, e volemo ballare, e volemo saltare. E volemo che tutti possa dire: e viva le Chiozzotte, e viva le Chiozzotte.

Fine della Commedia.